HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Դատական ծախս բռնագանձելու մեխանիզմն անարգել աշխատում է, սակայն պետությունը «ձեռքերը լվանում է», երբ ընտանիքները մնում են առանց կերակրողի

«Արժեքների հեղափոխության» կամ «Շանթ Հարությունյան և ընկերներ» գործով դատապարտված քաղաքացիների հարազատները դիմել են «Հետքին»՝ տեղեկացնելով, որ դատական ծախսերը՝ 298.000 դրամի չափով՝ ներառյալ 5 տոկոս տուգանք, այսինքն՝ շուրջ 313.000 դրամ բռնագանձել են նույն գործով անցած Միսակ Առաքելյանից:

Մեզ հետ զրույցում Միսակ Առաքելյանը նշեց, որ երբ ցանկացել է հունիս ամսվա աշխատավարձը ստանալ բանկոմատից, չի կարողացել: Բանկից իրեն պատասխանել են, որ հաշվեհամարը կալանքի տակ է: Այնուհետև ԴԱՀԿ-ից բռնագանձել են դատական ծախսերը ու կալանքից հանել այդ գործով անցնող բոլոր քաղաքացիների, այդ թվում՝ Միսակ Առաքելյանի գույքը:

Փաստաբան Արա Զաքարյանը նշեց, որ դատական ծախսերը կիրառվել են համապարտության սկզբունքով, այսինքն՝ կարող էր պետությունը այդ գումարը բռնագանձել և՛ գործով մեղադրական դատավճռով դատապարտված ցանկացած անձից, և՛ յուրաքանչյուրից առանձին-առանձին: «Հետագայում այն քաղաքացին, ումից ամբողջությամբ բռնագանձել են ամբողջ գումարը, կարող է մյուսներից ստանալ մաս-մաս»,- ասաց փաստաբանը:

Սակայն Միսակ Առաքելյանն ասում է, որ իր ընկերներն այս պահին բանտերում են, չեն աշխատում, նրանց ընտանիքները սոցիալական վատ վիճակում են, շատերը խնամքին ունեն անչափահաս երեխաներ: «Հո ես չէի՞ թողնելու իրենց վրա գումարի բեռը… իմ ընկերները բանտում են»,- ասաց Միսակ Առաքելյանը:

Դատապարտյալների հարազատներն իրենց անհարմար են զգում, որ ֆինանսական հոգսը ծանրացել է Միսակ Առաքելյանի ուսերին: «1-2 ընտանիք է ընդամենը կարողացել վճարել Միսակին, բայց մյուսները սոցիալական դժվար վիճակում են, ընտանիքի միակ կերակրողները բանտերում են»,- ասում է 7 տարվա անազատության դատապարտված Վահե Մկրտչյանի կինը՝ Մարգարիտան, ով չի աշխատում ու խնամում է 2 մանկահասակ աղջիկներին:

4 տարվա անազատության դատապարտված, հանրային խորհրդի անդամ Հայկ Հարությունյանի մայրը՝ Լաուրա Պետրոսյանը, նշեց. «Գիտեմ, որ Միսակն է տուժել ֆինանսապես, նրա աշխատավարձից են բռնագանձել դատական ծախսերը: Բայց պետք է վճարել մարդուն, քանի որ ինքն էլ երկու երեխա է պահում, ընտանիք»: Տիկին Լաուրան տեղեկացրեց, որ դեռևս հունվարից իր անունով հաշվեհամար են բացել, մի քանի անգամ գումար են ստացել ու բաժանել քաղբանտարկյալների ընտանիքներին, բայց դրամական հոսքերը ակտիվ չեն: «Քաղբանտարկյալների ընտանիքները՝ թոշակառու ծնողները, աշխատանք չունեցող կանայք, 20 անչափահաս երեխաները օգնության կարիք ունեն»,- ասաց նա:

Դատական ծախսերը բռնագանձելու մեխանիզմը անարգել աշխատում է, մինչդեռ երբ խոսքը առանց կերակրողի մնացած անչափահասի մասին է, նույն պետությունը որևէ պարտավորություն չի կրում: Ստացվում է, որ Հայաստանի Հանրապետությունը, որը Սահմանադրությամբ հռչակված է որպես սոցիալական պետություն, չունի օրենսդրական որևէ նորմ, որը կկարգավորի ազատազրկման մեջ հայտնված քաղաքացու ընտանիքի սոցիալական վիճակը բարելավող պարտավորություն:

Փաստաբան Արա Զաքարյանը գտնում է, որ պետք է գործի օրենսդրական մեխանիզմ, որը թույլ կտա կարգավորել դատապարտյալների ընտանիքների սոցիալական խնդիրները: «Նախնական կալանքի տակ գտնվողների համար նման նորմ կա, բայց այն չի գործում: Այդ հիմքով նույն գործով միջնորդեցի, որ իմ պաշտպանյալների կալանքը փոխարինվի գրավով կամ, որ նրանց անչափահաս երեխաների խնամքի համար գումար տրամադրվի պետական բյուջեից: Դատավորի մերժման որոշման մեջ նշված էր, որ կարող են երեխաների խնամքը կազմակերպել մանկատներում, իսկ ծեր ծնողներինը՝ ծերանոցում: Իսկ դատապարտումից հետո պետությունն իսպառ լվանում է ձեռքերը»,- ասաց Արա Զաքարյանը:

Հ.Գ. Քաղբանտարկյալների ընտանիքներին օգնություն ցուցաբերելու համար քաղաքացիները կարող են փոխանցումներ կատարել.

ՀՀ-ից փոխանցումներ կատարելու համար` AMD 24100274635201 Լաուրա Պետրոսյան, «ՅՈՒՆԻԲԱՆԿ» ՓԲԸ:

Արտերկրից փոխանցումներ կատարելու համար՝ “Intermediary” Bank: Deutsche Bank Trust Company Americas, New York, SWIFT:BKTRUS33 Beneficiary’s bank: UNIBANK, Armenia, SWIFT: UNIJAM22 Beneficiary: Laura Petrosyan USD Account No: 24100274635202 For transfers in EUR: Intermediary Bank: Commerzbank AG, Frankfurt, SWIFT:COBADEFF Beneficiary’s bank: UNIBANK, Armenia, SWIFT: UNIJAM22 Beneficiary: Laura Petrosyan EUR Account No: 24100274635203

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter