HY RU EN

Արաքս Մամուլյան

Մանվել Գրիգորյանը դատարանի որոշմամբ կալանավորվեց

Երևան քաղաքի ընդհանուր իրավասության դատարանը, նախագահությամբ դատավոր Մարինե Մելքոնյանի, քիչ առաջ բավարարեց Մանվել Գրիգորյանի նկատմամբ կալանավորումը որպես խափանման միջոց ընտրելու վերաբերյալ միջնորդությունը:

Հիշեցնենք, որ Ազգային ժողովն այսօր արտահերթ նիստի օրակարգում քննարկել է ԱԺ պատգամավոր Մ. Գրիգորյանի նկատմամբ քրեական հետապնդում հարուցելուն և նրան ազատությունից զրկելուն համաձայնություն տալու գլխավոր դատախազի միջնորդությունները: Փակ գաղտնի քվեարկությամբ երկու միջնորդություններին էլ խորհրդարանը տվել է իր համաձայնությունը:

Հիմք ընդունելով ԱԺ կայացված որոշումները՝ գլխավոր դատախազ Արթուր Դավթյանի կողմից նախաքննությունն իրականացնող մարմնին հանձնարարվել է Մանվել Գրիգորյանի նկատմամբ հարուցել քրեական հետապնդում, հատուկ քննչական ծառայության միասնական վարույթում քննվող 3 քրեական գործերի շրջանակներում նրան ներգրավել որպես մեղադրյալ, առաջադրել մեղադրանք, ինչպես նաև Մանվել Գրիգորյանի նկատմամբ կալանավորումը որպես խափանման միջոց ընտրելու միջնորդություն ներկայացնել Երևանի ընդհանուր իրավասության առաջին ատյանի դատարան:

Մանվել Գրիգորյանին մեղադրանք առաջադրելու քրեական օրենսգրքի 235-րդ հոդվածի 2-րդ մասով՝ ապօրինի կերպով ռազմամթերք ձեռք բերելու և այլ անձանց հետ նախնական համաձայնությամբ պահելու համար, ինչպես նաև քրեական օրենսգրքի 179-րդ հոդվածի 3-րդ մասի 1-ին կետով՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակելու համար:

Դատարանը մի քանի ժամ շարունակ քննում էր Գրիգորյանին կալանավորելու վերաբերյալ միջնորդությունը:

Կալանքի միջնորդության քննությունից հետո Մանվել Գրիգորյանը ԱԱԾ աշխատակիցների ուղեկցությամբ դուրս տարվեց դատարանից: Նշենք, որ նրան տարան ոչ թե կալանավորներին տեղափոխող ուղեկցող գումարտակի, այլ ԱԱԾ մեքենայով: