Կոտայքի մարզի ընդհանուր իրավասության դատարանում Վարդան Պետրոսյանի գործով շարունակվեց ապացույցների հետազոտումը: Նիստին դարձյալ ներկա չէին տուժողները: Նրանց ներկայացուցիչ Ռուբեն Բալոյանը հայտնեց, որ տուժողները փոխանցել են՝ դատավարությունը կարող են շարունակել առանց իրենց մասնակցության:

Ճանապարհի ո՞ր մասում է տեղի ունեցել վթարը 

Այս հարցի շուրջ մինչ օրս դատարանում վեճ է ծավալվում: Նախաքննության մարմինը հաստատված է համարել, որ 2013թ. հոկտեմբերի 21-ին Եղվարդ-Երևան ավտոճանապարհի վթարը տեղի է ունեցել կողնակում:

Վարդան Պետրոսյանի պաշտպան Նիկոլայ Բաղդասարյանը, սակայն, պնդում է, որ Վարդան Պետրոսյանը դուրս չի եկել կողնակ, այլ վթարը տեղի է ունեցել բանուկ մասի ճամփեզրին: «Վթարը տեղի է ունեցել կողնակում արտահայտությունը բացակայում է դեպքի վայրի զննության արձանագրության տեքստում, սակայն գծագրում հայտնվել է բախման վայր արտահայտությունը: Քննիչի նշած կետի հետևանքով է հնարավոր դարձել Վարդան Պետրոսյանին առաջադրել ներկայիս մեղադրանքը»,- հայտարարեց Նիկոլայ Բաղդասարյանը:

Վթարի հստակ տեղը պարզելու նպատակով Նիկոլայ Բաղդասարյանը միջնորդեց դատարան հրավիրել փորձագիտական եզրակացությունը կազմած փորձագետին:

Տուժող կողմի փաստաբան Ռուբեն Բալոյանն ու մեղադրող դատախազ Արթուր Սարգսյանն առարկեցին. «Տպավորություն է, թե Նիկոլայ Բաղդասարյանը վթարի ժամանակ մեքենայի մեջ է եղել կամ վերևից տեսել է, թե ինչպես է տեղի ունենում վթարը... Ոչ մի քննիչ հատուկ տեղ չի նշում ու ասում` սա բախման կետն է»,- ասաց դատախազ Արթուր Սարգսյանը:

Տուժողների իրավահաջորդների ու տուժողների ներկայացուցիչ Ռուբեն Բալոյանը նշեց, որ, իր կարծիքով, ճիշտ է նշվել վթարի տեղը, որ բախման վայրում միայն կաթիլների հետքեր են մնում. «Իսկ վթարի տեղում հեղուկ չի թափվում, թափվում է այնտեղ, որտեղ մեքենան կանգ է առնում վթարից հետո»: Ռուբեն Բալոյանը դեմ արտահայտվեց փորձագետ հրավիրելուն, ասելով՝ ամեն ինչ առանց այդ էլ պարզ է:

Դատավոր Վաղինակ Մկրտչյանը, լսելով կողմերի կարծիքները, որոշեց  բավարարել Նիկոլայ Բաղդասարյանի միջնորդությունը. Խորեն Զաքարյանը՝ փորձագետը դատարանում կներկայացնի ավտոմեքենաների բախման կոնկրետ տեղը:

Հայաստանից ելքի ճանապարհները փակվել էին, երբ Վ.Պետրոսյանը դեռ կասկածյալ չէր

Նոյեմբերի 5-ին արդեն Վարդան Պետրոսյանի կենսագրական տվյալների վրա արգելանք է դրվել: Նա չէր կարող հատել ՀՀ սահմանը՝ անկախ նրանից, թե ինչ անձնագիր կլիներ նրա մոտ: Սա այն դեպքում, երբ նոյեմբերի 5-ին Վարդան Պետրոսյանը կասկածյալ չի եղել:

Հետազոտվեց նաև քննիչի ծանուցումը Վարդան Պետրոսյանին ձերբակալելու, նրան որպես վկա հարցաքննության հրավիրելու մասին: Ի դեպ, անցյալ տարվա նոյեմբերի 4-ին քննիչը կազմել է ծանուցում, որում նշված է, որ  Վարդան Պետրոսյանին նոյեմբերի 7-ին հրավիրում է ոստիկանության բաժին հարցաքննության` որպես վկա: Այս ծանուցումը Վարդան Պետրոսյանին տրվում է նոյեմբերի 6-ին, ապա նույն օրն էլ կազմվում է նրան ձերբակալելու արձանագրությունը:

Մեղադրող դատախազ Արթուր Սարգսյանն այս փաստաթղթերի միջև առկա հակասությունները պարզաբանեց այսպես. «Նոյեմբերի 4-ին ծանուցագիր է դուրս գրվել՝ Վարդան Պետրոսյանին՝ որպես վկա հրավիրելու մասին, սակայն նույն օրը ոստիկանության բաժնից քննիչին տեղեկացրել են, որ նոյեմբերի 3-ին Պետրոսյանը դուրս է գրվել հիվանդանոցի վերակենդանացման բաժանմունքից և գնացել է տուն, ինչը քննիչի համար կասկածելի է եղել, որ Վարդան Պետրոսյանը կարող է խուսափել նախաքննությունից»: 

Ռուբեն Բալոյանը հետևյալ կարծիքը հայտնեց. «Քննիչը մի պահ կորցրել է Վարդան Պետրոսյանին իր տեսադաշտից: Հնարավոր էր 2-րդ անձնագրով Վարդան Պետրոսյանը հեռանար հանրապետությունից, դա է եղել պատճառը, որ նա ձերբակալման որոշում է կայացրել»:

«Ի՞նչ է նշանակում՝ մի պահ կորցնել Վարդան Պետրոսյանին տեսադաշտից: Սա բացառվում է: Հիվանդանոցում գտնվելու 3-րդ օրվանից ինձ համար բոլոր սահմանները փակ են եղել: Նախ այն մարդը չէի, որ սողեսող փախչեի, այդ մասին բոլորը գիտեն: Քննիչն էլ գիտի, ես էլ փախչող մարդ չեմ»,-արձագանքեց Վարդան Պետրոսյանը:

«Փորձառու քննիչը ապշեցուցիչ սխալ է թույլ տվել»

Դատարանում այսօր հրապարակված քննիչ Հակոբյանի կազմած մեկ այլ արձանագրության համաձայն, ինքը զանգահարել է Վարդան Պետրոսյանի քրոջը` Աշխեն Պետրոսյանին, ով հայտնել է, որ եղբայրը գտնվում է իր տանը: Քննիչն առաջարկել է հարցաքննել Վարդանին, բայց մերժում է ստացել:

Ըստ Վարդան Պետրոսյանի, «փորձառու քննիչը ապշեցուցիչ սխալ է թույլ տվել՝ զանգահարելով քրոջս՝ Աշխենին բոլորովին այլ, ոչ նրա հեռախոսահամարով: Այդ ժամանակ արդեն Աշխեն Պետրոսյանի հեռախոսահամարը ֆիքսված էր ավագ քննիչ, մայոր Հայկարամ Հակոբյանի մոտ: Բարձրագույն կրթություն ստացած ավագ քննիչը փոխարենը քրոջս զանգահարելու 094 –ով հավաքում է 077-ով համար (համարը ընդհանրապես ուրիշ է): Եվ քրոջս հետ խոսելով պարզում, որ Աշխենը նրան մեր տուն չի թողնելու: Չեմ ուզում մշակութաբանական հարցեր շոշափել, որ մեր տանը այսպիսի տոնով չեն խոսում: Փնտրելով ինձ Սարալանջում՝ հրաշալի իմանալով, որ ես Կասյան փողոցում եմ, ուղարկում են ձերբակալող խումբ, որը ոչ գյուղ է գնում, ոչ Երվանդ Քոչար փողոց, այլ ուղիղ գալիս է ինձ ձերբակալելու»,-նշեց Վարդան Պետրոսյանը: 

Ըստ Նիկոլայ Բաղդասարյանի, քննիչի հետ մշտապես կապի մեջ է եղել: «Նրա աշխատասենյակում խոսել ենք, որ մինչև նոյեմբերի 7-ը հանդիպենք տուժող կողմի հետ, քանի որ այդ ժամանակ արդեն պատրաստ պիտի լիներ դատաավտոտեխնիկական փորձաքննության եզրակացությունը: Եվ նախաքննական մարմինը շատ լավ գիտեր, որ Վարդան Պետրոսյանը նոյեմբերի 3-ին կամ 4-ին՝ կիրակի կամ երկուշաբթի օրը պիտի դուրս գրվի հիվանդանոցից, գնա քրոջ՝ Աշխեն Պետրոսյանի բնակարան: Ավելին՝ այդ մասին թե՛ Վարդան Պետրոսյանն է նշել, թե՛ Աշխեն Պետրոսյանը»:

Վարդան Պետրոսյանը գործի նյութերին չի ծանոթացել

Նիկոլայ Բաղդասարյանը հայտարարեց, որ նախաքննության ընթացքում քննիչը փորձաքննություններ նշանակելու մասին որոշումներին ծանոթացել է գործով տուժողներին և տուժողների իրավահաջորդներին, իսկ Վարդան Պետրոսյանին այդ որոշումներին չի ծանոթացրել: Մեղադրող Արթուր Սարգսյանն էլ նշեց, որ որոշումները կայացնելիս Վարդան Պետրոսյանը որևէ կարգավիճակ չի ունեցել, իսկ կարգավիճակ ունենալուց հետո փաստաթղթերը հանձնվել են Նիկոլայ Բաղդասարյանին նոյեմբերի 8-ին: Սակայն Պետրոսյանի պաշտպանը նշեց, որ անձամբ է այդ փաստթղթերի հետևից եկել, ստացել է որոշները, իսկ ինքն ու իր պաշտպանյալը բազմիցս դիմումներ են գրել, որ տրամադրվեն իրենց փորձաքննությունների եզրակացությունները:

 «Մարդասպանության գործերով անգամ ծանոթացնում են, բայց գործում ցույց տվեք մի որոշում, որ իմ պաշտպանյալը ծանոթացել է նյութերին»,-նշեց պաշտպան Բաղդասարյանը:

Հաջորդ դատական նիստը կշարունակվի հունիսի 13-ին:

Փաստաթղթերի լուսանկարներում անձնական տվյալները սևով ջնջված են «Հետքի» կողմից