Բնապահպանության նախարարին ավելի շատ հետաքրքրում է ՊԵԿ-ի աշխատակիցների հանգիստը 

Կառավարություն է ներկայացված «Դիլիջան» ազգային պարկից 25 տարի ժամկետով, առանց մրցույթի, վարձակալության իրավունքով 22.535 հա հողամաս ՊԵԿ-ին տրամադրելու որոշման մի նախագիծ:   Նախագծում նշվում է, որ Դիլիջան համայնքի վարչական սահմաններում գտնվող, պետական սեփականություն հանդիսացող, «Դիլիջան» ազգային պարկի ռեկրեացիոն գոտու տարածքում ՀՀ կառավարությանն առընթեր պետական եկամուտների կոմիտեի հարկային, մաքսային և քաղաքացիական ծառայողների ուսուցումը, վերապատրաստումն ու սեմինարների անցկացումը կազմակերպելու նպատակով է այն տրամադրվելու ՊԵԿ-ին: 

Հետաքրքիր է, որ ազգային պարկից այդչափ մեծ տարածք տրամադրելու նախագիծը ներկայացրել է ՀՀ բնապահպանության նախարար Արամ Հարությունյանը, ով ի պաշտոնե ավելի շատ պետք է հետաքրքրված լիներ ազգային պարկի պահպանությամբ: 

Իսկ նախարարը նախագծի հիմնավորման մեջ նշվել է, որ «ներկայիս կարևոր խնդիրներից է ոլորտի աշխատակիցների ուսուցման ու հանգստի կազմակերպումը` օգտագործելով Դիլիջան ազգային պարկի ռեկրեացիոն ռեսուրսները: Սակայն բացակայում է համապատասխան տարածքը, որի առկայությունը հնարավորություն կտա երիտասարդ մասնագետների մասնագիտական հմտությունների բարձրացման նպատակով պարբերաբար կազմակերպել ուսուցողական և վերապատրաստման դասընթացներ, հանդիպումներ` այն համատեղելով հանգստի հետ»: 

«Որոշման նախագծի ընդունման արդյունքում հնարավոր կլինի կազմակերպել ոլորտի աշխատակիցների պատշաճ ուսուցումն ու հանգիստը»,- սա էլ որոշումից ակնկալվող արդյունքն է: 

Հետաքրքիրն այն է, որ ՀՀ քաղաքաշինության նախարարությունը,  հաշվի առնելով, որ համաձայն Դիլիջան քաղաքի գլխավոր հատակագծի առաջարկվող տարածքի սահմաններում գտնվում է պատմության և մշակույթի հուշարձան հանդիսացող միջնադարյան գյուղատեղին, առաջարկել է վարձակալության տրվող հողամասի մակերեսը ճշգրտելու նպատակով ՀՀ օրենսդրության պահանջներին համապատասխան որոշման նախագիծը նախապես համաձայնեցնել ՀՀ մշակույթի նախարարության հետ: Իսկ մշակույթի նախարարությունը որևէ դիտողություն կամ առաջարկություն չի արել հարցի շուրջ: 

ՀՀ ԿԱ անշարժ գույքի կադաստրի պետական կոմիտեն առաջարկել է նշված հասցեում գտնվող անշարժ գույքը նախապես գրանցել որպես ՀՀ սեփականություն, քանի որ նրա նկատմամբ իրավունքի պետական գրանցում կատարված չէ: Այս առաջարկությունը չի ընդուվել, քանի որ ՀՀ Տավուշի մարզի Դիլիջան քաղաքային համայնքի վարչական սահմաններում գտնվող պետական սեփականություն հանդիսացող, «Դիլիջան ազգային պարկի» տարածքները  ճշտված և համաձանեցված են: 

Հատկանշական է, որ որոշմամբ կառուցապատման իրավունք չի տրվելու, սակայն հիմնավորման որևէ կետում նշված չէ, թե ինչպես են ուսուցում կամ հանգիստ կազմակերպելու առանց կառուցապատման: