HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արարատ Դավթյան

Դատարանը մեղմեց թրաֆիկինգի համար դատապարտվածների պատիժները

Շենգավիթ համայնքի առաջին ատյանի դատարանն այս տարվա հունվարի 31-ին Գայանե Մելքոնյանին դատապարտեց 5, իսկ Սուսաննա Նիկողոսյանին` 2 տարվա ազատազրկման: Նրանք 2004-2005 թթ. խաբեությամբ հավաքագրել եւ Արաբական միացյալ էմիրություններ (ԱՄԷ) ու Թուրքիա էին փոխադրել մի խումբ հայ աղջիկների` պոռնկությամբ զբաղվելու համար: Գ. Մելքոնյանը եւ Ս. Նիկողոսյանը, սակայն, իրենց գործունեությունը սկսել են ավելի վաղ:

2003 թ. օգոստոսին Գյումրի քաղաքի «Ֆլամինգո» սրճարանում Գայանեն ծանոթացել է մատուցողուհի Լիլիթի (անունը փոխված է) հետ: Մտերմիկ զրույցի բռնվելով 19-ամյա աղջկա հետ` նա իմացել է, որ վերջինս գտնվում է նյութական ծանր վիճակում, ծնողներն ամուսնալուծված են եւ ապրում են իր վաստակով:

«Հարցրեց` ինչքա՞ն ես վաստակում: Երբ ասացի, առաջարկեց մեկնել Դուբայ եւ խոստացավ, որ այնտեղ նույն մասնագիտությամբ 3 անգամ ավելի գումար կաշխատեմ: Մեկնելու համար ես ոչ մի ծախս չէի անելու. ամեն ինչ հոգալու էր Դուբայում գտնվող մենեջերը»,- պատմում է Լիլիթը:

Աղջիկը համաձայնվել է, եւ հաջորդ օրն իսկ Գայանեն նրան տեղափոխել է Երեւան` Սուսաննա Նիկողոսյանի բնակարան: Լիլիթն այստեղ անցկացրել է 3 օր: Այդ ընթացքում լսել է, թե ինչպես է Սուսաննան հեռախոսով ինչ-որ մեկին նկարագրում իր արտաքինը: Ավելին` Սուսաննան Դուբայի «մենեջերին» ուղարկել է նաեւ Լիլիթի անձնագրի լուսապատճենը` նրա արտաքինի մասին ավելի ճիշտ պատկերացում տալու համար:

«Ես տարօրինակ ոչինչ չէի տեսնում: Հայաստանում էլ մատուցողին աշխատանքի ընդունելիս արտաքինը պարտադիր հաշվի են առնում»,- նկատում է Լիլիթը:

Սուսաննան բացատրել է նաեւ, որ Երեւան-Դուբայ չվերթ չկա: Ուստի, երեք օր անց «Զվարթնոց» օդակայանից նա Լիլիթին ճանապարհել է Մոսկվա, որտեղ վերջինիս դիմավորել եւ վարձակալած բնակարան են տեղափոխել Ավետիք Խաչատրյանն (Ավո) ու Սեւակ Սիմոնյանը (Սեւո): Նրանք Լիլիթի անվամբ պատրաստել են ՌԴ քաղաքացու կեղծ անձնագիր` աղջկա տարիքը 11 տարի մեծացնելով: Օրեր անց «30-ամյա» Լիլիթն ուղեւորվել է Դուբայ:

«Դուբայում Նանոն (Ամալյա Մնացականյան-Մատուլյան) անձնագիրս վերցրեց ու ասաց, որ մատուցողուհի աշխատելու մասին խոսք լինել չի կարող: Պիտի զբաղվեի մարմնավաճառությամբ: Ասացի, որ ես մարմնավաճառ չեմ եւ չեմ ուզում նման ձեւով գումար աշխատել»,- հիշում է Լիլիթը: Ըստ նրա` Նանոն սպառնացել է հակառակվելու դեպքում արաբ գործընկերների միջոցով հաշվեհարդար տեսնել կամ առանց անձնագրի հանձնել ոստիկաններին:

