«Եթե Հայաստանում կա 10 օրինապահ վարորդ, ես նրանցից մեկն եմ». Արթուր Հակոբյան

Վարդան Պետրոսյանի գործով այսօր ցուցմունք տվեց «Նիվա» մեքենայի վարորդ, տուժող ճանաչված Արթուր Հակոբյանը: Նա նշեց, որ վթարի պահին իր վարած մեքենան կանգնած է եղել հողածածկ գոտում, երբ հետևից հարվածել է BMW մակնիշի մեքենան:

«Մինչեւ Աշտարակ թեքվելը ձեն առա մեքենայիցս, ուզեցա կանգնեմ: Կանգնել եմ հողածածկ գոտում, դիմացի մասը թեթև դեպի Աշտարակի կողմը... մի քանի հատ գազ եմ տվել, կողային հայելիներով նայեցի, որ լույս է տալիս, տեսա, որ շատ արագ ա գալիս, երկու վայրկյան ասեցի թող գա անցնի նոր, մի քանի վայրկյանում  հասավ մեզ... Ամենաքիչը հարբած մարդու գործ... լուրջ մարդը կամ աջ, կամ ձախ կաներ»,- ցուցմունքում նշեց Արթուր Հակոբյանը:

Դատավորի հարցին, թե ունեք տվյալներ, որ Վարդան Պետրոսյանը խմած է եղել, Արթուր Հակոբյանը պատասխանեց, որ լսել է: Բայց, թե ումից է լսել, ոչինչ չմանրամասնեց:

Դատախազի հարցին պատասխանելով՝ Արթուր Հակոբյանը նշեց, որ չի հիշում, թե ինչու է փոխանցման տուփը հետընթաց ռեժիմի տակ դրել (փոխանցման տուփի դիրքը արձանագրված է դատափորձագիտական եզրակացությամբ): «Նիվայի» վարորդը նշեց, որ հետընթաց չի կատարել: Եղել է կանգնած դիրքում:

Երբ հարցեր տալու հերթը հասավ պաշտպանական կողմին՝ փաստաբան Նիկոլայ Բաղդասարյանին՝ Հակոբյանները բորբոքվեցին: Հաճախ նախագահող դատավորը հանում էր հարցը, տուժողների շահերի ներկայացուցիչ Ռուբեն Բալոյանն էլ առարկում էր՝ նշելով, որ փորձագետին տրվելիք հարցեր է տալիս Բաղդասարյանը: Վարդան Պետրոսյանի պաշտպանն էլ իր հերթին էր առարկում դատավոր Վաղինակ Մկրտչյանի գործողությունների դեմ՝ կարծիք հայտնելով, որ խախտվում է իր պաշտպանական իրավունքը՝ դեպքի հանգամանքները պարզելու հարցերի միջոցով:

Արթուր Հակոբյանը պատասխանեց Բաղդասարյանի հետևյալ հարցին, թե ինչ հեղուկների տարաներ են իր մեքենայի բեռնախցիկում եղել դեպքի օրը: Պարզվեց դրանք ավտոլվացման կետերին տրվելիք մեքենաների լվացման հեղուկներ են: Հակոբյանը զբաղվում է այդ գործով հիմնական աշխատանքից դուրս:

«Գործում առկա լուսանկարում երևում է, որ մեքենաներից ետ, ճանապարհի բանուկ մասում հեղուկ է թափված: Ինչպե՞ս կբացատրեք»,-Նիկոլայ Բաղդասարյանի հարցին «Նիվայի» վարորդը պատասխանեց. «Կարող ա հետո են բերել- թափել, որ նկարեն»: «Լուսանկարներն արված են դեպքից հետո լուսանկարիչ Շամշյանի կողմից»,-պարզաբանեց Վարդան Պետրոսյանի պաշտպանը:    

Հաջորդ հարցը, որ հուներից հանեց Արթուր Հակոբյանին, վերաբերում էր փոխանցման տուփին, որը դրված է եղել հետընթացի ռեժիմի վրա. «Չեմ հիշում, ոնց կուզեմ կդնեմ, ես մեր գարաժում էլ եմ զադնիի վրա դնում»,-ասաց նա:

Հայկ Հակոբյանը հեռացվեց դատական նիստերի դահլիճից

Կոտայքի մարզի ընդհանուր իրավասության դատարանի Աբովյանի նստավայրում նիստի ժամանակ Հակոբյանների կողմից պարբերաբար հնչում էին ռեպլիկներ ու վիրավորանքներ՝ ուղղված պաշտպան Նիկոլայ Բաղդասարյանին ու Վարդան Պետրոսյանին: Էթիկայի նորմերը թույլ չեն տալիս մեջբերել այդ արտահայտությունները: Անգամ Հայկ Հակոբյանի կողմից հնչեց սեռական բնույթի հայհոյանք: Սա առաջին դեպքը չէ, երբ վիրավորանքներ են հնչում Հակոբյանների կողմից: Այդ ընթացքում Վարդան Պետրոսյանի ու նրան սատարողների կողմից որևէ հակադարձում չհետևեց: Դատավոր Վաղինակ Մկրտչյանը սանկցիա կիրառեց Հայկ Հակոբյանի նկատմամբ՝ նրան 1 ժամով հեռացնելով նիստերի դահլիճից:

«Իմ հարցերի մեջ թակարդ չկա». Վարդան Պետրոսյան

«Ես չէի ուզում հարցեր տալ, բայց այս հարցերը ծայրահեղ կարևոր են: Իմ հարցերի մեջ թակարդ չփնտրեք, թակարդ չկա: Նոր ասացիք, որ հանցագործ եմ, ավելին ասեմ՝ ես մարդասպան եմ, էլ ի՞նչ եք ուզում ասեմ, որ հանգստանաք: Ես առաջին իսկ օրվանից փորձել եմ կապ հաստատել Ձեր ընտանիքի հետ, բայց դուք քիչ առաջ ասացիք, որ ես հայտարարել եմ, թե փող չունեմ։ Ե՞րբ եմ նման բան հայտարարել»,- հարցրեց դերասանը:

Արթուր Հակոբյանը պատասխանեց. «Ձեր դատապաշտպանն է անցած նիստին ասել»:

Վարդան Պետրոսյանը պատմեց, որ իր կինը, քույրը, հարազատները հանդիպել են Հակոբյանների հետ, ամեն ինչ եղել է դրական, բայց դրանից հետո ամեն ինչ փոխվել է։ Ո՞րն է պատճառը: Դատավորը հարցը հանեց այս հարցը՝ հիմնավորելով, որ դա կողմերի հնարավոր հաշտեցմանն է վերաբերում և գործի փաստական հանգամանքների հետ կապ չունի:

Վերջում Վարդան Պետրոսյանը հարցրեց. «Անկեղծ ասեք՝ իսկ Դուք՝ ինքներդ սթա՞փ էիք»: Արթուր Հակոբյանը պատասխանեց՝ ես խմած չեմ եղել:

Էական հակասություն Արթուր Հակոբյանի նախաքննական ու դատաքննական ցուցմունքներում 

Վարդան Պետրոսյանի պաշտպան Նիկոլայ Բաղդասարյանը միջնորդեց հրապարակել Արթուր Հակոբյանի նախաքննական ցուցմունքները, քանի որ էական հակասություններ կան: Դատախազն ու տուժողների ներկայացուցիչն առարկեցին՝ համարելով, որ հակասությունները էական չեն: Դատարանը բավարարեց միջնորդությունը և Արթուր Հակոբյանի նախաքննական թվով 5 ցուցմունքները: Էական հակասությունները վերաբերում էին «Նիվա» մեքենայի նախավթարային դիրքին: Մի ցուցմունքում Արթուր Հակոբյանը նշել է, որ վթարը տեղի է ունեցել դեպի Աշտարակ տանող ճանապարհից 1 մետր հեռավորության վրա, հաջորդ անգամ ասել է՝ 3 մետր, հետո 5 մետր, ապա այսօր դատարանում՝ 10-12 մետր, իսկ նախաքննական ցուցնումքում՝ 15-20 մետր հեռավորության վրա: Ցուցմունքներից մեկում Հակոբյանը նշել էր, որ ցանկացել է 1-2 մետր հետ գալ դեպի Աշտարակի խաչմերուկ:

Պաշտպան Բաղդասարյանի հարցին, թե ինչն է պատճառը, որ Արթուր Հակոբյանը տարբեր թվեր է նշել, Արթուր Հակոբյանը բորբոքվեց. «Հինգ մետր, տասը մետր, տասնհինգ մետր՝ ի՞նչ կարեւոր ա: Էդ պահին չեմ իջել, չափել, հիմա ըտենց կոնկրետ չեմ հիշում: Հիշողությո՞ւն եք թողել. սաղ կյանքներս կործանված ապրում ենք, այ համբալ»:

Հակասությունները վերաբերում էին նաև փոխանցման տուփի դիրքին. առաջին ցուցմունքում Հակոբյանը նշել էր, որ այն առաջ գնալու վրա է եղել: Հակասություն կար նաև կանգնելու պատճառի վերաբերյալ. սկզբում Արթուր Հակոբյանն ասել է, որ ուղղակի կանգնել է, որովհետև հետևից արագ ընթացող մեքենա է նկատել, ապա նշել, որ մեքենան «դրաժենի» էր տալիս, դրա պատճառով է կանգնել Աշտարակի խաչմերուկից անցած:

Ցուցմունք տվեց տուժող Տաթևիկ Հակոբյանը

-Ճանաչո՞ւմ եք ամբաստանյալ Պետրոսյանին,-հարցրեց դատավոր Վաղինակ Մկրտչյանը Տաթևիկին:

-Որպես մարդասպան, այո,-հետևեց Տաթևիկ Հակոբյանի պատասխանը:

Տաթևիկն ասաց, որ շատ բան չի հիշում, չգիտի, թե ինչու հայրը կանգնեցրեց մեքենան, չի հիշում, թե իրեն ինչպես հանեցին մեքենայից: Ասաց, որ մեքենայում երկու քույրերով հոր հետևում են նստած եղել, իսկ եղբայրները՝ աջ կողմում:

Հաջորդ նիստին ցուցմունք կտա Հայկ Հակոբյանը: