HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Ղուկասյան

Մեկ օր` 911-ի հատուկ նշանակության ջոկատի հետ

ԱԻՆ հատուկ նշանակության ջոկատի փրկարար, ավագ ենթասպա Գեորգի Մխիթարյանը երազել է օդաչու դառնալ, Գեորգին կարծում է, որ երազանքն ինչ-որ կերպ իրականացել է․ ալպինիստական աշխատանքի շնորհիվ նորանոր բարձունքներ է հաղթահարում։ Տանն աշխատանքի մասին խոսել չի սիրում, տան անդամներն իր կատարած փրկարարական աշխատանքների մասին երբեմն հեռուստացույցի միջոցով են իմանում:

Գեորգին «Հետք»-ի նկարահանող խմբին ներկայացրեց իրենց ջոկատի աշխատանքները, հանգստյան սենյակն ու տեխնիկան, պատմեց զավեշտալի ահազանգերի ու ջոկատի հաջողությունների մասին։ Գեորգին արդեն վեց տարի է` փրկարար է, պատմում է, որ գործընկերների հետ Ամանորը նշելն ավելի հետաքրքիր է, քան տանը։

«Ամենքս տնից մի բան ենք բերում կամ էստեղ պատրաստում, մեծ սեղան գցում, բայց ամենակարևորը՝ առանց ալկոհոլի»,- պատմում է Գեորգին:

Իր աշխատանքային պրակտիկայում եղել է դեպք, երբ ահազանգ են ստացել Ամանորի գիշերը․ հրդեհը մարել են, ապա վերադարձել ջոկատ ու շարունակել նշել։

911-ի զավեշտալի ահազանգերի մասին միայն ժպիտով է պատմում՝ առնետ գտնելուց մինչև ջրմուղի խնդիրներ իրենց են դիմում, ասում է՝ մարդիկ վստահում են իրենց։

Մեր զրուցակցի համոզմամբ՝ փրկարարական աշխատանքն օգնել է իրեն լավ մարդ դառնալ, քանի որ «վատ մարդկանց շնորհակալություն չեն ասում»։ Կինը չի սիրում ամուսնու աշխատանքը. կարծում է, որ Գեորգին սառնասիրտ է դառնում աշխատանքի շնորհիվ, բայց նա  կնոջից ներողություն է խնդրում՝ ինքն է որոշում իր աշխատանքը։

Հպարտությամբ պատմում է իրենց ջոկատի հաջողության մասին. արդեն երկու տարի է` ԻՆՍԱՐԱԳ  (INSARAG) համաշխարահային ցանցի անդամ են, միջազգային որակավորում են ստացել․ աշխարհը գիտի իրենց ջոկատի մասին։

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter