HY RU EN

Վահե Սարուխանյան

«Շիրակ» օդանավակայանը վերակենդանացել է. հուշում են թվերը

Քաղավիացիայի գլխավոր վարչության հրապարակած տվյալները Գյումրու «Շիրակ» օդանավակայանի 2017 թ. գործունեության մասին հուշում են, որ մեր երկրի համար նշանակությամբ երկրորդ օդային դարպասը վերակենդանացել է:

Վերհիշենք, որ 2016-ը «Շիրակի» համար վայրիվերումների տարի էր: Նախորդ տարիների համար կտրուկ նվազել էին թռիչք-վայրէջքները, հետեւաբար՝ նաեւ ժամանող եւ մեկնող ուղեւորների թիվը: Ավելին՝ 2016-ի օգոստոս-սեպտեմբերին «Շիրակում» ընդհանրապես թռիչք չէր կատարվել, այսինքն՝ օդանավակայանը պարապուրդի մեջ էր:

Սակայն 2016-ի տարեվերջը հուսադրող էր նրանով, որ ռուսական «Պոբեդան» կանոնավոր թռիչքներ մեկնարկեց Մոսկվա-Գյումրի-Մոսկվա ուղղությամբ: Զուգահեռաբար կառավարությունը, նպատակ ունենալով Գյումրու օդանավակայանը դարձնել բյուջետային ավիաընկերությունների հանգրվան, որոշակի փոփոխություններ կատարեց: Այսպես՝ 2014-ի դեկտեմբերի 31-ից այստեղ չի գործում 10.000 դրամ «օդի տուրքը», 2017-ի հունվարից «Շիրակում» 50 տոկոսով զեղչվեց ՔԱԳՎ «Հայաէրոնավիգացիա» ՓԲԸ-ի աերոնավիգացիոն ծառայության գինը, իսկ փետրվարից ավիաօդերեւութաբանական ծառայությունը մատուցվում է անվճար (այն տրամադրում է ԲՆ «Զվարթնոց» ավիաօդերեւութաբանական կենտրոն» ՓԲԸ-ն): Հերթական լավ լուրը եղավ 2017-ին, երբ «Շիրակում» իր գործունեությունը սկսեց տեղական «Տարոն-Ավիան»:

Այս ամենը նպաստեց հյուսիսային օդանավակայանում կյանքի աշխուժացմանը, ինչի մասին փաստում են թվերը: Ներկայացնենք գործունեության հիմնական արտադրական ցուցանիշները՝ համեմատելով նախորդ տարիների հետ:

Վերջին 5 տարում՝ 2013-ից ի վեր, «Շիրակն» ի վերջո կարողացել է հատել 100.000 ուղեւորի շեմը: Միջազգային օդանավակայանի համար սա կարող է տարօրինակ ցուցանիշ թվալ, բայց սա է իրականությունը:

Shirak: Passengers (2013-2017)
Infogram

2017-ի առաջին 6 ամիսներն ամփոփելիս նշել էինք, որ ամսական կտրվածքով «Շիրակում» լավագույն տվյալները գրանցվում են մայիսին ու նոյեմբերին: Քանի որ 2017-ը գրեթե բոլոր առումներով «հեղափոխական» էր «Շիրակում», այս օրինաչափությունն էլ խախտվեց: Մայիսին կրկին աճ գրանցվեց նախորդ ամիսների համեմատ, բայց արդեն օգոստոսին այստեղ ուղեւորահոսքը կազմեց շուրջ 12.000 մարդ: Սեպտեմբերին կանխատեսել էինք, որ այս ռեկորդը կգերազանցվի, քանի որ առջեւում նոյեմբերն էր: Այդպես էլ եղավ. ըստ էության, առաջին հերթին արտագնա աշխատանքից ամանորյա տոների համար վերադարձողների հաշվին նոյեմբեր ամսվա ցուցանիշն անցավ 14.000-ից: Դեկտեմբերին նույնպես այդքան մարդ օգտվեց «Շիրակից»:

Passengers: Shirak (2014-2017)
Infogram

Բեռնափոխադրումների մասով պատկերը տարբերվում է: Ինչպես «Զվարթնոցում», «Շիրակում» էլ բեռնափոխադրումները որեւէ օրինաչափություն չունեն: Դա, ըստ էության, հիմնականում պայմանավորված է բեռնափոխադրող օպերատորների կանոնավոր չվերթների բացակայությամբ:

Այս առումով «Շիրակում» վերջին տարիների լավագույն արդյունքը եղել է 2015-ին, իսկ նույն 2017-ին Գյումրու օդանավակայանով ներմուծվել ու առաքվել է ընդամենը 2,3 տոննա բեռ:

Shirak: Cargo (t) (2013-2017)
Infogram

Իսկ ահա չվերթներն աճել են. անցյալ տարի «Շիրակում» կատարվել է 371 թռիչք-վայրէջք, ինչը  2013-ից ի վեր ամենաբարձր ցուցանիշն է:

Flights: Shirak (2013-2017)
Infogram