Այսօր առավոտյան «Ժառանգություն» կուսակցության պատգամավորներ Ստեփան Սաֆարյանն ու Արմեն Մարտիրոսյանը Տավուշի մարզի մի շարք գյուղերից հավաքված վրացական պետհամարանիշերով մեքենաների վարորդների հետ միասին շարժվեցին դեպի Նոյեմբերյան: Այստեղ նրանց միացան տեղացի վարորդները եւ անցկացվեց կարճատեւ  հանրահավաք, որի ընթացքում ներկայացվեց Շիրակի եւ Լոռու մարզի վարորդների պահանջագիրը, որին միացան նաև տավուշցի վարորդները: Ապա բողոքի ակցիայի մասնակից շուրջ 50 մեքենաների շարասյունը ուղեւորվեց դեպի Բագրատաշեն: Հընթացս նրանց միացան նաեւ Նոյեմբերյան-Բագրատաշեն ճանապարհի վրայի մի քանի գյուղերի վարորդներ եւ ի վերջո շուրջ 80 մեքենա հասավ Բագրատաշեն: Բագրատաշենում տեղի ունեցավ եւս մեկ հանրահավաք, որից հետո պատգամավորները վարորդների անունից հանդիպեցին Բագրատաշենի մաքսակետի պետ Կարեն Գրիգորյանի, ինչպես նաեւ Գուգարքի մաքային վարչության պետ Հովհաննես Աբովյանի հետ, ում փոխանցեցին վարորդների` 4 կետից բաղկացած պահանջագիրը: Հ.Աբովյանը տեղեկացրեց, որ օրերս փոխվարչապետ Արմեն Գեւորգյանի մոտ տեղի է ունեցել խորհրդակցություն, որի ընթացքում քննարկվել է ավտոմեքենաների ներմուծման մաքսադրույքի հնարավոր նվազեցման խնդիրը, ինչպես նաեւ նոր օրենքի կիրառումից տուժած վարորդներին անտոկոս վարկեր  տրամադրելու առաջարկներ: Այս հարցերը գործադիրի օրակարգում են եւ Կառավարության վաղվա նիստում քննարկվելու են: Պատգամավորները տեղեկացրեցին հանրահավաքի մասնակիցներին, որ վաղը` փետրվարի 17-ին, Կառավարության շենքի առջեւ տեղի կունենա Շիրակի, Լոռու եւ Տավուշի մարզերի վրացական համարանիշերով (չմաքսազերծված) ավտոմեքենաների վարորդների բողոքի ակցիա, որին սատարում է «Ժառանգություն» կուսակցությունը եւ կոչ արեցին բոլոր վարորդներին ակտիվորեն մասնակցել այդ միջոցառմանը: «Ժառանգություն» կուսակցության լրատվական ծառայություն