Ջազ երգչուհի Տաթևիկ Հովհաննիսյանը խոստովանում է, որ բավականին ոգևորված է, քանի որ այս համերգային շրջագայության ընթացքում նա առաջին անգամ ելույթ է ունենալու նաև Ստեփանակերտում: Վերջին անգամ ամերիկաբնակ ջազ երգչուհին Հայաստանում համերգ է ունեցել 2008-ին: Այս անգամ երգչուհու համերգային երգացանկում ներառված են երգեր երեք լեզուներով՝ հայերեն, անգլերեն և պորտուգալերեն, որոնցից մի քանիսը Տաթևիկը Հովհաննիսյանը կատարելու է առաջին անգամ:

«Ուժ ունի մեր երաժշտությունը»

Ջազ երգչուհին հայտնի է հատկապես հայկական ժողովրդական երգերի ջազային մշակումների կատարմամբ: Բայց և խոստովանում է, որ երբ նոր էր տեղափոխվել ԱՄՆ, իր երգացանկը հարուստ չէր հայկական երգերով: Ծնված լինելով երգչուհի Օֆելյա Համբարձումյանի և քամանչահար Նորայր Հովհաննիսյանի ընտանիքում` նա մշտապես շրջապատված է եղել հայկական ժողովրդական երաժշտությամբ, իսկ հետագայում ընտրել է ջազ երաժշտությունը: Հենց ԱՄՆ-ում է ծնվում գաղափարը՝ միավորել հայկական ժողովրդական երգի ու ամերիկյան ջազի երկու աշխարհները:

«Այդ երաժշտությունը (հայկական ժողովրդական) քայլել է ինձ հետ տարիներ շարունակ և բույն է դրել իմ սրտում,- ասում է երգչուհին:- Երբ երկիրդ թողնում ես, կարոտը մեծանում է, ամեն ինչ քաղցրանում է»:

Արդեն ԱՄՆ-ում Տաթևիկի ներկայացրած էթնիկ հայկական ջազը մեծ արձագանք է գտնում ոչ միայն հայերի, այլև արտասահմանցիների շրջանում: Այսօր էլ երգչուհին այնտեղ էթնիկ հայկական ջազ է դասավանդում օտարազգիներին, ովքեր հետաքրքված են հայ երգչուհու արվեստով: Երգչուհու մոտ գալիս են մարդիկ, ովքեր ցանկանում են նրանից սովորել ջազ երաժշտության տարրերն ու նրբությունները, հասկանալ էթնիկ ջազը, սովորել՝ ինչպես իմպրովիզներ անել էթնիկ ջազ երգելիս:

«Տարածվել է, սիրում են: Ուրեմն ուժ ունի մեր երաժշտությունը»,- ասում է երգչուհին:

«Ես ինձ մեղավոր չեմ զգում, որ գնացի»

«Դուք կլինեի՞ք այն Տաթևիկ Հովհաննիսյանը որը հիմա կա՝ մենք լեգենդար ենք Ձեզ կոչում, եթե դուք ստեղծագործեիք և ապրեիք Հայաստանում»,- հարցնում է լրագրողներից մեկը: 

«Շատ ներողություն, ես այստեղից լեգենդար եմ գնացել,- ծիծաղելով պատասխանում է երգչուհին:- Մեծամտություն թող չհնչի: «First lady of Soviet Jazz». այստեղից ես այդպես եմ գնացել: 9 տարի շարունակ պահպանելով այդ տիտղոսը՝ գնացել եմ զրոյից եմ սկսել: Այնտեղ ո՞ւմ էր դա հետաքրքրում: Կամաց-կամաց նորից շարել եմ քարերը: Այնպես չէ, որ այնտեղ լեգենդար դարձա: Այդ ամենին հասած եմ այստեղից գնացել: Բայց այդ գնալը ես գնահատում եմ: Ես չեմ գնացել որ աստղ դառնամ, ես գնացել եմ, որ ավելին սովորեմ: Իմ երաժշտությունը ջազային է: Իսկ ջազային երաժշտության համար ես հիմա գտնվում եմ լավագույն տեղում: Աճը ինձ համար շատ մեծ կարևորություն ունի: Հիմա թե այդ աճը կկատարվե՞ր այստեղ, դա այլ հարց է: Ես ինձ մեղավոր չեմ զգում, որ գնացի: Եթե գնացի, ուրեմն պետք էր, որ գնայի»:

