Այսօր Ազգային ժողովի ճեպազրույցների օրն է: ԱԺ-ում հավատարմագրված լրագրողներն ավելի շատ սպասում էին «Բարգավաճ Հայաստան» խմբակցության պատգամավորներին, սակայն նրանք այդպես էլ չեն ներկայացել ճեպազրույցին: Նշենք, որ վաղը կուսակցության համագումարն է, եւ լրագրողների հարցերը հիմնականում համագումարին էին վերաբերելու: Առայժմ հայտնի չէ` ԲՀԿ խմբակցությունից որեւէ մեկը կհանդիպի՞ լրագրողներին, թե՞ ոչ: Այսօր բոլոր խմբակցությունների ներկայացուցիչներն իրենց կարծիքն են կիսում լրագրողների հետ, ինչպես քառօրյայի, այնպես էլ դրանից դուրս հետաքրքրությունն ներկայացնող հարցերի վերաբերյալ: ԲՀԿ խմբակցության քարտուղար Արամ Սաֆարյանի հեռախոսն անհասանելի է, իսկ ԲՀԿ-ական պատգամավոր Նաիրա Զոհրաբյանի բջջային հեռախոսին պատասխանեց նրա օգնականը: Վերջինիս ասելով` պատգամավորը գտնվում է մարզում եւ Երեւանում կլինի երեկոյան: ԲՀԿ խմբակցության գործավարուհին նույնպես տեղյակ չէր, թե ինչու խմբակցության պատգամավորները չեն ներկայացել ճեպազրույցին: