Այսօր «Ժառանգություն» կուսակցության վարչության նախագահ, պատգամավոր Րաֆֆի Հովհաննիսյանը Ազգային ժողովի ամբիոնից հանդես է եկել հայտարարությամբ, որում, մասնավորապես, ասել է. «Ազգային ժողովի օրակարգը` թե մեծը, թե քառօրյան, պետք է արտացոլի ՀՀ քաղաքացիների ու հայ ժողովրդի արտաքին և ներքին պահանջներն ու օրինավոր ակնկալիքները: Ցավոք սրտի, դա այդպես չէ, և այսօր խոսքը միմիայն Հայաստան-Թուրքիա ահավոր հակապետական արձանագրությունների առկայության մասին չէ` մեծ օրակագում, կամ որևէ այլ օրինագծի մասին: Վերջերս գործող նախագահը կուսակցապետ իր գործընկերների հետ կնքեց հակասահմանադրական, հակաիրավական մի հուշագիր, որի իմաստը ոչ միայն ժամանակից շուտ` ի խախտումն համապատասխան բոլոր օրենքների, սեփական թեկնածության առաջադրումն էր, այլև պատգամը հասարակությանը, որ L'Etat c'est moi ` «Պետությունը ես եմ», և իմ դեմ խաղ չկա: Այդ արտաքին քաղաքականությունը, որ տևապես զիջում է մեր պետական ինքնիշխանությունը  և ագային շահը, շարունակվելու է առաջիկա 7 տարին: Այդ ներքին քաղաքականությունը, որը խորացնում է անհավասարությունը, անօրինականությունը, անարդարությունն ու արտագաղթը, տևելու է նվազագույնը 7 տարի: Մեր պետականության վաղվա կրողներ այս երիտասարդների առաջ մենք թաքցնելու բան չունենք: Խորհրդարանի առարկայական պատկերն արտացոլանք է հերթաբար խեղված և կեղծված ընտրությունների, բայց անգամ մեծամասնության և ընդդիմության այս համամասնությունը չի բավականացնում կուսակցապետերի ախորժակը, և իրենց հայացքն ուղղել են սակավաթիվ այս ընդդիմադիր աթոռների վրա: Հարկ չկա կեղծել հերթական ընտրությունը: Ինչպես սուրբ պատարագն է ասում սիրով, ճշմարտությամբ և ոչ երբեք հեգնանքով. «Առե´ք, կերե´ք… Սա է ժառանգությունը ձեր»: Րաֆֆի Հովհաննիսյանի հայտարարությունից հետո «Ժառանգություն» խմբակցությունը դուրս եկավ խորհրդարանի դահլիճից: Այնուհետև հրավիրված վարչության և խմբակցության համատեղ նիստում, արձագանքելով Րաֆֆի Հովհաննիսյանի առաջ քաշած, օրվա հրամայական հանդիսացող գնահատականներին և հաշվի առնելով պահի կարևորությունը, որոշվեց ս.թ. մարտի 6-ին հրավիրել «Ժառանգության» խորհրդի ընդլայնված նիստ, որի քննարկմանը կներկայացվեն կուսակցության և նրա խորհրդարանական խմբակցության հետագա ռազմավարության և մարտավարության առաջարկվող տարբերակները, և կկայացվի համապատասխան որոշում: «Ժառանգություն» կուսակցության լրատվական ծառայություն 28 փետրվարի 2011թ., ք.Երևան