«Հետքը» մի քանի հրապարակումներով անդրադարձել է գեներալ Հայկազ Բաղմանյանի եւ «Մարտունու պանրագործարան» ԲԲԸ-ի դատական վեճին, որը շարունակվում է մոտ 3 տարի:

Գեներալը որդու' «Պավել եւ ընկերներ» ՍՊԸ-ի սեփականատեր Պավել Բաղմանյանի միջոցով եւ դատարանների օգնությամբ փորձում է վերցնել ընկերության հողատարածքի մի մասը:

Այս վեճում լուրջ դերակատարում ունի նաեւ ՀՀ կառավարությունը: Պանրագործարանին սեփականության իրավունքով պատկանող հողատարածքի մի մասը Կառավարության որոշմամբ հատկացվել է Մարտունու քաղաքապետարանին, ինչի մասին ընկերության տնօրենն իմացել է վերջերս: Դատարաններում գործի արդարացի լուծում չստանալուց հետո պանրագործարանի տնօրեն Թաթուլ Բաղդասարյանը բաց նամակով դիմում է ՀՀ վարչապետ Տիգրան Սարգսյանին: Ստորեւ ներկայացնում ենք բաց նամակը:

Բաց նամակ

Հարգելի պարոն վարչապետ, համոզվելով, որ «Մարտունու պանրագործարան» ԲԲԸ-ի 1997 թ. սեփականաշնորհման պայմանագրով ձեռք բերած ողջ անշարժ գույքը Կառավարության որոշումով ընկերությունից գաղտնի Մարտունի քաղաքային համայնքին փոխանցելու անօրինական, հակասահմանադրական քայլի մասին իմ բազմաթիվ դիմումները Կառավարության եւ այլ չինովնիկների կողմից ենթարկվում են «բլոկադայի», ստիպված հարցի լուծման ակնկալիքով բաց նամակով դիմում եմ Ձեզ եւ խնդրում իբրեւ Կառավարության ղեկավար ի պաշտոնե ձեռնարկել անհրաժեշտ միջոցներ Կառավարության 26.01.2006 թ. թիվ 135-Ն որոշումով ընկերությանը սեփականության իրավունքով պատկանած գույքի անօրինական, սեփականատիրոջից գաղտնի ձեւով Մարտունի քաղաքային համայնքին փոխանցելու գործընթացի մասնակիցներին ի հայտ բերելու, նրանց պատժելու, իմ բազմաթիվ դիմումները փաստացի անհետեւանք թողնելու, ինչպես նաեւ գույքը օրինական սեփականատիրոջը վերադարձնելու համար: Հուսով եմ, որ այս բաց նամակը կնպաստի հարցի լուծմանը: