HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սուրիկ Խաչատրյանին և Աղվան Հովսեփյանի որդուն առնչվող ընկերությունների նկատմամբ վարչական վարույթները կարճվել են

«Հետքի» հրապարակումների հիման վրա հարցուցված վարչական վարույթները «Գեղի Գօլդ» և «Տելիա Մայնինգ» ընկերությունների նկատմամբ կարճվել և վերահասցեագրվել են բնապահպանության ու էներգետիկ ենթակառուցվածքների և բնական պաշարների նախարարություններին: Այս մասին մեզ տեղեկացրել է բնապահպանության և ընդերքի տեսչական մարմնի Սյունիքի ստորաբաժանման պետ Լևոն Պետրոսյանը:  

Վերջինիս փոխանցմամբ՝ տեսչական մարմինն ուսումնասիրել է երկու ընկերությունների փաստաթղթերը, կատարել տեղանքի զննում և որևէ խախտում չի գտել: Սյունիքի ստորաբաժանման պետն ասում է, որ գործին ընթացք կարող են տալ նշված երկու նախարարությունները, քանի որ ընկերություններին հենց նրանք են տվել համապատասխան թույլտվությունները: Ըստ Պետրոսյանի՝ եթե «Տելիա Մայնինգն» ու «Գեղի Գօլդը» գործունեություն ծավալեին, այսինքն՝ շահագործում սկսեին և խախտումներ թույլ տային, ապա դա արդեն տեսչական մարմնի գործառույթների մեջ կլիներ:

Երրորդ ընկերությունը, որի նկատմամբ «Հետքի» հրապարակումների հիման վրա տեսչական մարմինը վարչական վարույթ էր հարուցել՝ «Արարատցեմենտ» ՓԲԸ-ն է: Լևոն Պետրոսյանն ասում է, որ այս ընկերությունում դեռևս չեն ավարտել ուսումնասիրությունները, և պարզաբանումների անհրաժեշտություն կա:

Հիշեցնենք, որ «Տելիա Մայնինգ» ՍՊԸ-ն «Աստղաբերդ» փոքր հէկ է կառուցել Գեղի գետի վրա: Այս փհէկի համար օգտագործվել է 1,7 մ տրամաչափի պողպատե խողովակաշար, որի երկարությունը մոտ 5200 մ է: Դա նշանակում է, որ Գեղի գետի ավելի քան 1/6-ը մտել է ընկերության խողովակաշարի մեջ: Այս կառույցը տարեկան արտադրելու է 24 մլն կՎտ.ժ էլեկտրաէներգիա:

«Տելիա Մայնինգը» հիմնադրվել է 2012-ին: Մինչև 2015 թ. սեփականատերը նախկին գլխավոր դատախազ, ՀՀ քննչական կոմիտեի նախկին նախագահ Աղվան Հովսեփյանի որդին էր՝ Միսակ Հովսեփյանը: 2015-2016 թ. ՍՊԸ-ի սեփականատերն է եղել երևանցի Գևորգ Խաչատրյանը, ում փոխարինել է Բալահովիտ գյուղի բնակիչ Հակոբ Թադևոսյանը:

«Գեղի Գօլդ» ՍՊԸ-ն հիմնադրվել է 2012-ին, որի 100 տոկոսի սեփականատերն ու գլխավոր տնօրենը Սյունիքի նախկին մարզպետ Սուրիկ Խաչատրյանն է: Այս ընկերությունը 2016-ին ընդերքօգտագործման պայմանագիր է կնքել էներգետիկ ենթակառուցվածքների և բնական պաշարների նախարարության հետ՝ ստանալով Սյունիքի մարզի Ոսկեձորի ոսկի-բազմամետաղային հանքավայրի շահագործման թույլտվություն 29 տարով:

«Արարատցեմենտ» ՓԲԸ-ն պատկանում է «Ծառուկյան» դաշինքի ղեկավար, ԱԺ պատգամավոր Գագիկ Ծառուկյանին: Ընկերությունը Կապանում ցեմենտի աղացման արտադրամաս է կառուցում:

Մեկնաբանություններ (1)

Գեւորգ
Ստացվում է սովետի բարի ժամանակների նման - դու բողոք ես գրում Մոսկվա, որ օրինակ, ԺԵԿ - ի պետ Պողոսը քեզ հալածում է: Նամակը Կրեմլից մակագրվում էր կենտկոմ, այնտեղից էլ քաղկոմ, քաղկոմից ռայկոմ, ռայկոմից տեղկոմ, տեղկոմից էլ ԺԵԿկոմ ... ընկեր Պողոսին, թե էտ ընկերոջ հարցը լուծի!

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։