HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Հեռահար բանկային ծառայությունները քիչ են օգտագործվում Հայաստանում, որոշ բանկերում խոցելի են

Օնլայն բանկինգ կամ հեռահար բանկային ծառայությունները Հայաստանի բանկային համակարգ մուտք են գործել վերջին տարիներին: Գրեթե բոլոր բանկերը մատուցում են այդ ծառայությունները՝ բացառությամբ  3-ի: Տարածվածությունը, սակայն, դեռևս շատ չէ:

Համաձայն «Ամերիաբանկի» կողմից իրականացրած ուսումնասիրության, որն այսօր ներկայացվեց թեմայի շուրջ կազմակերպված քննարկմանը, 2013թվականին բնակչության ընդամենը 1.3 % -ն է օգտվել օնլայն բանկինգից, 2014-ին՝ 2%-ը: Մինչդեռ Իսլանդիայի բնկաչության 91 %-ն արդեն օգտվում է հեռահար բանկային ծառայություններից: Իսլանդիան աշխարհում այս ցուցանիշով առաջին հորիզոնականն է զբաղեցնում:

«Ամերիաբանկի» ֆիզիկական անձանց հաճախորդների 17.5% երբևէ օգտվել է օնլայն բանկինգից, 3%-ն է ընդամենը մշտապես օգտագործում այն: Իրավաբանական անձինք ավելի ակտիվ են օգտվում օնլայն բանկինգինց:

Ուսումնասիրությունը ցույց է տվել, որ ՀՀ քաղաքներից Երևանի բնակչությունն է ակտիվ օնլայն բանկինգից օգտվում: Առավել պասիվ քաղաքներից է Վանաձորը, որտեղ օնլայն բանկինգի ծառայությունները մեծ հետաքրքրություն չեն ներկայացնում:

Ոլորտի մասնագետները նշեցին, որ օնլայն բանկինգի օգտագործումը զուգահեռ է սմարթֆոնների օգտագործմանը: Չնայած վիճակագրությունն ասում է, որ բնակչության 29% ունի սմարտֆոն, բայց միայն կեսն է օգտվում հավելվածներից:

ՀՀ Կենտրոնական բանկի Խորհրդի անդամ Վախթանգ Աբրահամյանը նշում է, որ պետք է հաշվի առնել այն հանգամանքը, որ բանկային հաճախորդներն էլ սերնդափոխություն են ապրում: Եթե նախորդ սերունդը ավելի հակված էր ավանդական բանկային ծառայություններին և բանկ այցելություններին, ապա, օրինակ, Մեծ Բրիտանիայում, 2000թ.-ից հետո ծնվածների 40% երբեք չի այցելել բանկ և չի այցելի:  

HSBC բանկի բանկային մանրածախ ու ծառայությունների դեպարտամենտի տնօրեն Միհրան Մուրադյանի կարծիքով, բանկային գործունեության ապագայի զարգացումը գնալու է դեպի թվային տեխնոլոգիաների օգտագործում: Մասնագետը օրինակ է բերում Սինգապուրը, որտեղ մասնաճյուղերում ընդհանրապես մարդկային ռեսուրս չի օգտագործվում: Այն ամբողջովին թվային է: «Ինչ վերաբերում է Հայաստանին, HSBC-ի ռազմավարական ուղղություններից մեկը թվային տեխնոլոգիաների ներդրումն է մեր հաճախորդների համար: Մեր կարծիքով, սա բանկային գործի ապագան է»,-նշեց Միհրան Մուրադյանը:

HSBC բանկի բանկային մանրածախ ու ծառայությունների դեպարտամենտի տնօրենի կարծիքով, օնլայն բանկինգը պետք է լինի ինտեգրված ամբողջական համակարգ, որը հասանելի լինի բոլորին:

Օնլայն բանկինգի անվտանգության առումով անկախ փորձագետ Սամվել Մարտիրոսյանի ուսումնասիրությունները ցույց են տվել, որ հայաստանի բանկերից հինգը (անուններ չնշեց-հեղ.) շատ լուրջ խոցելիություն ունի: Հաճախորդը լուրջ վտանգի կենթարկվի, որովհետև այդ բանկերը չեն տրամադրում պաշտպանված կապ:

Փորձագետը նաև նշում, որ հարձակման համար դեռևս մեծ շուկա չկա. «Մենք դեռ հետաքրքիր չենք լուրջ ցանցային հանցագործների համար»: Սակայն շուկան մեծանալու է, զուգահեռաբար կհայտնվեն նաև հանցագործները: Հետևաբար, բնակչության անգրագիտությունն այս ոլորտում ամենամեծ խնդիրն է: Իսկ այսօր օգտվողները կրթվելու տեղ չունեն: Հիմանականում ընկերների միջոցով են կրթվում:

Սամվել Մարտիրոսյանը, բերելով իր կումունալ վճարումների օրինակը, նշեց, որ ռիսկերը նաև հոգեբանական են, քանզի բանկը լրիվ այլ թիվ էր տրամադրել, arca համակարգը՝ այլ: Այդ տարբերության պատճառով ավելի քիչ վճարում էր կատարել, ինչի հետևանքով կարող էր իր կոմունալ ծառայություն դադարեցվել:

Բացի դրանից, ըստ Սամվել Մարտիրոսյանի, գրեթե բոլոր բանկերի օնլան բանկինգի ինտերֆեյսը գրված է հաշվապահի համար, և եթե սովորական հաճախորդը հաշվապահ չէ և փորձում է օգտվել օնլայն բանկինգի ծառայություններից, հասկանալը շատ բարդ է. «Բանկերը օնլայն բանկինգին վերաբերվում են ուրիշ կերպ, քան պետք է: Այսինքն՝ չեն նայում հաճախորդի աչքերով, այլ նայում են, որ շատ լավ համակարգ է և թույն աշխատում է»,-ասում է Ս. Մարտիրոսյանը: 

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter