«Քայլ արեք, գտեք Գազել», «քայլ արա, մերժիր Սերժին» վանկարկումներով այսօր բողոքի ակցիա է տեղի ունեցել Կոտայքի մարզի Եղվարդ քաղաքում: Քաղաքապետարանի շենքի դիմաց հավաքված ցուցարարները պահանջել են վերականգնել ապրիլի 15-ից աշխատանքը դադարեցրած Եղվարդ-Երևան-Եղվարդ թիվ 269 միջմարզային երթուղին:

Քաղաքապետարանի դիմաց ցուցարարներին դիմավորել է Եղվարդի քաղաքապետի տեղակալ Կարեն Հարությունյանը, ով հավաստիացրել է, որ Երևան մեկնող միկրոավտոբուսները վաղվանից վերսկսելու են բնականոն աշխատանքը: Բացի այդ, ցուցարարները պահանջ են դրել, որպեսզի 5 օր շարունակ միկրոավտոբուսները ուղևորներին անվճար սպասարկեն, այսինքն՝ ճիշտ այնքան ժամանակ, որքան «Գազել»-ները չեն գործել: Բողոքի ակցիայի մասնակից Գարիկ Գևորգյանը «Հետք»-ի հետ զրույցում հայտնեց, որ ցուցարարների այդ պահանջը ևս ընդունվել է:

Քաղաքապետարանի դիմացից ցուցարարները երթով շարժվել են առաջ և փակել են Եղվարդ-Երևան մայրուղին: Բողոքի ակցիայի մասնակիցները պնդել են, որ «Գազել»-ները այսօրվանից վերսկսեն աշխատանքը, և ինչպես փոխանցեց Գարիկ Գևորգյանը առաջին «Գազել»-ը արդեն իսկ դուրս է եկել երթուղի և մեկնել Երևան: Դրանից հետո ցուցարարները բացել են մայրուղին, սակայն չեն հեռացել տարածքից:

Բողոքի ակցիան ուղեկցում են ոստիկաններ, ովքեր Գարիկ Գևորգյանի հաղորդմամբ՝ ոչ մի կերպ չեն խոչընդոտել խաղաղ ակցիային:

Հիշեցնենք՝ երեկ հոդված էինք հրապարակել այն մասին, որ Կոտայքի մարզի խոշոր համայնքներից Երևան ժամանող տրանսպորտային երթուղիները ցույցերի օրերին դադարեցրել են աշխատանքը