Բնապահպանության նախարարությունը քիչ առաջ հայտարարություն է տարածել՝ անդրադառնալով «Հետքի» Գոգոլի փողոցի «բեսեդկայում» պահվող Կարմիր գրքում գրանցված գորշ արջի քոթոթին:  Նախարարությունը նշել է. «Բնապահպանական պետական տեսչության Երևանի տարածքային բաժնի տեսուչներն ահազանգի հետքերով նույն օրն այցելել են վերը նշված հասցե, սակայն քոթոթին այնտեղ չեն հայտնաբերել:

Ըստ քաղաքացիների բանավոր հայտարարության՝ կենդանին տեղափոխվել էր  Երևանի Սևանի փ. 17 հասցե: Սակայն նշված հասցեում ևս տեսուչները չեն հայտնաբերել արջի քոթոթին:

Համացանցային հրապարակումից երևում է, որ կենդանու նկատմամբ դրսևորվել է դաժան վերաբերմունք («Վարչական իրավախախտումների  վերաբերյալ» ՀՀ օրենսգրքի 92-րդ հոդված), ուստի ՀՀ  բնապահպանության նախարարության աշխատակազմի բնապահպանական պետական տեսչությունը դիմել է ՀՀ ոստիկանության Երևան քաղաքի վարչության պետ, գնդապետ պարոն Ս. Մարտիրոսյանին՝ ձեռնարկելու  համապատասխան միջոցներ վայրի կենդանուն հայտնաբերելու և դրա ճակատագիրը տնօրինելու նպատակով»:

Հ.Գ. «Հետքի» հրապարակման մեջ նշել ենք, թե ով է արջի «սեփականատերը»: Եթե նախարարությունը չի կարողանում գտնել տիրոջը, ապա կարող են զանգահարել «Հետքի» խմբագրություն, մենք նրանց կտրամադրենք տիրոջ հեռախոսահամարը և նրա բնակության հասցեն: