Այսօր Մարգարիտա Ստեփանյանն ամուսնուն չի կարող շնորհավորել հաղթանակի օրվա առթիվ: Նրա ամուսինը՝ ազատամարտիկ, Ղարաբաղյան պատերազմի մասնակից Վահե Մկրտչյանն անցյալ տարվա նոյեմբերի 5-ին ձերբակալվել է ու 6 ամիս արդեն գտնվում է կալանքի տակ՝ «Նուբարաշեն» ՔԿՀ-ում:

Մարգարիտան երկու դուստրերի՝ 4 ու 5 տարեկան Նարեի ու Ագնեսայի հետ երեկ՝ մայիսի 8-ին, գնացել է «Հաղթանակ» զբոսայգի. «Ընտանեկան ավանդույթ ունեինք՝ մայիսի 8-ին կամ 9-ին անպայման ամբողջ ընտանիքով գնում էինք «Հաղթանակ» զբոսայգի: Ես ու մեր երկու երեխաները առավոտվանից տոն էինք դարձնում Վահեի համար. հայկական երգ ու պարով մեր աղջիկները շնորհավորում էին հայրիկին: Որոշեցինք այս տարի էլ չխախտել ավանդույթը, թեկուզ Վահեն մեզ հետ չէ ֆիզիկապես, բայց մտքով, սրտով, վստահ եմ, ամեն րոպե մեզ հետ է, ինչպես մենք՝ իր հետ»,- «Հետքին» պատմեց Մարգարիտան:

Առաջին անգամ նա երեխաներին տարել է նաև «Մայր Հայաստան» թանգարան ու ցույց տվել մի գիրք, որի շապիկին Վահե Մկրտչյանի նկարն է: «Երբ հարցրեցի երեխաներին, թե ով է գրքի շապիկի վրա, փոքր աղջիկս անմիջապես ասաց՝ հայրիկը, մեծը մի քիչ մտածեց, միգուցե զարմացավ, որ թանգարանում տեսավ Վահեի նկարը»,- ասաց Մարգարիտան:

Գիրքը կոչվում է «Հայություն՝ Արիականություն», ռուսերեն հրատարակությունն է, պատմում է հայերի արիական ծագման մասին: Առաջին անգամ այդ գիրքը հրատարակվել է 1943թ.՝ Գերմանիայում: Գրքի վերջին հրատարակությունը նվիրված է Արցախյան պատերազմում հերոսաբար զոհված Գագիկ Ստեփանյանի՝ «Հեթանոս Գագոյի» հիշատակին: Հենց այդ հրատարակության շապիկի վրա էլ Վահե Մկրտչյանի նկարն է:

«Գրքի կողքին ազատամարտիկ, 7 ամիս արդեն բանտում գտնվող Վոլոդյա Ավետիսյանի մարտական ժիլետն էր, նրան պատկանող իրեր: Երբ թանգարանի աշխատակցուհուն հարցրեցի, թե այս իրերը հիմա բանտում գտնվող Վոլոդյայի՞նն են, պատասխանեց՝ ցավում եմ, որ ազատամարտիկը բանտում է, այո՛, իրենն են»,- պատմեց Մարգարիտան:  

Մարգարիտան հաճախում է խեցեգործության խմբակ, որ հաղթահարի սթրեսն ու կարողանա պայքարել ամուսնու ազատության համար: Ասում է, որ իր մեջ բացահայտել է կավի հետ աշխատելու հմտություն: Առաջին երկու գործերը նվիրելու է ամուսնուն. «Գործերիս փորձում եմ Վահեի աչքերով նայել, չէ՞ որ նա քանդակի վարպետ է, վախենում եմ, թե մի բան սխալ կանեմ»:

Մարգարիտան երեխաներին ամեն օր պատմում է իրենց հոր մասին: Աղջիկները լավ գիտեն, որ հայրը հայրենիքն է պաշտպանել: «Երեխաներին պատմել եմ, որ Վահեն 15 տարեկանում փախել է տնից մեծ եղբոր հետ, գնացել սահմանները պաշտպանողների մոտ, պաշտպանել Կապանն ու սահմանամերձ գյուղերը, ծանոթացել «Հեթանոս Գագոյի», Շանթի հետ: Վահեն պարգևներ ու մեդալներ չունի: Մի անգամ հարցրեցի՝ ինչու՞ չունես պարգևներ, պատասխանեց` ես պարզապես իմ պարտքն եմ կատարել հայրենիքի հանդեպ: Կալանքի տակ գտնվող 14 տղաների մեծ մասը Արցախյան պատերազմում վաստակ ունեցող մարդիկ են: Զարմանալի է, բայց հաղթանակած տղաներն այսօր բանտերում են»,- ասում է Մարգարիտան:

Առաջին լուսանկարում` Մարգարիտա Ստեփանյանը դուստրերի՝ Նարեի ու Ագնեսայի հետ, երրորդում՝ Վահե Մկրտչյանը