«Էդ խոսակցության ժամանակ սենյակում էլի աղջիկներ կային: Նրանք խորհուրդ տվեցին, որ ենթարկվեմ, թե չէ ամեն ինչ շատ ավելի վատ կլիներ»,- պատմում է Լիլիթը: Հետագայում նա մի քանի անգամ ականատես է եղել, թե ինչպես են պատժվում անհնազանդ աղջիկները: «10-ից 20 արաբ, ով որ չէր ենթարկվում, տանում էին անապատ, դաժանաբար ծեծում, բռնաբարում ու կիսամեռ վիճակում հետ բերում: Էդքանը տենալով` էլ ի՞նչ պիտի անեիր»,- հարցնում է Լիլիթը:

Լիլիթի խոսքերով` Նանոյի ենթակայության տակ որպես մարմնավաճառ աշխատել են 22-23 հայուհի: Նրանց մեջ եղել են նաեւ անչափահասներ: Հայաստանից եկած յուրաքանչյուր նորեկի համար նա ուղարկողին վճարել է 50-ից 150 ԱՄՆ դոլար` կախված աղջկա տարիքից եւ արտաքինից: «Որ Դուբայում էի 2-րդ, թե 3-րդ օրը Նանոն հեռախոսով Սուսաննայի հետ խոսեց: Հետո ինձ ասաց` տես, քո համար մարդա 150 դոլար փող էին ուզում (խոսքը Ս. Նիկողոսյանի եւ Գ. Մելքոնյանի մասին է - Ա. Դ.)»,- հիշում է Լիլիթը:

Ավելի քան վեց ամիս կավատ Նանոյի հովանու տակ Լիլիթը վաճառել է սեփական մարմինը եւ, ինչպես ինքն է ասում, օրական վաստակել մոտ 500 ԱՄՆ դոլար: Գումարն ամբողջությամբ հանձնել է կավատին, ով այդ ընթացքում միայն մեկ անգամ ընդամենը 100 դոլար է ուղարկել Լիլիթի հարազատներին: «Ասում էր` եթե ուզում ես շատ ուղարկեմ, ավելի շատ աշխատիր»,- պատմում է նա:

Հետո Դուբայի ոստիկանությունը Նանոյին ձերբակալել է: Նրա մարդկանցից մեկն աղջիկների անձնագրերը վերադարձրել է եւ հորդորել «ցրվել` ով որտեղ կարող է»: Լիլիթի արաբ հաճախորդներից մեկը բնակարան է վարձել, եւ նրանք մոտ 2 տարի ապրել են միասին: Մեկ տարի էլ Լիլիթն անցկացրել է Դուբայի բանտում` ռուսական կեղծ անձնագրի պատճառով: Այնուհետեւ արտաքսվել է Հայաստան: Օդանավակայանում նրան դիմավորել են ոստիկանության  աշխատակիցները: Լիլիթն ամեն ինչ մանրամասն պատմել է:

2007 թ. օգոստոսին Մալաթիա-Սեբաստիա համայնքի առաջին ատյանի դատարանը, ապացուցված համարելով վերոգրյալը, Գ. Մելքոնյանին եւ Ս. Նիկողոսյանին մեղավոր ճանաչեց ՀՀ Քրեական օրենսգրքի 132 հոդվածով (խաբեությամբ սեռական շահագործման ենթարկելը): Շենգավիթ համայնքի դատարանի կայացրած վճիռը եւ իր կողմից սահմանված պատժաչափերը մասնակի գումարելով` Մալաթիա-Սեբաստիայի դատարանը Գ. Մելքոնյանի համար վերջնական պատիժ սահմանեց 8, իսկ Ս. Նիկողոսյանի համար` 6 տարվա ազատազրկում:

Վերջիններս համաձայն չեն դատարանի վճռի հետ եւ այն բողոքարկել են վերաքննիչ դատարանում: Սեպտեմբերի 27-ին տեղի ունեցավ վերաքննիչ բողոքի առաջին դատաքննությունը`Սուրիկ Ղազարյանի նախագահությամբ: Ամբաստանյալները միջնորդեցին կիրառել արագացված դատավարության կարգ: Մեղադրող Աշոտ Նադոյանն առարկեց միջնորդության դեմ, քանի որ մեղադրյալներն իրենց առաջադրված մեղադրանքներն ընդունել են մասնակիորեն: Դրանից հետո Գ. Մելքոնյանը եւ Ս. Նիկողոսյանը գրավոր դիմեցին դատարանին` հայտնելով, որ մեղսագրվող արարքներում իրենց ճանաչում են լիովին մեղավոր: Հաշվի առնելով Ա. Նադոյանի առարկությունը` դատարանը մերժեց միջնորդությունը: Այդ եւ հաջորդ դատական նիստերի ընթացքում հարցաքննվեցին տուժողն ու ամբաստանյալները: Վերջիններս հայտարարեցին, որ նշանակված պատիժը խիստ է:

