Մեր գործընկերներն ու տնտեսագետներն արդեն ներկայացրել են տնտեսական աճի տեմպերը Հովիկ Աբրահամյանի վարչապետության օրոք.  գրանցվել են ոչ բարձր արդյունքներ։ Սակայն նկատենք, որ աճի տեմպերի կտրուկ նվազում է գրանցվել մինչև նրա պաշտոնավարումը՝ 2013 թվականին։ Մանավորապես, եթե 2012  թվականին աճը կազմել է 7.2%, ապա՝ 2013-ին կիսով չափ պակաս՝ 3.3%:

Հ. Աբրահամյանի պաշտոնավարման ընթացքում տնտեսական աճի տեմպերը չարագացան։ Ավելին՝ 2015-ի ցուցանիշն ամենացածրն էր վերջին հինգ տարում։ 2014-ին, ըստ ՀՀ ԱՎԾ տվյալների, տնտեսական աճը կազմել է  3.5%,  2015-ին՝ ընդամենը 3%: 

Այս ընթացքում կառավարությանն այդպես էլ չհաջողվեց աշխուժացնել արդյունաբերությունը։ Չնայած, որ 2014-ին այն գրանցեց 2.7% աճ, մասնավորապես մշակող արդյունաբերության աճը կազմեց 6.1%, իսկ հանքարդյունաբերությունը 7.4%-ով անկում ապրեց, սակայն հաջորդող տարում մշակող արդյունաբերությունը նորից անկում գրանցեց։ 2015-ին ամբողջ արդյունաբերության աճը կազմեց 5.2%, բայց այն բացառապես պայմանավորված էր հանքարդյունաբերության 50.4%-ով, իսկ մշակող արդյունաբերությունը շարունակեց մնալ  մեռյալ վիճակում՝ գրանցելով 5.6% նվազում։ Թեև այս տարվա առաջին առաջին յոթ ամիսներին արդյունաբերության ծավալներն աճել են 7.9%-ով, սակայն դրան նորից գլխավորապես նպաստել է հանքարդյունաբերությունը (19% աճով), որի աճը ժամանակավոր է և էական ոչ մի զարգացում չի բերում ընդհանուր արդյունաբերությանը։ Իսկ մշակող արդյունաբերությունն այս տարի աճել է  3.5%-ով, բայց այստեղ էլ աճը հարաբերական է, քանի որ այն գրանցվել է ընդամենը 3-4 ճյուղերի շնորհիվ։

Հովիկ Աբրահամյանի պաշտոնավարման ընթացքում դրական ցուցանիշներ են գրանցվել գյուղատնտեսության ոլորտում, որն էլ մեծապես ազդել է ընդհանուր տնտեսական աճի վրա։ 2014-ին այս ոլորտում գրանցվել է 7.2% աճ, իսկ 2015-ին՝ 11.7%: Այս տարի աճի տեմպերը դանդաղել են։ Հունվար-հուլիսին այն կազմել է ընդամենը 1.3%: 

Այս ընթացքում շինարարության  ոլորտը շարունակել է մնալ լճացած վիճակում: Ներքին առևտրաշրջանառությունը ևս բացասական ցուցանիշներ է գրանցում 2015-ից։ Փոխարենն աճել է ծառայությունների ընդհանուր ծավալը։ Առավել մանրամասն՝ ինֆոգրաֆիկայում։ 

 Աբրահամյանի պաշտանավարման առաջին տարում արտահանումն Հայաստանից աճեց 2.7%-ով, ներմուծումը՝ 0.4%-ով։ Հաջորդող տարում երկու ուղղություններով էլ անկում գրանցվեց։ Արտահանումը նվազեց 3.9%-ով, ներմուծումը՝ 26.5%-ով։ 

Ցանկության դեպքում կարելի է ևս տասնյակ ցուցանիշներ ներկայացնել, թե ինչպիսի փոփոխությունների է ենթարկվել Հայաստանի տնտեսությունը Հովիկ Աբրահամյանի վերչապետության օրոք։  Բայց լավագույն ցուցանիշը յուրաքանչյուր քաղաքացու կյանքն է ու առօրյան՝ արդյո՞ք այն ավելի բարեկեցիկ է դարձել վերջին երկու տարում …