Շարունակվեց օֆշորի գործով դատական նիստը

«Ինձնից խորհուրդ են հարցրել, ես էլ խորհուրդ եմ տվել, որ պետք չէ Աֆրիկայից վախենալ, կարելի է ստեղծել բժիշկների, երկրաբանների խումբ, օֆիսներ վարձակալել և հումք գնել»,- Էրեբունի եւ Նուբարաշեն վարչական շրջանների ընդհանուր իրավասության դատարանում այսօր հայտարարեց Կիպրոսի օֆշորի գործով միակ մեղադրյալ, նախկին ադամանդագործ Աշոտ Սուքիասյանը:

Այսօր այդ գործով հերթական դատական նիստն էր: Ամբաստանյալ Աշոտ Սուքիասյանը պատասխանեց մեղադրյալի և տուժողի ներկայացուցչի հարցերին:

Մեղադրող Դավիթ Վեքիլյանը հարցեր ուղղեց ամբաստանյալին՝ հստակեցնելու, թե ի՞նչ կազմակերպությունների հետ է նա առնչվել Աֆրիկայում, Կիպրոսում և ինչպես՞ է նրանց հետ սկսել իր համագործակցությունը՝ «Ձորագյուղ» ԱԿ-ի միջոցով:

«Ձորագյուղ» ԱԿ-ի միջոցով պիտի ներդրումներ կատարեի և Աֆրիկայից ամբողջ հումքը պետք է գար «Ձորագյուղ», որը պիտի վաճառեի, ամենքին իրենց հասանելիք մասնաբաժինները,  գումարը ուղարկեի»,- պատասխանեց ամբաստանյալը:

Տուժողի ներկայացուցիչ Շալիկո Փիրուզյանը հետաքրքրվեց, թե ադամանդագործության վերաբերյալ Էկոնոմիկայի նախարարությունում տեղի ունեցած ժողովի ժամանակ քանի՞ մասնագետ է ներկա գտնվել, ո՞վ է կազակերպել հանդիպումը և ի՞նչ նպատակի համար, ինչո՞ւ են իրեն հրավիրել:

Ամբաստանյալը պատասխանեց. «Ներկա էին միջինը տասը հոգի, բոլորին հարցնում էին` ինչ խորհուրդ կտաք, ինչպես ոտքի կանգնեցնենք ադամանդագործությունը: Ես մինչև ժողովն արդեն հումք բերել էի, դրա մասին ժողովի մասնակիցները գիտեին: Ես խորհուրդ եմ տվել՝ ոնց աշխատեն, ես ոչ աշխատանքի կարիք ունեի, ոչ աշխատողների կարիք ունեի, ոչ էլ ժողովին մասնակցելու նպատակ ունեի: Ինձ խնդրել են, որպեսզի ներկա լինեմ: Ես առաջարկել եմ խումբ կազմել և ամեն մեկն իր ներկայացուցչի  հետ գնա գրասենյակներ բացի: Ժողովից հետո Փայլակ Հայրապետյանն ասաց՝ դու ոչ մեկի կարիքը չունես, ես ամեն ինչ կտրամադրեմ»:

Տուժողի ներկայացուցիչը նաև հետաքրքրվեց` արդյոք ամբաստանյալը ժողովի մասնակիցներին հանքերից բերված ադամանդի հումք է ներկայացրել: Ամբաստանյալը պատասխանեց, որ հումքի տուփը ինքը բացել է, երբ օֆիսում միայն ինքն է եղել, ինքն իրեն ցուցադրելու կարիք չի ունեցել:

Նիստը նախագահող դատավոր Վարդան Գրիգորյանն ասաց, որ ամբաստանյալի գործում առկա փաստաթղթերում միայն երկու անգամ է հիշատակել Հայաստան հումք բերելու մասին. «Ընդամենը երկու անգամ եմ հանդիպել նշում, որտեղ նշված է ադամանդի հումք: Եթե երկու անգամ է, դուք ցանկացած բառի մեջ օգտագործում եք հումք էի բերում արտահայտությունը: Այնպես է ստացվում, որ շաբաթը երեք անգամ դուք հու՞մք էիք բերում»:

Աշոտ Սուքիասյանը պատասխանեց, որ բերված հումքը քիչ չի եղել, վերջին անգամ բերվել է 2009-ի դեկտեմբերին, իսկ հետո վարկ է վերցրել: Ապա ավելացրեց, որ  Աֆրիկա ամեն ամիս գնալ և հումք բերելը խաղ ու պար չէ:

Ամբաստանյալի նկատմամբ մեղադրանք է առաջադրվել խարդախությամբ ուրիշի առանձնապես խոշոր չափերով գույքի նկատմամբ իրավունք ձեռք բերելու, հանցավոր ճանապարհով ստացված առանձնապես խոշոր չափերով եկամուտները օրինականացնելու, չարամտորեն առանձնապես խոշոր չափերով հարկեր, տուրքեր և պարտադիր այլ վճարումներ կատարելուց խուսափելու համար:

Հիշեցնենք, որ թեև Փայլակ Հայրապետյանը բազմիցս նշել է իր ունեզրկման մեղավորների անունները, այդուհանդերձ, գործով միակ մեղադրյալը Աշոտ Սուքիասյանն է։

Հաջորդ դատական նիստին ամբաստանյալը կշարունակի պատասխանել տուժողի հարցերին: Նիստը տեղի կունենա մայիսի 5-ին: