Արկադի Բաբչենկոն ողջ է. նրա դեմ մահափորձը բեմադրել էր Ուկրաինայի անվտանգության ծառայությունը
Ռուս լրագրող Արկադի Բաբչենկոն (Аркадий Бабченко) ողջ է: Նրա դեմ կազմակերպված մահափորձը Ուկրաինայի անտվանգության ծառայության (СБУ) հատուկ օպերացիան է եղել: Այս մասին մամուլի ասուլիսի ժամանակ հայտարարել է СБУ-ի ղեկավար Վասիլի Գրիցակը:
Նախօրեին ռուսական և ուկրաինական ԶԼՄ-ները հայտնել էին, որ Կիևում իր տանը սպանվել է Ռուսաստանում հայտնի լրագրող Արկադի Բաբչենկոն:
Այսօր կայացած մամուլի ասուլիսին ներկա է եղել նաև անձամբ Բաբչենկոն՝ ներողություն խնդրելով իր կնոջից և մտերիմներից, որ նրանց տեղյակ չի պահել հատուկ օպերացիային մասնակցեու մասին:
СБУ-ի ղեկավար Վասիլի Գրիցակի հաղորդմամբ՝ Արկադի Բաբչենկոյի սպանությունը իրականում պատվիրել են ռուսական հատուկ ծառայությունները, իսկ մահափորձը նախապատրաստելու մեջ կասկածվողը ձերբակալվել է, վերջինս Ուկրաինայի քաղաքացի է:
Մամուլի ասուլիսի ժամանակ Արկադի Բաբչենկոն հայտնել է, որ գործի հետաքննությունը սկսվել է երկու ամիս առաջ, իսկ ինքը տեղեկացվել է միայն մեկ ամիս առաջ: Նրան հայտնել են, որ իր դեմ մահափորձ է նախապատրաստվում:
Բաբչենկոյին փաստաթղթեր են ցույց տվել, այդ թվում մի լուսանկար, որը միայն անձնագրում է առկա. «Այդ լուսանկարը կարող էին ձեռքբերել միայն հատուկ ծառայություննեը և միայն անձնագրային վարչությունից: Այդտեղից հասկանալի դարձավ, որ տեղեկությունը Ռուսաստանից է եկել»,- ասել է լրագրողը:
Արկադի Բաբչենկոն համաձայնել է շարունակել համագործակցությունը Ուկրաինայի անվտանգության ծառայության հետ:
Չեչնիայում պատերազմի տարիներին զինծառայություն անցած Արկադի Բաբչենկոն հայտնի է դարձել որպես ռազմական լրագրող և գրող: Եղել է Art of War ամսագրի հիմնադիրն ու խմբագիրը, համագործակցել է ռուսական մի շարք պարբերականների հետ: Բաբչենկոն հայտնի էր նաև Ռուսաստանի իշխանությունների հասցեին հնչեցրած սուր քննադատություններով:
Մեկնաբանել