Շուրջ 1 տոննա թմրանյութի փոխադրման գործը մեկ ամսվա ընթացքում կուղարկվի դատարան: Հանրային պաշտպան Արտակ Գարոյանը, ով Թուրքիայի քաղաքացի Օսման Ուգուրլուի փաստաբանն է, «Հետքի» հետ զրույցում տեղեկացրեց, որ պաշտպանական կողմն այժմ աշխատում է Ուգուրլուի մեղադրանքը վերաորակելու ուղղությամբ:

Հիշեցնենք, որ այս տարվա հունվարի 17-ին Մեղրիի մաքսատանը Իրանից Հայաստանի տարածքով տարանցիկ դեպի Վրաստան ուղևորվող բեռնատարի զննման արդյունքում ՀՀ ԿԱ պետական եկամուտների կոմիտեի մաքսային ծառայության աշխատակիցները  հատուկ հարմարեցված թաքստոցում հայտնաբերել էին 927 կգ  հերոին տեսակի թմրամիջոց:  ՀՀ ազգային անվտանգության ծառայության քննչական վարչությունում հարուցվել էր քրեական գործ ` ՀՀ քրեական օրենսգրքի 215-րդ հոդվածի 2-րդ մասի հատկանիշներով՝ (թմրամիջոցների և հոգեմետ նյութերի մաքսանենգություն): Բեռնատարի  վարորդ Վրաստանի քաղաքացի  Ավթանդիլ Մարտիաշվիլին կալանավորվել էր: Իսկ հունվարի 18-ին Երևանում ձերբակալվել էր նաև Հայաստանի և Վրաստանի տարածքով տարանցիկ դեպի Թուրքիա նշված քանակության թմրամիջոցի տեղափոխման կազմակերպման մեջ մեղադրվող, Թուրքիայի քաղաքացի Օսման Ուգուրլուն: Նրան մեղադրանք է առաջադրվել մաքսանենգության և թմրամիջոցների ապօրինի շրջանառության իրացնելու կամ պատրաստելու նպատակներով հոդվածներով:

«Մենք պետք է աշխատենք, որ իրացման հոդվածը վերաորակեն փոխադրման, այսինքն՝ 266-ը վերաորակվի 268: Կա նաև 215՝ մաքսանենգության հոդված, որը փաստ է, որտեղ պաշտպանության կողմը շատ բան չունի անելու, բայց պաշտպանության կողմը շատ բան ունի անելու իրացման նկատառումը վերաորակելու փոխադրման»,- ասաց պաշտպան Արտակ Գարոյանը:

Ըստ հանրային պաշտպանի՝ մոտակա օրերին պետք է մեղադրանքը ճշգրտվի և հստակեցվի թմրանյութի քանակը, որը փորձաքննության եզրակացությամբ այլ է տրվել: 

Լուսանկարը՝ Հանրային պաշտպանի գրասենյակի