HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Դիանա Ղազարյան

Բլագոդարնոյե գյուղում երազում են ծորակից մաքուր ջուր խմել

Դիանա Ղազարյան

Լոռու մարզի Տաշիր խոշորացված համայնքի Բլագոդարնոյե գյուղը մեկն է Հայաստանի այն 580 բնակավայրերից, որտեղ խմելու ջրի խնդիր կա: 

Գյուղի 63 ընտանիք՝ 280 բնակիչ, գետից հոսող ջուր է խմում, որը չի մաքրվում և խողովակներով միանգամից հասնում է գյուղացիների տուն:

Գյուղացիները դույլերում հավաքում են ծորակից հոսող ջուրը, ժամեր շարունակ թողնում, որպեսզի ջրի հետ եկած մանր աղբն ու ավազը կուտակվեն դույլի հատակին, ապա նոր օգտագործում խմելու նպատակով:

75-ամյա Լիանա Դավոյանը Բլագոդարնոյեում է ապրում 1960 թվականից՝ արդեն 58 տարի: Գյուղում երբևէ մաքուր ջուր չի խմել: «Միշտ էլ գետի ջուր ենք խմել»,-ասում է նա: 

Տիկին Լիանան ամենից շատ երիտասարդների համար է մտահոգվում. «Գետի ջուր ենք խմում: Կեղտոտ ջուր է գալիս: Հլը որ անձրևներ է գալիս, շատ պղտոր ջուր է գալիս: Ջահելություն շատ կա, մեղք են երեխեքը: Մենք, ասենք, պառավ ենք, ամեն բան արդեն արել ենք, բայց ջահելները մեղք չե՞ն»:

Տիկին Լիանան առավոտյան դույլերում հավաքում է գետից հոսող ջուրը, ջրի հետ եկած մանր աղբը նստում է դույլի հատակին, երեկոյան արդեն ընտանիքի անդամները խմում են այն: Տնային տնտեսուհու կարծիքով` լվացքի, անասունի համար ջուրը նորմալ է, բայց խմելու համար՝ անպիտան, հատկապես առավոտյան ժամերին:

Երբեմն ջրի հետ սատկած միջատներ են հոսում: «Ջրագծերը հին են ու փտած: Կեղտ, ժանգ, ինչ ասես` գալիս է: Գորտ, ձուկ, լրիվ փակվում է գիծը, էդ ջուրն էլ գալիս է մեր տներ»,- ասում է մեկ այլ բնակիչ` Օվսաննա Հունանյանը:

Նա գյուղում ապրում է երկու որդիների և մոր հետ: Այստեղ են տեղափոխվել Տաշիրից` 1994 թվականին: Տեղափոխման առաջին օրվանից  Օվսաննան, իր խոսքով, խմելու ջրի մասին բարձրաձայնել է, բազմիցս դիմել պատկան մարմիններին, սակայն ապարդյուն:

Օվսաննա Հունանյան

Օվսաննան ևս դույլերում է հավաքում ջուրը, որպեսզի կարողանան մակերեսից ջուրը վերցնել, խմել: Ֆինանսական միջոց չունեն, որ խմելու ջուր գնեն:

Տիկին Օվսաննան ցույց տվեց դույլով հավաքված բաց դեղին գույնի ջուրը, ասաց՝ սա դեռ բարվոք վիճակ է. «Հլա էսի նասոսի լցրած է, նասոսը էլի նստվածք է տվել բակի մեջ, բա որ հիմա գնանք, բաժակով լցնենք, ահավոր է, մեջը ինչ ասես` չկա»:  

Բլագոդարնոյեի վարչական ղեկավար Աշոտ Ավետիսյանը «Հետք»-ի հետ զրույցում ասաց, որ գետի ջուրը գյուղ է գալիս մեկ կիլոմետր հեռավորությունից: Գյուղ ֆիլտրված ջուր չի մատակարարվում 1990-ականների վերջից, երբ Սովետական Միության տարիներից շահագործվող խողովակաշարը փտել է՝ անհնար դարձնելով խմելու ջրի մատակարարումը: Վարչական ղեկավարի փոխանցմամբ՝ արդեն 15 տարուց ավել գյուղից մեկ կիլոմետր հեռավորության վրա խողովակաշար են անցկացրել, որով գետի ջուրը հասնում է համայնք, ապա ներքին ցանցով հոսում դեպի տներ: Ավետիսյանի փոխանցմամբ՝  գյուղը խմելու ջրով ապահովելն իրենց առաջնահերթ խնդիրն է:

Աշոտ Ավետիսյան

Վարչական ղեկավարի հավաստմամբ՝ մարզպետարանը ծրագիր է հաստատել, որով, ամենայն հավանականությամբ մինչ նոյեմբերի վերջ, գյուղը կապահովվի խմելաջրով: Այդ ծրագրով գյուղից 6 կմ հեռավորությամբ գտնվող սարերի մեծ աղբյուրներից խողովակներ են անցկացնելու, որը ջուրը հասցնելու է մաքրման կայան, հետո արդեն ֆիլտրված ջուրը մատակարարվելու է բնակիչներին:

Գլխավոր լուսանկարում Լիանա Դավոյանն է

Լուսանկարները եւ տեսանյութը` Դավիթ Բանուչյանի