Այսօր երեկոյան  ֆոտոլրագրող Նարեկ Ալեքսանյանի փողոցային ցուցահանդեսից հետո  Տերյան փողոցից  3 մեքենաներով, մոտավորապես 10-15 կարմիր բերետավոր ոստիկաններ,  մոտեցել են Հակահարված արտ խմբի անդամ Արտակ Գևորգյանին և առանց որևէ իրավական հիմնավորում ներկայացնելու, փողոցում բռնություն գործադրելով  նստեցրել են ոստիկանական մեքենան, փորձել են խլել նրանից հեռախոսը, բանալիները, վերցրել են մոտոցիկլետի սաղավարտը եւ տարել կենտրոնի ոստիկանություն, որտեղ  ինչպես պատմել է «Հետքին» Արտակ Գեւորգյանը, շարունակվել են բռնությունները:

Նրա խոսքով ոստիկանությունում իրեն արգելել են նստել, չեն արձակել ձեռնաշղթաները, խնդրանքին, որ դրանք թուլացնեն, ավելի են ձգել: Ոստիկանները  հարցրել են՝ նա՞ է փակցրել լուսանկարները փողոցում: Արտակ Գևորգյանը պատասխանել է՝ ոչ, իսկ հարցին, թե ո՞վ է փակցրել, նա հրաժարվել է պատասխանելուց:

3 ժամ ոստիկանական բաժանմունքում պահելուց  հետո Արտակ Գևորգյանն ազատ է արձակվել:

լուսանկարում՝ Արտակ Գևորգյանը