Այսօր ՊՊԾ գնդի տարածքում կրծքավանդակի հրազենային վնասվածք ստացած «Սասնա ծռեր» խմբի անդամ Սեդրակ Նազարյանի համագյուղացիներն ու հարազատները քարերով, ավտոմեքենաներով փակել են նրա հայրենի գյուղի՝ Սպանդարյանի ճանապարհը։

«Հետք»­ի զրուցակից Վահագն Գրիգորյանը հաղորդում է, որ արդեն մեկ ժամ է սպանդարյանցիները փակել են ճանապարհը՝ որպես բողոքի նշան։ Ըստ նրա՝ ավտոմեքենաների շարասյունը ձգվում է մի քանի կիլոմետր։

Ճանապարհին դրվել են քարեր, որոնք, ըստ Գրիգորյանի, կարծես ճանապարհից հեռացրել են, սակայն մեքենաները դեռևս չեն կարողանում առաջանալ։ Սպանդարյանցիները բարկացած են.«Ասում էին՝ թող գնան սահմանի թուրք խփեն»,­-պատմում է Գրիգորյանը։ 

Այս պահին այնտեղ է նաև Սյունիքի մարզպետ Սուրիկ Խաչատրյանը և մի շարք բարձրաստիճան ոստիկաններ։ Ս․ Խաչատրյանը սպանդարյանցիներին հորդորում է բացել ճանապարհը՝ ասելով, որ երբ երեք օրից վիրահատությունը վերջանա, Սեդրակին կբերի գյուղ։ Սակայն սպանդարյանցիները որևէ կերպ համաձայնության չեն գալիս ու չեն բացում միջպետական ճանապարհը։

լուսանկարները՝ Վահագն Գրիգորյանի ֆեյսբուքյան էջից