«Վահագն Չախալյան քաղաքական գործիչ ես չեմ ճանաչում, և ընդհանրապես Վահագն Չախալյանի գործունեությունը ես չեմ տեսել»,- այսօր՝ լրագրողների հետ հանդիպման ժամանակ, հայտարարեց Ազգային ժողողի ՀՀԿ-ական պատգամավոր Հայկ Սանոսյանը:

Ըստ նրա՝ Վ. Չախալյանը չի արել ոչ ազգանվեր, ոչ էլ հակավրացական քայլ: Պարզապես Վարդերի հեղափոխությունից հետո նա մեկ վարդով «մտել է իրենց գյուղի կոլխոզի նախագահի մոտ» և պահանջել հեռանալ: Պատգամավորի կարծիքով՝ այդ է պատճառը, որ Վ. Չախալյանին դարձրել են «քաղաքական թիրախ»: Պատգամավորը լուրջ գործունեություն չի տեսել Չախալյանի կողմից, իսկ թե ինչու է Չախալյանն արդեն 3,5 տարի բանտարկված, պետք է հարցնել վրացական իշխանություններին:

Օրերս Հայկ Սանոսյանը հայտարարել էր, որ ինքը դեմ է քվեարկելու 2012թ. բյուջեի նախագծին՝ պատճառաբանելով, որ նախագիծն անտեսում է Ջավախքի հիմնահարցերը: Այսօր լրագրողը նշեց, որ ԱԺ պատգամավոր Շիրակ Թորոսյանն, այդ հայտարարությանն ի պատասխան, նշել է, որ Հայաստանի բյուջեն չի կարող մեծ հատկացումներ անել Ջավախքին, որովհետև դրան դիմադրում է Վրաստանը:

Բացի դրանից՝ Հ. Սանոսյանին քննադատում են, որ մինչ այդ նա չի զբաղվել Ջավախքի խնդիրներով, և միայն հիմա է այդ հարցը բարձրացնում:

Այս ամենին ի պատասխան՝ Հ. Սանոսյանը խնդրեց հայտնել պարոն Թորոսյանին, որ իրենք արդեն 40 տարեկան են, և հիմա չէ, որ պետք է մտածեն դիվիդենտներ ձեռք բերելու մասին:

«Ես իմ ժողովրդի մոտ դիվիդենտներ ձեռք եմ բերել 10 տարեկանից: Էդ հասակից ես Ջավախքի ժողովրդի շահերը պաշտպանել եմ Վրաստանի տարբեր քաղաքներում շախմատային պարտիաներով և ֆուտբոլային սպորտաձևով: Էն ժամանակվանից եմ սկսել դիվիդենտներ ձեռք բերել: Ամբողջ կյանքիս ընթացքում ես միշտ պաշտպանել եմ իմ ժողովրդի շահերը տարբեր երկրներում: Ի տարբերություն այդ մարդու (Շիրակ Թորոսյանի – հեղ.)՝ ես ոչ մի կենտրոնից չեմ ղեկավարվում: Ես ցույց եմ տալիս իմ ժողովրդին, որ ես իրանց կողքին եմ, էսօր իմ ժողովրդի մատից փուշ հանողն եմ ես»,- հայտարարեց պատգամավորը:

Նրա խոսքերով՝ ինքը, իր եղբայրները և ընտանիքի մյուս անդամներն իրենց գործունեությունը ծավալել, իսկ բիզնեսը ներդրել են Ջավախքում, և դա հայտնի է ողջ հանրությանը:

Բյուջեի հատկացումների մասով նա նշեց, որ ցանկացած պետություն կցանկանա ունենալ լրացուցիչ ֆինանսներ, և շահագրգռված է դրանում: Վրացական կողմի դիմադրության մասին խոսակցություններն էլ Սանոսյանը «անհեթեթություն» է համարում:

Այն հարցին, թե ի վերջո կո՞ղմ, թե՞ դեմ է քվեարկելու 2012թ. բյուջեի նախագծին, պատգամավորը պատասխանեց, որ «օրը կգա, կերևա», որովհետև գուցե մինչ այդ ինչ-որ բան փոխվի: