Տեսանյութեր
Լուսանկարներ
Ոստիկանությունը բռնի ուժ կիրառեց հարյուրավոր քաղաքացիների վրա(լրացվող)
Առավոտյան` մոտավորապես 05:30-ին, ոստիկանությունը ջրցան մեքենայի միջոցով ցրեց էլեկտրաէներգիայի թանկացման դեմ նստացույցը, որը ամբողջ գիշեր տեղի էր ունենում Բաղրամյան փողոցում: Ցուցարարները, ջրցան մեքենայից փախչելով, հասան մինչև Ազատության հրապարակ: Ճանապարհին և Ազատության հրապարակում ոստիկանները բռնի ուժ կիրառեցին գրեթե բոլոր քաղաքացիների նկատմամբ:
Նստացույցի վերջին պահին Բաղրամյան փողոցում գտնվող 500-ից ավեի քաղաքացիներից մոտ կեսին, այդ թվում` լրագրողների, բերման ենթարկեցին ոստիկանություն:
06:44
«Հետքի» աղբյուրը հայտնում է, որ նստացույցի մասնակիցներն ու լրագրողները բերման են ենթարկվել ոստիկանության տարբեր բաժանմունքներ: Առայժմ մեզ հայտնի լրագրողների անուններն են՝ «Գալա» հեռուստաընկերության լրագրող Փայլակ Ֆահրադյանը, panarmenian.net-ի ֆոտոլրագրող Կարապետ Սահակյանը, news.am-ի լրագրող Արսեն Սարգսյանը (ում ֆոտոխցիկը ոստիկանները խլել են), Epress.am-ի օպերատոր Տիգրան Հակոբյանը, «Հետքի» լրագրողներ Անի Հովհաննիսյանը և Հրանտ Գալստյանը:
Մեզ հայտնեցին, որ ոստիկանության Կենտրոնի բաժանմունքում բռնի ուժ են կիրառում քաղաքացիների նկատմամբ: Այժմ քաղաքացիները գտնվում են ոստիկանության Կենտրոնի, Արաբկիրի, Էրեբունու, Մալաթիայի բաժանմունքներում:
07:20
Ինչպես հայտնում է նստացույցի մասնակիցներից Զարուհի Հարությունյանը, մեկ այլ մասնակից` Անտոն Իվչենկոն, այժմ հիվանդանոցում է, նրա ձեռքը վնասվել է. այժմ ռենտգեն են անում, որպեսզի նորից տանեն ոստիկանության բաժին, մոտ 120 հոգի այժմ ոստիկանության բաժանմունքներում են:
08:53
Ոստիկանության Մալաթիայի բաժանմունք բերման ենթարկված քաղաքացիներից մեկը (մոտ 35-40 տարեկան տղամարդ) կորցրել է գիտակցությունը, հազիվ է կարողանում քայլել և չի հիշում անուն-ազգանունը: «Հետքի» լրագրողը բաժանմունքի միջանցքում ոստիկաններին հարցրել է, թե ինչու շտապօգնություն չեն կանչում: Ոստիկանները պատասխանել են, որ քաղաքացին հրաժարվել է բժշկական օգնությունից: Նրան դեռ շարունակում են պահել բաժնում:
11:00
Ոստիկանության Մալաթիայի բաժանմունք բերման ենթարկված քաղաքացիներից մի քանիսին դեռ բաց չեն թողնում: Քիչ առաջ չորս քաղաքացու տարել են ալկոհոլի փորձաքննության:
«Հետքի» լրագրողը հայտնում է, որ քաղաքացիներից հեշտությամբ բաց են թողնում նրանց, ում այցելում են քաղաքացիական հագուստով ոստիկան ծանոթները:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանություններ (14)
Մեկնաբանել