HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գյուղվարչության պետը մարզպետին բարկացրեց

Երեկ Լոռու մարզպետ Արթուր Նալբանդյանն Ալավերդու քաղաքապետարանի նիստերի դահլիճ էր հրավիրել Թումանյանի տարածաշրջանի 30 և Ալավերդի քաղաքի  համայնքապետերին: Մարզպետը մինչ խորհրդակցությունը սկսելը լրագրողներին տեղեկացրեց, որ իր հրավիրած խորհրդակցության աշխատանքներին կարող են մասնակցել միայն առաջին 15 րոպեներին:   

Նա հայտարարեց, որ Թումանյանի տարածաշրջանի համայնքապետերի հետ սա իր առաջին պաշտոնական հանդիպումն է. «Պետք է անկեղծ լինեմ և ասեմ, որ մարզի բոլոր համայնքերում եղել եմ, հանդիպել եմ համայնքապետերի հետ, բայց  Թումայանի տարածաշրջանը մնաց վերջում, որովհետև ինձ համար սա ամենածանր տարածաշրջանն է: Համայնքապետերին բոլորին մոտիկից ճանաչում եմ, շփվել և ընկերություն եմ անում մինչև օրս: Իմ այսօր ձեզ հանդիպելու նպատակը մեր բացթողումների մասին խոսելն է»:   

Մարզպետը համայնքապետերին հիշեցրեց, որ աշնանացանն արդեն ավարտվում է եւ ասաց, որ ուզում է տեղեկանալ տարածաշրջանի գյուղական համայնքերի աշնանացանի ընթացքին և այս տարվա բերքատվության ցուցանիշներին. «Երկրորդ  հարցը, որ պետք է անդրադառնանք, դա համայնքային բյուջեների սեփական եկամուտների կատարման վիճակին է վերաբերում»:

Մարզպետ Նալբանդյանը գյուղապետերին խնդրեց նախ տեղեկացնել, թե այս տարի գյուղմթերքների իրացման հետ կապված համայնքներում ինչ խնդիրներ են եղել: Տեղեկատվություն հաղորդելու դերը ստանձնեց Օձունի համայնքապետ Արսեն Տիտանյանը, ում ղեկավարած համայնքի 1300 հա վարելահողերից հազիվ 25 հա-ն է մշակվել, այն էլ հարևան արևածագցիների կողմից` վարձակալությամբ:

«Պահանջարկ կա, նորմալ ա»,- ասաց Օձունի գյուղապետը:

«Բայց նախորդ տարիների համեմատ՝ բերքն էլ է շատ եղել, չէ՞»,- հարցրեց մարզպետը: 

«Կամաց պահանջարկն էլ ա մեծանում, ամեն օր գալիս են ցորենի ու եգիպտացորենի հետևից»,- պատասխանեց Օձունի համայնքապետը:

Թե իր ղեկավարած համայնքի չվարած ու չցանած ո՞ր վարելահողերի ո՞ր բերքով է պահանջարկ բավարարում, Օձունի համայնքապետը չասաց: Իսկ նորանշանակ մարզպետն այս կարևոր հանգամանքը շրջանցեց: 

Արթուր Նալբանդյանը համայնքապետերին ասաց, որ այս տարի կառավարության իրականացրած գյուղատնտեսական ծրագրերն իրենց արդարացրել են: Այս տարի կառավարությունը էլիտար ցորենի սերմ քիչ է ներկրել, քանի որ Հանրապետության  վերարտադրության ցորենի սերմի քանակով կառավարությունը կարողացել է մարզերին սերմացու տրամադրել: 

Լոռու մարզպետարանը կառավարությունից ստացել է 261 տոննա առաջին վերատադրության ցորեն: Հատկացված քանակից համայնքերում դժգոհություն է առաջացել, դժգոհ է մնացել նաև մարզպետը: 

«Քանի որ մեր հնարավորությունը այդքանն էր, մենք 1 հա-ի համար, ըստ համայնքերի, հատկացրինք 40 կգ ցորեն»,- ասաց Արթուր Նալբանդյանը:  

Նա նշեց, որ սերմացու ցորենի բաժանման ժամանակ որևէ համայնքի նկատմամբ բացառություն չի կիրառվել: Ըստ մարզպետի՝ սերմացու ցորեն տրամադրելու ժամանակ կառավարւթյունը հաշվի է առել այն փաստը, թե մարզում ինչ կարգի վարելահողերի վրա ինչ կարգի ցորեն է ցանվել:

«Հիմա ունենք գյուղեր, որ տարիներ շարունակ մարդիկ ցորենի արտադրությամբ են զբաղվել, այսօր դժգոհում են: Իսկ նրանց բավարար քանակությամբ սերմացու ցորեն չէինք կարող տալ, որովհետև այդ դեպքում մի քանի գյուղեր դուրս էին մնում»,- ասաց մարզպետը:   

Արթուր Նալբանդյանն անդրադարձավ նաև էլիտար ցորենի սերմացուի բաշխմանը: Պարզվեց, որ կառավարությունն ունեցել է Էլիտար ցորենի մեծ քանակության սերմացու, սակայն բոլոր մարզերը սկսել են դրանից հրաժարվել՝ պատճառաբանելով, թե էլիտար սերմացուի մշակման պայմանները մի քիչ ավելի խիստ են: Բացի դրանից, ինչպես նշեց մարզպետը, այդ սերմացուն կառավարության կողմից տրվում էր միայն 7 հա վարելահող ունեցող ֆերմերներին, ովքեր գարնանը 1-ին 2 հարաբերակցությամբ ցորենը պետք է վերադարձնեն կառավարությանը: 