1980-ական թթ. վերջին ջազ երգչուհին տեղափոխվել է Նյու Յորք, որտեղ և ապրում է մինչ օրս: Սկզբում գնացել էր ԱՄՆ` շրջագայելու, այնուհետև հանգամանքներն այնպես են դասավորվել, որ նա մշտական բնակություն է հաստատել: Այնտեղ նա ամուսնացել է, և արդեն 20 տարվա ամուսիններ են: Երգչուհին հորդորում է չհավատալ այն խոսակցություններին, ըստ որոնց` արտերկիր մեկնողներն «այնտեղ թագավորում են»: Կտրվել արմատներից, հաստատվել օտար երկրում, մի կողմ թողնել նախկին ձեռքբերումները և ամեն ինչ սկսել նորից` երգչուհու համար հեշտ չի եղել:

«Ինձ տուր բեմը, ինձ տուր երաժշտությունը, դրանով ես լիցքավորեմ ինձ և բոլորին: Բայց գործս առաջ տանել դժվարանում եմ: Ճանապարհը կամաց-կամաց հարթվեց,- ասում է երգչուհին:- Երաժիշտ չկա, որ փշերի վրայով չքայլի: Մենք բոլորս աշխատում ենք քրտնաջան և պետք է աշխատենք»:

«Բայց Երևանը Երևանն է»

Հիմա ջազ երգչուհին կրկին Երևանում է. քաղաքում, որի հետ կապված է իր կյանքի մի մասը, անցած ուղու պատմությունը՝ լի չկրկնվող հիշողություններով: Վայրեր կան, որ փոխվել են, որտեղ գուցե երգչուհին չկողմնորոշվի: Ըստ Տաթեւիկի` քաղաքում կան թե́ դրական, թե́ բացասական տեղաշարժեր, «բայց Երևանը Երևանն է»: Երգչուհին ժպիտով հիշում է, որ երբ այսօր վաղ առավոտ արթնացավ, այն օդը, այն հանգստությունը, որ կա այստեղ, չի կարող գտնել ոչ մի տեղ:   

«Բաներ կան, որ դժվար է բացատրել, բայց դրանք քոնն են»,- ասում է նա:

Միաժամանակ, երգչուհուն դուր չի գալիս, որ քաղաքում կան մի շարք վայրեր, որոնց անվանումները գրված են կամ անգլերեն կամ հայերենը ավելի փոքր տառերով: Նա համոզված է, որ Երևանը չպետք է դառնա հերթական եվրոպական քաղաքը:

«Պետք չէ այդքան եվրոպականանալ: Շատ կուզենայի, որ այն, ինչը մեզ առանձնացրել, յուրահատուկ է պահել՝ մեր մշակույթը, մեր ճարտարապետությունը, մեր ավանդույթները, դրանք պահպանվեն»,- ասում է երգչուհին:

Հայաստանում գտնվելու ժամանակահատվածում երգչուհին ցանկանում է ձեռք բերել հին հայկական մշակույթը ներկայացնող նյութեր, որպեսզի իր հետ տանի Նահանգներ և օգտագործի աշակերտների հետ դասավանդման ընթացքում:

Տաթևիկ Հովհաննիսյանի համերգները Հայաստանում կայանալու են հունիսի 28-ին Yans music hall-ում, հունիսի 30-ին` Գյումրիում, հուլիսի 2-ին` Ստեփանակերտում և հուլիսի 4-ին` Ալ. Սպենդիարյանի անվան օպերայի և բալետի ազգային ակադեմիական թատրոնում: