Նախարար. պետք է բացառել Հայաստանում անորակ ճանապարհների կառուցումը (տեսանյութ)
Միջպետական և հանրապետական նշանակության ավտոճանապարհների մի շարք հատվածներում հիմնանորոգման աշխատանքների ակտիվ ընթացք է։ Այս մասին տեղեկացնում է տրանսպորտի, կապի և տեղեկատվական տեխնոլոգիաների նախարարությունը:
Վարչապետի հանձնարարության շրջանակներում, այն է՝ Հայաստանում բարձր որակով ճանապարհներ կառուցելու անհրաժեշտությունը, տրանսպորտի, կապի և տեղեկատվական տեխնոլոգիաների նախարար Աշոտ Հակոբյանն անակնկալ շրջայցեր է կատարում հիմնանորոգվող ճանապարհահատվածներ:
Սահմանված չափորոշիչներին չհամապատասխանելու դեպքում շինարարն իր միջոցներով կշտկի թերությունները, որից հետո ևս 3 տարի ճանապարհահատվածը կգտնվի երաշխիքային սպասարկման ժամկետի մեջ։
Տավուշի մարզի Ոսկեպար-Նոյեմբերյան միջպետական ավտոճանապարհի 18.3 կմ ընդհանուր երկարությամբ 3 առանձին հատվածներում (8.04կմ, 4.168կմ, 6.1կմ) ևս հիմնանորոգման աշխատանքներ են ընթանում: «Վառմաշ» ՍՊ ընկերության տնօրեն Կարեն Աֆոյանը նախարարին ներկայացրեց աշխատանքների ընթացքը։ Ճանապարհի 8.04 կմ հատվածում ավարտվել է սառը վերամշակման եղանակով հիմքի տեղադրումը:
Ընթացքի մեջ են ներքին շերտի ասֆալտապատման աշխատանքները, որից 7կմ-ում այն արդեն արված է: 4.168 կմ հատվածում հիմք է տեղադրվում:
Հաջորդ՝ 6.1 կմ հատվածում ավարտվել են կողնակների մաքրման աշխատանքները։ Նախարարին ներկայացվեցին նաև ինտենսիվ երթևեկության պայմաններում աշխատանքների ընթացքում առաջացած դժվարությունները։ Քննարկվեցին ճանապարհը ժամանակ առ ժամանակ փակելու հնարավորությունները։
Այս տեղամասում ևս ճանապարհի տարբեր հատվածներից՝ և´ հիմքից, և´ ասֆալտբետոնե փռվածքից, փորձանմուշներ վերցվեցին։ Ստուգվեց նաև ասֆալտի ջերմաստիճանի համապատասխանությունը։
Աշոտ Հակոբյանն ընդգծեց, որ պետք է բացառել Հայաստանում անորակ ճանապարհների կառուցումը, և եթե լինեն ընկերություններ, որոնք կառուցվող ճանապարհների որակի հաշվին կփորձեն տնտեսումներ անել, պատասխանատվություն կկրեն օրենքի ամբողջ խստությամբ։
Մեկնաբանություններ (1)
Մեկնաբանել