![](/static/articles/84/94/l-rkm5Qa579S.jpg)
Հայաստանում գրանցված է 82.800 աշխատանք փնտրող
Պաշտոնական տվյալներով Հայաստանում գործազրկության մակարդակը 6 % է, որը տարեսկզբի համեմատ ցածր է 1 %-ով: Սակայն Աշխատանքի միջազգային գործակալության տվյալներով Հայաստանում այդ ցուցանիշը 19.4 % է: Այս մասին այսօր՝ լրագրողների հետ հանդիպման ժամանակ, ասաց «Զբաղվածության պետական ծառայություն» գործակալության պետի տեղակալ Արտակ Սիմոնյանը:
Նրա խոսքով՝ թվերի տարբերությունը կապված է մեթոդաբանության հետ: Ըստ Աշխատանքի միջազգային գործակալության՝ գործազուրկ են համարվում այն մարդիկ, ովքեր աշխատանք են փնտրել վերջին մեկ շաբաթվա ընթացքում, իսկ ՀՀ օրենսդրությամբ հողի սեփականատերերը չեն համարվում գործազուրկ, և գործակալությունը սրանից ելնելով է կատարել հաշվարկը:
Դեկտեմբերի 1-ի տվյալներով գրանցվել է 82.800 աշխատանք փնտրող, որից գործազուրկի կարգավիճակ է ստացել 69.500-ը:
Տարեսկզբին գործազրկության նպաստ ստանալու իրավունք է ստացել 21.358 գործազուրկ՝ նախորդ տարվա 27.764-ի փոխարեն: 11 ամսվա ընթացքում արձանագվել է գործազրկության նպաստի կասեցման 865 դեպք (2010թ.-ին 1536 էր) և դադարեցման 3901 դեպք (2010թ.-ին 4110 էր):
Ա.Սիմոնյանը նշեց, որ մարզերում կա հատկապես բժիշկների պակաս: Բացի դրանից՝ թափուր աշխատեղերը հիմնականում լինում են հաշվապահի, ծրագրավորողի, մենեջերի, դասավանդողի, ինժեների, սպասարկման ոլորտի աշխատողի և այլ մասնագիտությունների վերաբերյալ: Որոշ մասնագիտությունների, օրինակ՝ վաճառողի, վարորդի, զբաղվածության կարգավիճակը կարճ է տևում:
Գործակալության նախաձեռնությամբ անցկացվում է էլեկտրոնային դասընթաց՝ «Ինչպես փնտրել աշխատանք»:
Բանախոսը նշեց, որ խնդիրներ են առաջանում հատկապես 50-ից բարձր տարիքային խմբի մարդկանց գործով ապահովելու հետ: Այս խմբում գործազրկության մակարդակը հասնում է 16%-ի: Աշխատաշուկայում գործում են տարբեր չափանիշներ, յուրաքանչյուր գործատու իրավունք ունի իր պահանջները ներկայացնելու աշխատողին:
Ա.Սիմոնյանի խոսքով՝ խնդիրը ցավոտ է, որովհետև գործատուի չափանիշների շրջանակներից դուրս են մնում բազմաթիվ մարդիկ՝ այդ թվում և լավ մասնագետներ, սակայն իրենք լծակներ չունեն այդ հարցը կարգավորելու: Բացի դրանից՝ «Զբաղվածության պետական ծառայություն» գործակալությունը տվյալներ չունի, թե աշխատանքի տեղավորման գործակալությունների գործունեության արդյունքում քանի մարդ է աշխատանք գտել:
Գործազուրկների մեջ 1-3 տարի շարունակ աշխատանք չունեցող մարդկանց թիվը հասնում է 39%-ի, իսկ 3 տարուց ավելի գործազուրկների թիվը՝ 22.4 %-ի: Խնդիրն այն է, որ այդ ժամանակահատվածում այս մարդիկ կորցնում են իրենց հմտությունները: Սակայն Ա.Սիմոնյանը հավաստիացնում է, որ իրենք կատարում են իրենց առջև դրված ծրագիրը և ամեն ինչ անում են՝ կրճատելու գործազրկության մակարդակը, ինչպես նաև մարդկանց դրդելու՝ աշխատանք փնտրելու:
Ինչ վերաբերում է աշխատանքային արտագաղթին, ապա Ա.Սիմոնյանի խոսքով՝ այդ ուղղությամբ արվում են բազմաթիվ քայլեր, սակայն դրանք դեռևս բավարար չեն:
Մեկնաբանություններ (1)
Մեկնաբանել