Այս պահին Երեւան-Շորժա գնացքում լարված իրավիճակ է, գնացքը հսկող ոստիկանը եւ աշխատակիցները պահանջում են ուղեւորներից իջնել հաջորդ կայարանում: Բանն այն է, որ հուլիսի 31-ին «Հարավկովկասյան երկաթուղի» ՓԲԸ-ն լրատվական կայքերով, ռադիոյով եւ հեռուստատեսությամբ հայտարարել էր, որ երկաթուղայինների օրը՝ օգոստոսի 2-ին, երթեւեկությունը ընկերության ներհանրապետական բոլոր էլեկտրագնացքներում ուղեւորների համար կլինի անվճար:
Սակայն գնացքի անձնակազմը պահանջում է ուղեւորներից վճարել տոմսի համար կամ իջնել գնացքից առաջիկա կանգառում: Ուղեւորներից Փառանձեմ Հովհաննիսյանը «Հետքին» հայտնեց, որ անձնակազմի պահանջը բողոքի ալիք է առաջացրել ուղեւորների շրջանում: Ողեւորները չեն ենթարկվել գնացքը հսկող ոստիկանի Չարենցավանում իջնելու պահանջին եւ այս պահին նրանք գտնվում են Չարենցավանում:
«Գնացքը լիքն է, մեզ ստիպում էին իջնել եւ արդեն վեճ էր բռնվել: Երբ ոստիկանին ցույց տվեցինք հայտարարությունը, որ դեռեւս առկա է մի շարք կայքերում, նա հանգստացավ, ասաց զանգեք տնօրինությանը: Ուղեւորներին վախեցնում են, թե եթե չվճարեք, գնացքը հետ չի վերադառնալու, մնալու եք Սեւանում, տաքսիով ավելի թանկ եք հետ գալու»,- ասում է Փառանձեմ Հովհաննիսյանը:
«Հետքի» հետ զրույցում «Հարավկովկասյան երկաթուղիներ» ՓԲԸ աշխատակիցը պարզաբանեց, որ հայտարարությունը, որ գնացքն անվճար է լինելու օգոստոսի 2-ին, սխալմունք է եղել:
«Ես այսօր եկել եմ աշխատանքի ու ասացին, որ 2-ին չի անվճար, այլ 3-ին: Սխալ հայտարարություն է գնացել կայքերով: Ես ոչինչ չեմ կարող ավելացնել իրավիճակի մասին»,- ասաց «Հարավկովկասյան երկաթուղիներ» ՓԲԸ աշխատակիցը:
«Հետքը» չկարողացավ կապվել ընկերության լրատվության բաժնի հետ, սակայն գնացքի անձնակազմն ուղեւորներին էր փոխանցել տնօրինության հեռախոսահամարը: Այդ հեռախոսահամարով մեզ պատասխանեց մի կին, ով չներկայացավ, միայն նշեց. «Այդ հարցերով զանգեք լրատվականին, ով այդ հայտարարությունը տարածել է, ես չեմ նման հայտարարություն տարածողը»:
Հ. Գ. Քիչ առաջ «Հետքի» խմբագրություն զանգահարեց գնացքի անվտանգության ներկայացուցիչ Հայկ Սիրունյանը, ով նշեց, որ բողոքում է մեր հրապարակման դեմ. «Ես ոչ ոքի Չարենցավանում չեմ իջացրել, ես ասել եմ՝ ով տոմսերը չի վճարում, խնդրում եմ առաջիկա կայարանում իջնի: Ոչ մի վատ բան ուղեւորներն ինձնից չեն տեսել»,- ասաց Սիրունյանը:
Տեսանյութը՝ Փառանձեմ Հովհաննիսյանի
Լուս.՝ a1plus.am-ից
Մեկնաբանություններ (1)
Մեկնաբանել