«Ես մեղավոր եմ այնքանով, որ Լիլիթին տեղափոխել եմ Երեւան` Սուսաննայի տուն: Նա շատ լավ գիտեր, թե ինչի համար է մեկնում Դուբայ: Հենց ինքն էր ասում, որ Գյումրիում մարմնավաճառությամբ է զբաղվում, բայց վաստակած գումարը չի բավականացնում: Խնդրեց, որպեսզի օգնեմ գնա Դուբայ»,- ասաց Գ. Մելքոնյանը: Գրեթե նույն բանն ասաց նաեւ Ս. Նիկողոսյանը:

«Այսինքն` դեռ մի բան էլ լավություն եք արել Լիլիթին: Այդ դեպքում, ըստ ձեզ, ո՞րն է պատճառը, որ նա շնորհակալության փոխարեն ձեր դեմ բողոքել է»,- հարցրեց մեղադրող Ա. Նադոյանը:

«Դուք եք ստիպել»,- պատասխանեց Գ. Մելքոնյանը:

«Ձեզ ձեր իրավունքները բացատրվել են: Ինչո՞ւ չեք բացարկ հայտնել ինձ»,- հարցրեց Ա. Նադոյանը եւ այդպես էլ, ըստ էության, պատասխան չստացավ:

Հոկտեմբերի 11-ին վերաքննիչ դատարանը Ս. Ղազարյանի նախագահությամբ կայացրեց վճիռ: Նախ նշենք, որ հենց առաջին դատական նիստի ժամանակ երկու ամբաստանյալներն էլ հայտարարել էին, որ վատառողջ են: Դատարանն էլ տեղեկացրեց, որ այդ դեպքում անհրաժեշտ է ներկայացնել համապատասխան փաստաթղթեր: Հոկտեմբերի 11-ի դատավարությանը Գ. Մելքոնյանը դատարանին հանձնեց «Աբովյան» քրեակատարողական հիմնարկի ղեկավարի եւ բուժծառայության պետի ստորագրություններով եւ կնիքով հաստատված մի փաստաթուղթ, ըստ որի` ինքն ինչ-ինչ առողջական խնդիրներ ունի: Գ. Մելքոնյանի նկատմամբ վճիռ կայացնելիս դատարանը սա դիտարկեց որպես մեղմացուցիչ հանգամանք:

Վերաքննիչ դատարանը մեղադրյալների բողոքները բավարարեց մասնակի: Կրճատվեցին միայն Մալաթիա-Սեբաստիա համայնքի առաջին ատյանի դատարանի նշանակած պատժաչափերը: Գ. Մելքոնյանի նկատմամբ վերջնական պատիժ սահմանվեց ազատազրկում 6 տարի ժամկետով, իսկ Ս. Նիկողոսյանի նկատմամբ` 5 տարի 6 ամիս:

Մեկնաբանություններ (1)

Andranik
Dubai kyanken lrev sute. Serele khapvac hay aghjekner, chvakhenak yrbek. yes orenken shat lav getem havatacek ents yev harcrek voryve eravabanec. Ovker vor erok khapvacen sut khostumnerov yev sut ashkhatankov karoghen eranc pashpanel yev voj me orenk che datapartelu erenc, ays orenken bolor yrkernerumel nuynne. Ayd mamarozanere surje mej kam hyute mej knelu degh acek, yrb nrank knecen duk tser passporten yev gumaren vercrek yev pakhchek depe Hayastan, sa amenec lav tarberakne azatvelu hamar ayd anasunere tserkec, mek vakhena kaj yghek yev heshek Astcun, yes vstaem vor duk kazatvek ayd tagardec. Uresh tarberak chunek yte uzumek Hayrenek veradarnak tser yrekhanere yev untaneke mot. Khndrumem kaj yghek chvakhenak, Astvac tsez pahapan.

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter