«Հետքի» տեղեկություններով՝ հավի մսի թունավորման պատճառով 3-4 օր առաջ Նորքի ինֆեկցիոն հիվանդանոց է տեղափոխվել մի ընտանիք` ծնողներն ու իրենց տղան: Բացի այս դեպքը, ըստ թերթին տեղեկություն փոխանցած քաղաքացու, վերջերս արձանագրվել է նման ևս երկու դեպք: Թունավորման ավելի կոնկրետ պատճառը և հիվանդների առողջական վիճակը ճշտելու համար զանգահարեցինք հիվանդանոց: Ընդունարանից տեղեկացրեցին, որ այդ ընտանիքն այսօր արդեն դուրս է գրվում հիվանդանոցից, իսկ մանրամասների համար խորհուրդ տվեցին զանգահարել մեծահասակների բաժին: Լսափողը վերցրեց մի կին, ում խնդրեցինք ասել, թե ինչ վիճակում է ընտանիքը, և որն է եղել նրանց թունավորման բուն պատճառը.

«Ես ինչի՞ պիտի ձեր թերթին ինֆորմացիա տամ: Էրեխեն, հայրը, մայրը եկել էին մեզ մոտ, հիմա լավ վիճակում դուրս են գրվում»:

Այնուհետև նա նշեց, որ թունավորման պատճառը եղել է սնունդը: Փորձեցինք ճշտել, թե կոնկրետ ինչ տեսակ սնունդը:

«Սիրելիս, ուրեմն կա բժշկական գաղտնիք, որը ես իրավունք չունեմ ամեն ինչը ասեմ: Էս մարդիկ ընտանիքով ինչ-որ բաներ են կերել: Ասենք թե խոզի միս կամ հավ, դա ձեզ ի՞նչ ա տալու: Դուք բժիշկ չեք: Էս մարդիկ իրանց լավ են զգում, հիմա էլ գնում են տուն»:

Այնուհետև նա նշեց, թե «նման ոչ մի դեպք չի եղել, սա առաջին դեպքն ա: Ես այլևս ժամանակ չունեմ, ավելի լուրջ հարցերով պետք է զբաղվեմ»: