«Հետքը» և Ցմահ դատապարտյալների հարցերով քաղաքացիական նախաձեռնությունը «Լսեք մեր ձայնը» խորագրով միջոցառումների շարք է սկսում:

Այն միջոց է` իրենց դատական սխալի զոհ համարող ցմահ դատապարտված մարդկանց խոսքը բանտի ճաղերից ու պատերից դուրս հանելու, հանրությանն ու պետական մարմիններին հասցնելու:

«Հետքն» իր «Խեղված ճակատագրեր» հոդվածաշարով անդրադառնում է այն մարդկանց ճակատագրերին, ովքեր բանտերում են, սակայն տարիներ շարունակ պնդում են, որ անմեղ են և պայքարում են իրենց գործերի վերաբացման համար:

Դատարանների արխիվում մենք ծանոթացել ենք մահապատժի ու ցմահ ազատազրկման դատապարտված մոտ տասը մարդու քրեական գործերին, լսել այդ մարդկանց ձայնը: Հիմա ուզում ենք նրանց ձայնը լսելի դարձնել նաև ձեզ համար:

Արտերկրում քիչ չեն դեպքերը, երբ տասնյակ տարիներ անց դատապարտյալներն արդարացվում են, ու անմեղ մարդիկ վերադառնում են ազատություն: Մենք համոզված ենք, որ հայաստանյան բանտերում նույնպես կան անմեղ դատապարտյալներ: Պարզապես նրանց ձայնը լսելի չէ: Լսենք նրանց ձայնը ու հնարավորություն տանք, որպեսզի շտկվեն նախկին սխալները:

Առաջին միջոցառումը լինելու է մշակութային: Դրան կարող են մասնակցել բոլոր ցանկացողները, մուտքը կլինի ազատ:

Նպատակ ունենք ստեղծել իրավաբանների մի խումբ, որը կզբաղվի իրենց անմեղությունն ապացուցել ցանկացող դատապարտյալների քրեական գործերի և դրանց վերաբացման հնարավորությունների ուսումնասիրությամբ:

Այսպիսով փորձում ենք նաեւ արվեստի միջոցով արծարծել դատաիրավական խնդիրները՝ դրանք հասարակական քննարկման նյութ դարձնելով: Մշակութային միջոցառմանը մասնակցելու նպատակով արդեն արձագանքել են արվեստի, բեմի մարդիկ: Եթե հետաքրքրեց, գրեք մեզ:

Լուսանկարը` Սարո Բաղդասարյանի