HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Մերի Մամյան

«Էլեմենտ բենդ». Լոս Անջելեսում հայկական երգը ներկայացնող խումբը

Լոս Անջելեսում 2005թ. կազմավորված հայկական  «էլեմենտ բենդ» (Element band) խումբն այս տարվա մարտին առաջին անգամ ելույթ է ունեցել նաև Երևանում: Խումբը ներկայացնում է հայկական ազգային երգեր՝ յուրօրինակ գործիքավորմամբ և կատարմամբ:

Տարիների ընթացքում խմբի կազմը փոխվել է` 6-9 անդամ: Այժմ Երևանում խումբը ներկայացնում են Արա Տապանճեանը և Սոսե Արամունին:  Խումբը թողարկել է 3 ձայնասկավառակ, աշխատում է 4-րդի վրա:  

«Գալիս մտածում էինք, թե ինչպես պետք է ընդունեն մեզ՝ արտասահմանից գալիս ենք, հայերեն ենք երգում», - ժպտալով ասում է խմբի մեներգչուհի Սոսեն:

«Բայց մեկ բան մը հստակ եղավ, որ նախ` նման երաժշտությունն ընդունելի է, երկրորդ՝ չէին լսած այսպիսի դասավորումներ, և շատ դրական էր արդյունքը», - հավելում է Արան:

Վերջինս «էլեմենտ բենդ»-ի հիմնադիրն է, նաև գրում է երաժշտություն և երգի բառեր: Բեմի վրա Արային կարելի է տեսնել մի քանի գործիք նվագելիս, սակայն այն հարցին, թե քանի գործիք է նվագում, Արան ժպտալով ասում է, որ «օր մը կհաշվի»:

Չնայած խմբի երգացանկի հիմնական մասը հայկական էթնիկ երգերի մշակումներն են, սակայն նրանք երգում են նաև 10 լեզուներով երգեր: Սրանք հիմնականում տվյալ ազգի էթնիկ երգերի մշակումներ են: Երգերի մշակումների ժամանակ խմբի անդամներն օգտագործում են տարբեր  երաժշտություններից առանձին մասնիկներ և դրանք միավորում «Էլեմենտ բենդի» երաժշտության մեջ: Այդ պատճառով էլ Սոսեն և Արան իրենց երաժշտությանը կոնկրետ ժանր չեն վերագրում, այլ այն անվանում են «world music» (աշխարհի երաժշտություն):

«Միշտ կշեշտեմ, որ հոգին ու շունչը շատ հայկական են, ինչ-որ մենք զգացած ենք և ինչ-որ մենք կզգանք: Այստեղ գալով` նույնիսկ կկրկնպատակվեն այդ զգացումները, որովհետև վերջապես հայրենքի մեջ կնվագենք», - ասում է Արան:

«Էլեմենտ բենդն» առիթ է ունեցել մի քանի անգամ ելույթ ունենալ Լոս Անջելեսի Հոլիվուդ բոուլ (Hollywood bowl) դահլիճում, որը տեղի ամենահայտնի և ամենամեծ դահլիճներից է: Այստեղ ժամանակին ելույթ են ունեցել «Բիթլզը», Ֆրենկ Սինատրան և այլ հայտնի երաժիշտներ: Արան ասում է, որ շատ ավելի հեշտ է իրենց երաժշտությունը լսելի դարձնել հայկական միջավայրում, որտեղ մարդիկ կարոտ են ազգային մշակույթին: Բայց խմբի նպատակն է, որ հայկական երգն ընդգրկի ավելի լայն լսարաններ: Դա է պատճառներից մեկը, որ իրենք տարբեր գործիքավորումներով են երգերը մշակում, որպեսզի այն ընդունելի լինի տարբեր նախասիրություններ ունեցող ունկնդիրների համար:

«Այդ մասն է, որ քիչ մը ավելի դժվար է, և հաջողած ենք շատ փոքր ձևով, բայց նորեն հպարտ ենք, որ այդքանն արած ենք: Դյուրին չէ, նորություն է հայկական երգը հանրային ձևով ուրիշ ազգերի ներկայացնել: Բայց անոր համար հպարտ ենք, որ մաս մը կա, որ մտիկ կընե մեզ, - ասում է Արան:  

Վերջինս համոզված է, որ մշակույթի և ազգապահպանության հիմքում երաժշտությունն է: Սոսեն հավելում է, որ երաժշտությամբ ավելի հեշտ է տարբեր մարդկանց ներկայանալ:  Երաժշտության դեպքում մարդը միայն լսում է, շատ ջանք չի գործադրում, ի տարբերություն, օրինակ՝ գրականության, որը պահանջում է լեզու սովորել: Սոսեն և Արան ուզում են, որ հայկական մշակույթը չվերանա սփյուռքի հայ երիտասարդների կյանքից. գուցե ոմանք հայերեն չեն խոսում, բայց գոնե հայկական երաժշտություն են լսում:

« Լոս Անջելեսի պես տեղում նյութական բաները ավելի կարևոր են, քան մշակույթը: Պետք է շեշտվի, որ ինչքան կարևոր է այս հարցը: Հուսամ, որ երաժշտությամբ գոնե մեր մասը կկատարենք»,- ասում է Արան: 

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter