HY RU EN

Բողոք՝ Սերժ Սարգսյանի համակուրսեցի դպրոցի տնօրենի հրաժարականի պահանջով

Դանիել Իոաննիսյան. «11 դպրոցի տնօրեն Ռուզաննա Ազիզյանը թող գնա մոմ վառի, որ աշխատանքից հեռացումով վերջանա այս պատմությունը» 

Երևանի Մոնթե Մելքոնյանի անվան դպրոցի տնօրեն Ռուզաննա Ազիզյանի անունը պարբերաբար հայտնվել է լրատվամիջոցներում: Նա հայտնի է որպես հանրապետության նախկին նախագահ ու վարչապետ Սերժ Սարգսյանի համակուրսեցի: Մամուլը մի քանի անգամ անդրադարձել է դրամահավաքության դեպքերին, ուսուցիչների ազատումներին, ուսուցիչների ու ծնողների բողոքներին:

Ծնողներն այսօր հավաք էին հրավիրել դպրոցում՝ դարձյալ բարձրաձայնելով նույն խնդիրների մասին՝ պահանջելով տնօրեն Ռուզաննա Ազիզյանի պաշտոնանկությունը: Ուսուցիչների վկայությամբ, մոտ 100 ուսուցիչ ստորագրել է տնօրենի հրաժարականի համար:


Լազար Կարախանովը

Համբերության բաժակն, ըստ ֆիզկուլտուրայի ուսուցիչ Լազար Կարախանովի, լցվել է թավշյա հեղափոխության օրերին դասադուլի ու գործադուլի ժամանակ, երբ ուսուցիչներն ու աշակերտները ցանկացել են միանալ դասադուլին ու գործադուլին, սակայն դպրոցի դուռը փակվել է: Ֆիզկուլտուրայի ուսուցիչը պատմեց, որ պարզապես հեռացրել է դպրոցի դիմաց դրված փայտերը՝ բացելով ուսուցիչների ու աշակերտների ճանապարհը: Նրա խոսքով՝ մեթոդական միավորման կողմից նրա հեռացման համար ուսուցիչների ստորագրահավաք է կազմակերպվել, սակայն որևէ մեկը չի ստորագրել հեռացման պահանջի տակ:

Դպրոցում այսօր Ռուզաննա Ազիզյանը փորձում էր հակադարձել բոլոր մեղադրանքներին: Նա հերքեց Ֆիզկուլտուրայի ուսուցիչ Լազար Կարախանովին հեռացնելու մասին ստորագրահավաքի լուրը, նաև ասաց, որ ընդամենը անհանգստացել է երեխաների՝ դասադուլի դուրս գալու համար:

Մենք մեջբերեցինք «Երեխաների իրավունքների մասին» միջազգային կոնվենցիան, որը մեր պետությունը դեռև 1993-ին է վավերացրել: Կոնվենցիան երաշխավորում է երեխաների հավաքների ազատությունը: Այս մասին լսելով՝ Ռուզաննա Ազիզյանը ասաց՝ երևի նոր բաներ են փոխվել:

Երաժշտության ուսուցչուհի Լուսինե Մարգարյանը ևս պնդեց, որ ճնշումներ են եղել իր քաղաքական հայացքների համար:

Երևանի ավագանու անդամ Անահիտ Բախշյանն, ով նույնպես դպրոցում էր, ասաց, որ տարիներ առաջ ստուգումներ է իրականացրել դպրոցում ահազանգի հետքերով: Պարզվել է 2014-ին պարգևավճարները կազմել են 5 մլն դրամ, հավելավճար ստացածներից 6-ի անունն ընդհանրապես չի եղել աշխատավարձ ստացողների ցուցակում: Սակայն 2015-ին ստուգումների ժամանակ ուսուցիչները չեն հերքել, որ ստացել են պարգևավճարներ: Իսկ այսօր դպրոցի գրադարանավար Ռուզաննա Սաֆարյանը «Ազատություն» ռադիոկայանի հետ զրույցում հայտարարեց, որ 5 տարի աշխատել է դպրոցում, և թեև տարեկան 1-2 անգամ 30-70 հազար դրամով ստացել է հավելավճար, սակայն հրահանգված է եղել բանկոմատից ստանալ ու վերադարձնել հետ: Թե ում միջոցով՝ նա չասաց:

«Վախի մթնոլորտը, աշխատանքը կորցնելու վտանգը մարդկանց ստիպում է լռել, համակերպվել: Դեռ այսօր էլ կա վախ ուսուցիչների, նաև ծնողների մեջ բարձրաձայնելու բոլոր խնդիրների մասին, սակայն մասնավոր զրույցներում նրանք պնդում են, որ դրամահավաք է եղել, տոմսերի վաճառք և այլն»,- ասաց Անահիտ Բախշյանը:

«11 դպրոցի տնօրեն Ռուզաննա Ազիզյանը թող գնա մոմ վառի, որ աշխատանքից հեռացումով վերջանա այս պատմությունը»,- այսօր Երևանի Մոնթե Մելքոնյանի անվան դպրոցում տեղի ունեցած բողոքի ակցիայի ժամանակ ասաց «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը:

Մալաթիա-Սեբաստիա վարչական շրջանում գտնվող այս դպրոցում փոխվել էր մի բան՝ Սերժ Սարգսյանի լուսանկարի փոխարեն նախագահ Արմեն Սարգսյանի լուսանկարն էր:

Հիշեցնենք, որ այս դպրոցում 2014-ին բացվել էր ԱԺ պատգամավոր Սամվել Ալեքսանյանի անվան դասարան:

Գլխավոր լուսանկարում՝ Ռուզաննա Ազիզյանը