«Լուսավոր Հայաստան» կուսակցությունը դիմել էր Կառավարություն՝ պահանջելով դադարեցնել Վանաձորի ավագանու լիազորությունները։ Այսօր «ԼՀ» կուսակցության գրասենյակից ստացանք Կառավարության գրավոր մերժման մասին գրությունը։ Խմբակցությունը որպես հիմնավորում ներկայացրել էր նոյեմբերի 10-ին Սահմանադրական դատարանի կայացրած որոշումը։ Հիշեցնենք, որ ՍԴ-ն Սահմանադրությանը հակասող էր ճանաչել «ՏԻՄ մասին» օրենքի 64-րդ հոդվածի 3-րդ մասը՝ ժամանակ տալով մինչ 2018-ի մարտի 31-ը Սահմանադրությանը համապատասխանեցնել նշված օրենքը։

ԱԺ 26 պատգամավորների դիմումում վիճարկվում էր նաև «ՏԻՄ մասին» օրենքի հոդված 69-ի առաջին մասը, որը բարձրագույն դատարանը համարել էր Սահմանադրությանը համապատասխանող։ Համաձայն այդ հոդվածի՝ Կառավարությունը կարող է վաղաժամկետ դադարեցնել ավագանու լիազորությունները, եթե հերթական նստաշրջանի ընթացքում ավագանու նիստերը երեք ամսից ավելի չեն գումարվում։

Կառավարության կողմից ներկայացված պատասխանում նշվում է՝ չնայած նրան, որ «ՏԻՄ մասին» օրենքի 64-րդ հոդվածի 3-րդ մասը ճանաչվել է Սահմանադրությանը հակասող, այնուամենայնիվ, «...գտնում ենք, որ ավագանին հրավիրել է նիստեր և ընդունել որոշումներ, և դրանք հնարավոր չէ որակել որպես անգործության դրսևորում, ուստի Կառավարությունը չունի բավարար իրավական հիմքեր՝ Վանաձոր համայնքի ավագանու գործողությունները դադարեցնելու»։

Հիշեցնենք, որ ՍԴ որոշումից հետո Վանաձորի ՀՀԿ և ՀՎԿ (նախկին ՕԵԿ) խմբակցությունները կոալիցիոն հուշագիր ստորագրեցին, ինչի արդյունքում Վանաձորի քաղաքապետի առաջին տեղակալ նշանակվեց ՀՎԿ խմբակցության ղեկավար Արկադի Փելեշյանը։

«ԼՀ» խմբակցության ղեկավար Քրիստ Մարուքյանից հետաքրքրվեցինք՝ արդյոք շարունակելո՞ւ են բոյկոտը: Վերջինս պատասխանեց, որ այս պահին հետագա անելիքներն են քննարկում։