ՎիվաՍել-ՄՏՍ-ը տարակուսած է «Հետք» ինտերնետային թերթի հրապարակած՝ «Վիվասելը 1000 դրամ չունի՞» հոդվածի առնչությամբ: Մասնավորապես, թերթի կողմից հղված լրագրողական հարցման վերաբերյալ (Սիփանիկ գյուղում ծանր պայմաններում բնակվող ընտանիքին 1000 դրամի տեսքով աջակցություն ցուցաբերելու մասին) ընկերության հասարակայնության հետ կապերի բաժնի պատասխանատուի արձագանքի խեղաթյուրման առնչությամբ:

Ընկերությունը հուսով է, որ հրապարակման մեջ տեղ գտած՝ կազմակերպության բարի համբավը վարկաբեկող անճշտությունները չեն կրում միտումնավոր բնույթ և ընդամենը թյուրըմբռնման, կազմակերպության աշխատաոճին անիրազեկ լինելու, ինչպես նաև մարդասիրական ծրագրերի իրագործման նպատակով կազմակերպություններից ոչ ճիշտ մոտեցմամբ գումար հավաքագրելու արդյունք են:

Ընկերությունն իր աշխատակցի մակարդակով չի կարող անմիջապես արձագանքել աջակցության որևէ կոչի: Գումարային ներդրում պահանջող ցանկացած ծրագիր ենթադրում է որոշումների կայացում՝ կազմակերպության համապատասխան օղակներում, ինչի մասին թերթի ներկայացուցիչը տեղեկացվել է:

Որպես Հայաստանում կորպորատիվ պատասխանատվության մշակույթ սերմանող՝ ՎիվաՍել-ՄՏՍ-ը հասարակության խոցելի շերտերին աջակցություն ցուցաբերելու հարցում որդեգրել է հստակ ռազմավարություն, որն արմատապես մերժում է «գրավիչ երևալու» կամ «բարի համբավ» կորզելու րոպեական հնարքները:

Հիմնադրման առաջին իսկ օրվանից ՎիվաՍել-ՄՏՍ-ը՝ թե որպես ընկերություն և թե որպես աշխատակազմ, առաջնորդել է օրինակով՝ իրականացնելով կորպորատիվ պատասխանատվության իր օրակարգը և փորձելով հայեցակարգը տարածել մյուս ընկերությունների շրջանում՝համոզված լինելով, որ տնտեսական դաշտում գործունեություն ծավալող ընկերությունները պետք է ձեռք մեկնեն և իրենց եկամտից բաժին հանեն՝ ի նպաստ հասարակության խոցելի խմբերի սոցիալ-տնտեսական խնդիրների լուծման:

Ավելին, հասարակությանն աջակցելու և անտարբեր չմնալու սկզբունքը խորն արմատներ ունի մեր աշխատակիցների շրջանում, որոնց հանգանակած գումարներն ուղղվել են հասարակության խոցելի շերտերին՝ առանց լրատվամիջոցների կողմից դրանք լուսաբանելու ակնկալիքի (ցանկության դեպքում կարող ենք տրամադրել կոնկրետ հասցեներ): Հարկ ենք համարում տեղեկացնել, որ նախքան լրագրողական հարցումը ստանալը ՎիվաՍել-ՄՏՍ-ի աշխատակիցներն անտարբեր չեն մնացել նաև Լիլիթի ընտանիքի նկատմամբ. նրանց անձնական նախաձեռնությունն ու անհատական աջակցությունը չի ուշացել, որի մասին տեղյակ է նաև թերթը:

Ինչ վերաբերում է որպես կազմակերպություն՝ ՎիվաՍել-ՄՏՍ-ի որոշմանը, ապա այդ մասին, անշուշտ, թերթը կտեղեկացվի ժամանակին և պատշաճ կարգով:

ՎիվաՍել-ՄՏՍ-ի հանրային կապերի պատասխանատու
Վահե Իսահակյան

«Հետքի» պատասխանը «ՎիվաՍել»-ին

«Հետքի» լրագրողը որևէ էթիկական խախտում չի արել: Հանրային կապերի պատասխանատուի հետ հեռախոսազրույցին ներկա էր խմբագրության երեք աշխատակից, և միակ բանը, որ նյութի հեղինակը չի նշել, այն է, որ «ՎիվաՍելը» Վանաձորում տուն է հատկացրել անօթևան ընտանիքների:

Ավելացնենք, որ վերոհիշյալ հրապարակման մեկնաբանությունների դաշտում Armen, Ruben, Vardan, Անի, AN, Armen, hay_mard, Karen P., Vardan ու զանազան այլ անուններից հանդես եկողը և «Հետքին» վիրավորողը մեկնաբանությունները տեղադրում է նույն IP-ից:

«ՎիվաՍելին» խորհուրդ ենք տալիս հրաժարվել նման տեսակի PR-ից, դա պատիվ չի բերում նման լուրջ ընկերությանը: