Այսօր լրագրողների հետ հանդիպման ժամանակ Հայաստանի կոմունիստական կուսակցության (ՀԿԿ) ղեկավար Ռուբեն Թովմասյանը հայտարարեց, որ իրենք երբեք չեն համագործակցի կապիտալիզմի կողմնակիցների հետ, և համագործակցություն կարող է լինել միայն սոցիալիստական գաղափարախոսություն կրողների հետ:  

ՀԿԿ ղեկավարը ներկայացրեց ԽՍՀՄ-ի առավելությունները, ապա այն վիճակը, որ հիմա է տիրում` աղքատություն, գյուղատնտեսության և արդյունաբերության անկում: Ռ. Թովմասյանի խոսքերով`այն երկիրը, որը չունի զարգացած արդյունաբերություն և գիտություն, չի կարող ունենալ նաև զարգացած գյուղատնտեսություն: Իսկ ժողովրդի վիճակն այնքան է վատացել, որ գյուղերում աթար են վառում:

«Փտած համակարգ + աթար = ոչնչացում», - հայտարարեց նա: 

Վերջինիս խոսքերով` կանգ են առել գրեթե բոլոր գործարանների աշխատանքները, իսկ «Նաիրիտը» «մեր իշխանություների խայտառակության պիտակն է»:

«Ես աթեիստ եմ, բայց չեմ կարող չասել` աստված բնության ընդերքը տվել է հայ ժողովրդին», - ասաց ՀԿԿ ղեկավարը:

Նա նշեց, որ ընտրվելու դեպքում իրենց առաջին գործը լինելու է «ընդերքի ազգայանացումը», ինչպես նաև անվճար կրթություն ապահովելը:

Եվ չնայած հիմա ՀԿԿ-ն ունի որոշակի ֆինանսական խնդիրներ ընտրություններին մասկացելու համար, և արգելված է նաև դրսից ֆինանսավորումը, սակայն, Ռ. Թովմասյանի խոսքերով, իրենք դրսից երբեք չեն էլ օգտվել: Նա համոզված է, որ դրսից` մասնավորապես ԱՄՆ-ից ֆինանսավորվում է ՀԱԿ-ը:

«Մի քանի կուսակցություններ, որոնք «ժիգուլու» բագաժնիկում կտեղավորվեն, միավորվում են և ստեղծում ՀԱԿ, որը ես անվանել եմ հայ ազգային կատակերգություն», - հավելեց Ռ. Թովմասյանը:

Նա զարմանք է հայտնում, թե ինչու են ընդդիմություն համարվում միայն նրանք, ովքեր «փողոցում են, անընդհատ գոռում, գոչում են»: Ռ. Թովմասյանի խոսքերով` արմատական ընդդիմություն է նաև ՀԿԿ-ը, որը գործում է ավելի հավասարակշռված: Իսկ «Մարտի 1-ը խարան է իշխանությունների համար և կրկնակի խարան է ՀԱԿ-ի համար»

«Խոսում ենք անկախության մասին, բայց չգիտես, թե ինչից ենք անկախ, ումից ենք անկախ, երբ բոլորից մուրում ենք», - հավելեց ՀԿԿ ղեկավարը: