![](/static/articles/06/40/82/l-o4HRqFQP71.jpg)
Եվրոպական միության նոր ծրագիրը Հայաստանում. «Մշակույթ և ստեղծարարություն»
Դեկտեմբերի 4-ին 10.00-ին Գաֆէսճեան արվեստի կենտրոնի «Խանջյան» սրահում տեղի կունենա Հայաստանում Եվրոպական Միության՝ Արևելյան գործընկերության «Մշակույթ և ստեղծարարություն» ծրագրի պաշտոնական մեկնարկը: Բացման խոսքով հանդես կգան ՀՀ Մշակույթի նախարար Հասմիկ Պողոսյանը, Հայաստանում Եվրոպական Միության պատվիրակության ղեկավար Պյոտր Անտոնի Սվիտալսկին և Բրիտանական խորհրդի հայաստանյան մասնաճյուղի ղեկավար Արևիկ Սարիբեկյանը: Այս մասին տեղեկացնում է Բրիտանական խորհուրդը. «Մշակույթն ու ստեղծարարությունը որպես եկամտի աղբյուր
Եթե Մեծ Բրիտանիայում մշակույթի և ստեղծարարության ոլորտները դարձել են ժամն ավելի քան 11մլն եվրո շահույթի աղբյուր, ապա Հայաստանում այս բնագավառները կայանալու ճանապարհին են: Եվրոպական Միության՝ Արևելյան գործընկերության «Մշակույթ և ստեղծարարություն» ծրագրի նպատակն է աջակցել այս ոլորտներում քաղաքականության մշակմանը և ներուժի հզորացմանը:
Մշակույթի և ստեղծարարության ոլորտներն ապահովում են համաշխարհային համախառն ներքին արդյունքի յոթ տոկոսը: Այս բնագավառները զարգանում են ավելի արագ, քան արտադրության և սպասարկման ոլորտները:
Մշակույթը և ստեղծարար ենթաոլորտները ներառում են ճարտարապետությունը, արխիվները, գրադարաններն ու թանգարանները, աուդիո-վիզուալ միջոցները (ֆիլմ, հեռուստատեսություն, տեսախաղեր և մուլտիմեդիա), նյութական և ոչ նյութական մշակութային ժառանգությունը, զարդանկարչությունը, փառատոները, երաժշտությունը, գրականությունը, կատարողական արվեստները, հրատարակչությունը, ռադիոն և վիզուալ արվեստները: Եվրամիության երկրներում այս բնագավառներում աշխատում են ամենամեծ թվով երիտասարդները`դառնալով երրորդ խոշորագույն գործատուն:
Եվրոպական Միության՝ Արևելյան գործընկերության մշակույթի և ստեղծարարության ծրագիրը մեկնարկել է 2015 թվականին՝ Հայաստանում, Ուկրաինայում, Վրաստանում, Բելառուսում, Մոլդովայում և Ադրբեջանում: Թեև ծրագիրը տարածաշրջանային է, սակայն յուրաքանչյուր երկրում այն կիրականացվի` հաշվի առնելով տեղային առանձնահատկությունները: Ծրագրի տևողությունը երեք տարի է, իսկ բյուջեն կազմում է 4,2 մլն. եվրո:
Ծրագրի իրականացման ընթացքում կկազմակերպվեն աշխատաժողովներ, դասընթացներ, առցանց ուսուցման հարթակներ և ճանաչողական այցեր` համախմբելով հանրային ու մասնավոր դերակատարներին, կառավարությանը և քաղաքացիական հասարակությանը:
Ծրագիրը կառավարում է Բրիտանական խորհրդի կողմից գլխավորվող կոնսորցիումը՝ համագործակցելով Մոլդովայի Սորոսի հիմնադրամի, Լեհաստանի մշակույթի ազգային կենտրոնի և Գյոթե ինստիտուտի հետ: Ծրագիրը հիմնված է Արևելյան գործընկերության մշակութային I ծրագրի (2011-2014) վրա, որը բաղկացած է տեխնիկական աջակցության և դրամաշնորհային եղանակով ֆինանսավորվող ծրագրերից»:
Մեկնաբանել