«Մենք 15 տոննա էլիտար ցորենի սերմացու ունեինք և համայնքների ղեկավարներին խնդրում էինք, որ այդ ցորենը ցանեն: Հիմա մեր ձեռքի տակ ունենք 5 տոննա էլիտար ցորեն»,- ասաց մարզպետը:  

Մարզպետարանի գյուղատնտեսության վարչության պետ Գրիգոր Հակոբյանն էլ, օգտվելով առիթից,  համայնքապետերին ասաց. «Եթե ցանկացողներ կան, կարող են գալ էլիտար սերմացու ցորեն տանել»: 

Ի պատասխան՝ մարզպետ Նալբանդյանը հարցրեց. «Բայց մի վայրկյան, այսքան ժամանակ գյուղապետերին չե՞ք ասել, որ սերմացու ցորեն կա, նո՞ր եք գյուղապետերին ասում: Բա ինչո՞ւ եք սերմացու տանելու կարգին գյուղապետերին նոր ծանոթացնում»:

«Առաջին վերատադրության համար եք մեզ ասել, էլիտարի համար մեզ բան չեք ասել»,- տեղերից գյուղվարչության պետին ասացին մի քանի գյուղապետեր: 

«Հիմա մենք ունենք մոտ 10 տոննա Էլիտար ցորեն, որ մեր մարզին ա տված, ովքեր ցանկանում են, կարող են դակումենտներով գնալ մեր գյուղվարչություն,  պայմանագիր կնքել և ստանալ ցորեն»,- հայտարարեց  մարզպետարանի գյուղվարչության պետը: 

«Գյուղվարչություն չէ, գյուղնախարարություն»,- տեղից նրան ուղղեցին գյուղապետերը: 

«Մի վայրկյան, էլի, գյուղնախարարությունից ումի՞ց են ստանալու ցորենը, գիտե՞ն այս մարդիկ: Իսկ քեզ երբ եմ ասել` զգուշացրեք այս մարդկանց, որ ցորենի էլիտար սերմ ունենք՝ ուզո՞ւմ եք, թե՞ չեք ուզում: Զանգե՞լ եք որևէ մեկին: Հիմա երկու համայնքի ղեկավար ասում են՝ ինֆորմացի չեն ունեցել, իսկ Դուք ինձ համոզում եք, թե էլիտար սերմ կա, ու էս մարդիկ չեն ուզում: Հիմա 5 տոննա լրացուցիչ սերմացու են մեզ տվել, էս մարդիկ ուզո՞ւմ են, թե՞ չեն ուզում այդ սերմացուից: Մի հատ զանգեիք, հարցնեիք: Չէ՞ որ մեր վերջին խորհրդակցության ժամանակ Ձեզ հանձնարարեցի համայնքի ղեկավարներին տեղեկացնել»,- գյուղվարչության պետ Հակոբյանի վրա զայրացավ մարզպետը:

«Միշտ զանգում եմ, խնդրում եմ բոլորին: Էն ժամանակ մենք 7 տոննա սերմացու ունեինք»,- արդարացավ գյուղվարչության պետը: 

«Որևէ մեկիդ տեղեկացվե՞լ է էլիտար ցորենի մասին»,- գյուղապետերին հարցրեց մարզպետը և պատասխան չստանալով՝ ասաց. «Լավ, ես այս հարցին դեռ կանդրադառնամ»:  

Նա էլիտար ցորեն ուզող համայնքապետերին հանձնարարեց ներկայանալ մարզպետարան` խնդիրը տեղում լուծելու համար: 

Մարզպետը համայնքապետերին հայտնեց նաեւ, որ մարզը սեփական եկամուտների  հավաքագրումների ցուցանիշով վերջին տեղում է: «Ընդամենը 74 տոկոս սեփական  եկամուտներ ենք հավաքագրել»,- ասաց մարզպետը և լրագրողներին հիշեցրեց, որ խորհրդակցության դահլիճը պետք է լքել: 

Մեկնաբանություններ (3)

Aram
Haskaetsank vor ays antsin anoone Grigor e, hapa inch e kheghj martoon azganoone, Hakobyan te Hovhannisyan? Viv la difference.......
Larisa Paremuzyan
Աննա ջան իհարկե, շնորհակալ եմ, որ փորձել ես մարզպետարանի գյուղվարչության պետի ազգանվան իմ վրիպումը ուղղել: Բայց պարզվում է, որ դու էլ նրա ազգանունը ճիշտ չես հայտնել: Բայց դու պարտավոր չես այդ ազգանունը ճիշտ գրել, իսկ ես պարտավոր եմ: Բոլոր դեպքերում պատահում են վրիպումներ, որքան էլ փորձում ես զգույշ լինել: Ուրեմ գյուղվարչության պետի ազգանունը Գրիգոր Հակոբյան է: Բոլոր դեպքերում . ներողություն եմ խնդրում և շնորհակալ եմ քեզնից:
Աննա
Լոռու մարզպետարանը Դավթյան ազգանունով գյուղվարչության պետ չունի. Գյուղվարչության ներկայիս պետը Գրիգոր Հովհաննիսյանն է:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter