Երեկ Կոտայքի մարզի ընդհանուր իրավասության դատարանի դատավոր Վաղինակ Մկրտչյանը հրապարակել էր Վարդան Պետրոսյանի կալանքը փոխելու մասին փաստաբան Մարի Լոռ Դոզեի միջնորդության որոշման եզրափակիչ մասը: Փաստաբաններ Դոզեն ու Բաղդասարյանը ուսումնասիրել էին դատարանի որոշումը, որով Վաղինակ Մկրտչյանը մերժել էր փոխել Վարդան Պետրոսյանի խափանման միջոց կալանքը և նրան ազատ արձակել:

«Դատարանի որոշումը կարող էր ծիծաղ առաջացնել, եթե խոսքը չվերաբերեր մարդու ազատությանը»,- լրագրողների հետ հանդիպման ժամանակ ասաց պաշտպան Դոզեն` տեղեկացնելով, որ որոշման մեջ նշված է Վարդան Պետրոսյանին կալանքի տակ պահելու 2 հիմք` հնարավոր փախուստը Հայաստանից և վկաների վրա ճնշում գործադրելը:

Պատասխանելով «Հետքի» հարցին, թե արդյոք դատարանի որոշմամբ հստակեցված ու հիմնավորված է Վարդան Պետրոսյանի փախուստի մասին վկայությունը կամ վկաների վրա ճնշումներ գործադրելը, փաստաբան Դոզեն պատասխանեց. «Ոչ, նման ապացույցներ դատարանը չի ներկայացրել, թե ինչ փախուստի վտանգի մասին է խոսքը կամ ինչ հիմքեր կան կասկածելու, որ վկաների վրա ճնշում կարող է գործադրվել: Այսինքն` որոշումը բավարար պատճառաբանված չէ: Ի՞նչ փախուստի մասին կարող է խոսք լինել, երբ Վարդան Պետրոսյանի երկու անձնագրերն էլ նա իր կամքով հանձնել է նախաքննությանը»:

«Այսպիսի որոշման համար Հայաստանը կդատապարտվի ՄԻ Եվրոպական դատարանի կողմից. լինի 5-6 տարի հետո, բայց Հայաստանն անպայման կունենա «Վարդան Պետրոսյանն ընդդեմ ՀՀ-ի» հաղթած գործ: Այսքան վստահ եմ ասում, քանի որ անցյալ տարի նման մի որոշման պատճառով Ֆրանսիան դատապարտվեց: Դարձյալ դատարանը բավարար չէր պատճառաբանել, թե ինչու անձը պիտի մնա կալանքի մեջ: Բայց համեմատած ֆրանսիական որոշման հետ` երեկվա որոշումը գլուխգործոց է»,- ասաց փաստաբան Դոզեն:

Նիկոլայ Բաղդասարյանն էլ հիշեցրեց, որ դեռ դեպքից 4 օր անց՝ հոկտեմբերի 24-ին, ոստիկանությունը գրություն էր ուղարկել՝ ցուցում տալով փակել Վարդան Պետրոսյանի առաջ բոլոր ճանապարհները: Բաղդասարյանը նաև նշեց, որ ավտովթարին ականատես եղած մարդիկ չկան՝ բացի տուժողներից և Վարդան Պետրոսյանից: «Աբսուրդ է կարծել, թե վկաների վրա Վարդան Պետրոսյանը կարող է ճնշում գործադրել»,- ասաց փաստաբանը:

Մարի Լոռ Դոզեն մեկ անգամ ևս պնդեց, որ Վարդան Պետրոսյանի նախնական կալանքն անօրինական է, և ինչ-որ «անհասկանալի հալածանք կա նրա նկատամամբ… Արդարադատությունը պարկեշտության կարիք ունի… Ես չգիտեմ, թե այսօր ինչ են քննում դատարանում, բայց հաստատ ճանապարհատրանսպորտային պատահար չեն քննում»,-ասաց փաստաբանը:

Նիկոլայ Բաղդասարյանը տեղեկացրեց, որ Վարդան Պետրոսյանի կալանավորման գործով նյութերն արդեն պատրաստ են, շուտով դրանք կուղարկվեն ՄԻ Եվրոպական դատարան:

Մարի Լոռ Դոզեն նշեց, որ իր պաշտպանյալին այցելել է «Նուբարաշեն» քրեակատարողական հիմնարկում. «Տեսա, որ պահման պայմանները ցավալի են, ողբալի ոչ միայն Պետրոսյանի, այլև բոլորի համար»: