HY RU EN

ԵԽԽՎ նախագահ Պեդրո Ագրամունտը հրաժարական է տվել

Եվրախորհրդի խորհրդարանական վեհաժողովի նախագահ, իսպանացի խորհրդարանական Պեդրո Ագրամունտն այսօր տեղեկացրել է, որ «անձնական պատճառներով» որոշել է թողնել ԵԽԽՎ ղեկավարի պաշտոնը: Այդ մասին նա գրառում է կատարել իր թվիթերյան էջում: 

Հիշեցնենք, որ Պեդրո Ագրամունտը հայտնի է իր ադրբեջանամետ դիրքորոշմամբ եւ բազմիցս մեղադրվել է կոռուպցիայի մեջ` Ադրբեջանի վերաբերյալ բանաձեւերի ընդունման համատեքստում: Իսկ այս տարվա սկզբին Եվրոպական կայունության նախաձեռնությունը դիմել էր Եվրոպայի Խորհրդի Գլխավոր քարտուղար պարոն Թորնբյորն Յագլանդին` պահանջելով հետաքննել եւ դատապարտել ԵԽ-ում առկա կոռուպցիան: Ելնելով իր կողմից իրականացված հետաքննության արդյունքներից` ԵԿԽ-ն պնդում էր, որ վերջին մի քանի տարիների ընթացքում Ադրբեջանն ապօրինի կերպով ազդել է Եվրոպայի Խորհրդի գործունեության և մարդու իրավունքների վերաբերյալ քվեարկությունների արդյունքների վրա` ենթադրաբար փոխանցելով ահռելի գումարներ և այլ բարիքներ ԵԽԽՎ-ի առանցքային պատգամավորներին:

ԵԽԽՎ գարնանային նստաշրջանի ժամանակ քննարկվեց ԵԽ-ում կոռուպցիայի թեման, Վեհաժողովի բյուրոն անվստահություն հայտնեց Պեդրո Ագրամունտին եւ արգելեց նրան այցեր կատարել ու հայտարարություններ անել ԵԽԽՎ-ի անունից: