Արմավիրի մարզում հրատապ ծրագրեր իրականացնող կապալառու կազմակերպությունների վերադասավորում է տեղի ունեցել: Եթե նախորդ տարիներին մինչ մրցույթի անցկացումը հանգիստ կարելի էր գուշակել, թե կոնկրետ տարածքի շինաշխատանքների իրականացման համար մարզպետարանը որ ընկերության հետ է պետական գնման պայմանագիր կնքելու, ապա 2015-ին իրավիճակը փոքր-ինչ փոխվել է: Ի հայտ են եկել նոր ընկերություններ:

Առաջնահերթ  լուծում  պահանջող  խնդիրների  լուծման  նպատակով  ՀՀ կառավարությունը  2015թ. Արմավիրի  մարզպետարանին հատկացրել է  603,900,000 դրամ  շենքերի  ու  շինությունների  շինարարության և 174,850,000 դրամ՝  այլ դրամաշնորհների  և  համայնքներին  ընթացիկ  ու կապիտալ  սուբվենցիաների համար:

Ինչպես նախորդ տարիներին, բոլոր կապալառու կազմակերպություններն ընտրվել են բանակցային ընթացակարգով՝ առանց նախապես հայտարարություն տարածելու: Այդպես է որոշել կառավարությունը: Ինչպես տեղեկացնում են մարզպետարանից, 2015թ. նախատեսված բոլոր աշխատանքներն ավարտվել են:

Մանվել Գրիգորյանի ընկերությունը՝ պետական գնումների մասնակից

Էջմիածնի թիվ 2 հատուկ դպրոցը վերանորոգել է պաշտոնաթող գեներալ, ԱԺ պատգամավոր Մանվել Գրիգորյանին պատկանող «Արա և Այծեմնիկ» ԲԲԸ-ն: Պայմանագրի ընդհանուր արժեքը կազմել է 33 միլիոն դրամ: Դպրոցը վերանորոգվում է փուլային եղանակով: «Արա և Այծեմնիկ» ընկերությունը նույն դպրոցում 47 մլն 780 հազար դրամի շինաշխատանքներ էր իրականացրել նաև 2014-ին:

Սա 2015թ. միակ օբյեկտն է եղել, որտեղ շինարարական աշխատանքներն իրականացրել է պատգամավորի ընկերությունը:

Գազի գրասենյակի պետի ընկերությունը՝ գազիֆիկացման ծրագրերում

«Գազպրոմ Արմենիա» ՓԲԸ-ի Արմավիրի գազիֆիկացման և գազամատակարարման մասնաճյուղի տնօրեն Սաշա Մկրտչյանի որդու և եղբորորդու ընկերությունը՝ «Արմեն և Դավիթ Մկրտչյաններ» ՍՊԸ-ն, 2015թ. հրատապ ծրագրով իրականացրել է մարզի Նորապատ և Լեռնագոգ համայնքների գազիֆիկացման աշխատանքները: Պայմանագրով Լեռնագոգ համայնքի գազիֆիկացման աշխատանքներն արժեցել է 8 մլն 300 հազար դրամ, իսկ Նորապատինը՝ 5 մլն դրամ:

Նշենք, որ «Արմեն և Դավիթ Մկրտչյաններ» ՍՊԸ-ն համեմատաբար նոր ընկերություն է պետական գնումների ոլորտում: Հիմնադրվել է 2012թ.: Ընկերությունը 50/50 բաժնեմասով պատկանում է Սաշա Մկրտչյանի որդուն՝ 28-ամյա Դավիթ Մկրտչյանին և եղբորորդուն՝ Արմեն Մկրտչյանին: Վերջինս «Գազպրոմի» Էջմիածնի գրասենյակի պետն է: Իսկ ընկերության տնօրենը Արմեն Մկրտչյանի հորաքրոջ որդին է՝ Կարեն Քոչարյանը:

Նշենք, որ ընկերությունը 2013թ. էլ իրականացրել է մարզի Փարաքար, Ջանֆիդա, Բերքաշատ համայնքների և Դողս համայնքի դպրոցի գազիֆիկացման աշխատանքները, որի համար պետբյուջեից հատկացվել է մոտ 50 մլն դրամ:

«Բաղրամյանին» ԲԲԸ-ն պահպանում է առաջնային դիրքը

Արմավիրի մարզում պետգնումներում «լիդերի» դերը շարունակում է պահպանել իշխանությունների հետ կապեր ունեցող Գագիկ Վարդանյանի «Բաղրամյանին» ԲԲԸ-ն: Այս ընկերությունը խոշոր ծրագրեր է իրականացնում ոչ միայն Արմավիրի մարզում:

Ընկերությունը մարզում 2015թ. կառուցել է Արմավիրի նախկին տարածաշրջանի Արաքս և Զարթոնք համայնքների միջնակարգ դպրոցների լոկալ ջեռուցման համակարգերը՝ համապատասխանաբար 33 մլն 300 և 42 միլիոն դրամ պայմանագրային արժեքով:

«Բաղրամյանին»-ը 20 մլն դրամով իրականացրել է Հուշակերտ գյուղի համայնքային շենքի վերանորոգման աշխատանքները: 20 մլն 770 հազար դրամով վերանորոգել է նաև Մեծամոր քաղաքի թիվ 1 հիմնական դպրոցը:

 Մոտ 119 մլն դրամի շինաշխատանքներ՝ «Իմպերիալ Տուր»-ին

էջմիածնեցի Գագիկ Բիշարյանին պատկանող «Իմպերիալ Տուր» ՍՊԸ-ն ևս չի զիջել դիրքերը: Գ. Բիշարյանը լավ հարաբերություններ ունի Մանվել Գրիգորյանի և Արմավիրի մարզպետ Աշոտ Ղահրամանյանի հետ և կենտրոնացած է հիմնականում Էջմիածնի տարածքում: Խոսակցություններ են շրջանառվում, թե Գագիկ Բիշարյանը ազգակցական հարաբերություններ ունի նաև ԱԺ պատգամավոր Հեղինե Բիշարյանի հետ:

«Իմպերիալ Տուր» ՍՊԸ-ին է վստահվել Էջմիածին քաղաքի Մաշտոցի 22 բազմաբնակարան շենքի տանիքի վերանորոգումը, որն արժեցել է 34 մլն դրամ: Իսկ 42 մլն 500 հազար դրամով վերանորոգել է Արմավիր քաղաքի Մաշտոցի 3Բ և Սայաթ-Նովա 23 հասցեների բազմաբնակարան շենքերի տանիքները: 9 մլն 345 հազար դրամով վերանորոգել է թիվ 12 հիմնական դպրոցը:

«Իմպերիալ Տուր»-ը վերանորոգել է նաև Էջմիածնի թիվ 8 հիմնական դպրոցի, քաղաքի հիվանդանոցի տանիքները, համապատասխանաբար՝ 31 մլն 250 հազար և 18 մլն 900 հազար դրամ արժեքով:

Եթե «Իմպերիալ Տուր» ՍՊԸ-ն 2014թ. Արմավիրի մարզպետարանի հետ կնքել էր 124 մլն դրամի պայմանագրեր, ապա 2015-ին՝ 118 մլն 985 հազար դրամի:

«Միլաքս Գրուպ» ՓԲԸ-ն «նահանջում է»

Արմավիրի մարզպետ Աշոտ Ղահրամանյանի ընկերոջ՝ Միսակ Տեր-Պողոսյանի ընտանիքին պատկանող «Միլաքս Գրուպ» ՓԲԸ-ն 2015թ. հրատապ ծրագրերով վերանորոգել է միայն Մարգարա գյուղի միջնակարգ դպրոցի մարզադահլիճը: Աշխատանքների իրականացման պայմանագրային արժեքը կազմել է 28 մլն 140 հազար դրամ:

Համեմատության համար նշենք, որ 2014թ. առաջնահերթ լուծում պահանջող ծրագրերով Արմավիրի մարզպետարանը «Միլաքս Գրուպ» ՓԲԸ-ի հետ կնքել է մոտ 124 մլն դրամի պայմանագիր:

Նախորդ տարիներին «Միլաքս Գրուպ»-ը ևս ակտիվորեն ներգրավված է եղել մարզի շինարարական ծրագրերում, սակայն 2015-ին ակնհայտորեն նահահջել է և դուրս մնացել պետական գնումներից: