HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Աղավնի Եղիազարյան

Մարդկանց առեւտրի դեմ պայքարը Հայաստանում

Տեղեկանք

2005թ. ԱՄՆ Պետդեպարտամենտը Կոնգրեսին ներկայացրած «Աշխարհում մարդկանց վաճառքի իրավիճակի մասին» տարեկան հաշվետվությունում Հայաստանը դասեց հատուկ վերահսկման կարիք ունեցող երկրների շարքը:

2005թ. մարտի 16-ին ՀՀ գլխավոր դատախազության կոլեգիայի նիստում որոշվեց դատախազության քննչական վարչությունում ստեղծել մարդկանց առեւտրի եւ նրանց անօրինական միգրացիայի դեմ պայքարի բաժին:

2004թ. մարտի 30-ին ՀՀ կառավարությունը եւ ՄԱԿ-ի Զարգացման ծրագիրը համատեղ ստորագրեցին «Մարդկանց առեւտրի դեմ պայքարի ծրագիր. օժանդակություն հզորացումների զարգացմանը եւ աջակցություն տուժյալներին»:

2004թ. հունվարի 15-ին ՀՀ կառավարությունը հաստատեց ՀՀ-ից շահագործման նպատակով մարդկանց ապօրինի փոխադրման եւ առուվաճառքի (թրաֆիկինգ) կանխման 2004-2006 թթ. գործողությունների ազգային ծրագիրը:

2003թ. օգոստոսից գործող ՀՀ Քրեական նոր օրենսգրքով մարդկանց առեւտուրը քրեորեն պատժելի է (հոդված 132):

2003թ. մարտի 25-ին Հայաստանը վավերացրեց ՄԱԿ-ի «Անդրազգային կազմակերպված հանցավորության դեմ կոնվենցիան»:

2002թ. հոկտեմբերի 14-ին ՀՀ վարչապետի որոշմամբ ստեղծվեց Միջգերատեսչական հանձնաժողով, որը պետք է ուսումնասիրի ՀՀ-ից շահագործման նպատակով մարդկանց ապօրինի փոխադրման, տեղավորման ու առուվաճառքի հետ կապված հարցերը եւ առաջարկներ ներկայացնի:

2002թ. թրաֆի կ ինգը արժանացավ ՀՀ կառավարության ուշադրությանը, քանի որ ԱՄՆ Պետդեպարտամենտի հաշվետվությունում Հայաստանը դասվեց երրորդ կարգի' երեւույթին ուշադրություն չդարձնող եւ համապատասխան կանխարգելիչ քայլեր չձեռնարկող երկրների շարքը:
Հակաթրաֆիկինգային ծրագրերը

«Ամեն ինչ սկսվեց 2001թ., երբ մենք թրաֆիկինգի 59 զոհերի հանդիպեցինք, քննարկեցինք դեպքերը եւ հաշվետու եղանք ՀՀ կառավարությանը: Սակայն ՀՀ կառավարությունը գտավ, որ Հայաստանում թրաֆիկինգ գոյություն չունի եւ վաղ է խոսել այդ «ժամանակակից ստրկության» մասին: Միայն Պետդեպարտամենտի զեկույցից հետո կառավարությունը քայլեր ձեռնարկեց, որին ակտիվորեն մասնակցել եւ մասնակցում է Միգրացիայի միջազգային կազմակերպությունը (ՄՄԿ)»,-ասում է ՄՄԿ ծրագրերի պատասխանատու Հրաչ Կաժոյանը:

ՄՄԿ երեւանյան գրասենյակը 2002թ.-ից ծրագրեր է իրականացնում մի քանի ուղղություններով' հյուպատոսական ծառայությունների աշխատակիցների վերապատրաստում, վերապատրաստում եւ տեխնիկական աջակցություն իրավապահ մարմինների թրաֆիկինգի կանխման կարողությունների զարգացման համար, հանրության իրազեկության բարձրացում եւ աջակցություն թրաֆիկինգի զոհերին:

«Սկզբում բոլորն էլ թյուր պատկերացում ունեին խնդրի մասին: Հիմա կարող եմ ասել, որ սեմինարները, կլոր սեղանները, գործուղումները, այլ երկրների փորձագետների հետ շփումը տվել են իրենց արդյունքը. պետական համապատասխան կառույցների աշխատակիցները գիտեն' ինչ է թրաֆի կ ինգը եւ ինչ կանխարգելիչ քայլեր կարելի է անել»,-ավելացրեց Հրաչ Կաժոյանը:

ՄՄԿ-ն օժանդակել է «Հույս եւ օգնություն» տեղական ՀԿ-ին' օգնելու թրաֆիկինգի զոհերին. հեռախոսային թեժ գիծ, ապաստարան, զոհերին իրավաբանական, բժշկական եւ հոգեբանական օգնություն:

«Աշխատել ենք 32 հոգու հետ: Բավականին դժվար է ոչ միայն շփման մեջ մտնել զոհի հետ, այլ նաեւ բացատրել ու հասկացնել, որ ինքը թրաֆիկինգի զոհ է: Նրանց աջակցում ենք ինչով հնարավոր է' փաստաթղթերի ձեւակերպումից մինչեւ ապաստարանում տեղավորելը: Այս կարգի աջակցության ծրագրերի կարիք Հայաստանն ունենալու է մինչեւ մարդկանց համար միգրացիան դադարի երազանք լինել»,-ասաց «Հույս եւ օգնություն» ՀԿ-ի նախագահ Ենոք Շատվորյանը:

2004թ. մարտին ՀՀ կառավարությունը եւ ՄԱԿ-ի Զարգացման ծրագիրը (ՄԱԶԾ) համատեղ ստորագրեցին «Մարդկանց առեւտրի դեմ պայքարի ծրագիր. օժանդակություն հզորացումների զարգացմանը եւ աջակցություն տուժյալներին» ծրագիրը: ՄԱԶԾ-ն ծրագիրն իրականացնում է ՄՄԿ-ի եւ ԱՄՔՈՐ կազմակերպության Հայաստանի գրասենյակի (Միավորված մեթոդիստների օգնության կոմիտե) հետ համագործակցությամբ: Ծրագիրն ունի երեք բաղադրիչ. օժանդակություն հզորացումների զարգացմանը, իրազեկության բարձրացում եւ աջակցություն զոհերին:

Նորվեգիայի եւ Նիդերլանդների կառավարություններն այս ծրագրի իրականացմանն են տրամադրել 650 հազար ԱՄՆ դոլար: Ծրագիրն ավարտվում է 2006թ. մայիսին, սակայն ամենայն հավանականությամբ այն կունենա շարունակություն:

ՄԱԶԾ-ն աջակցում է կառավարությանը հակաթրաֆիկինգային ճիշտ քաղաքականության մշակման գործում' օրենսդրական բարեփոխումներ, տուժյալների բժշկական աջակցության եւ վերաինտեգրման մեխանիզմների մշակում, կարողությունների գնահատում, տարածաշրջանային համագործակցության հզորացում եւ այլն: Արդյունավետ եւ համակարգված աշխատանք ծավալելու համար ստեղծվել է տեղական եւ տարածաշրջանային ՀԿ-ների,խնդիրը լուսաբանող լրագրողների եւ լրագրողական կազմակերպությունների ցանց:

«Հզորացումների զարգացման շրջանակում փորձում ենք ստեղծել արդյունավետ շրջանակ բոլոր գործող կառույցների միջեւ' կառավարություն, ՀԿ-ներ եւ միջազգային կառույցներ: Ծրագրի «իրազեկության բարձրացում» մասով աշխատում են նաեւ ՄԱԶԾ-ի ենթակապալառու գործընկերներ ԱՄՔՈՐ-ն ու ՄՄԿ-ն»,-ասում է ՄԱԶԾ-ի հակաթրաֆիկինգային ծրագրի պատասխանատու Աիդա Ղազարյանը:

«Այս ծրագրի մեր մասը մենք կոչել ենք «Աջակցություն մարդավաճառության զոհերին» եւ իրականացնում ենք' սերտորեն համագործակցելով «Ժողովրդավարությունն այսօր» ՀԿ-ի հետ: Սկիզբը բավականին դժվար էր. թրաֆիկինգի զոհերի հետ առնչվող պետական տարբեր կառույցների աշխատակիցներ չէին տարբերում մարմնավաճառությունը թրաֆիկինգից, զոհերը չէին գիտակցում, որ զոհ են: Հիմա իրավիճակն այլ է. սոցաշխատողները, բժիշկները գիտեն, թե ինչպես վերաբերվել մարդուն, ով է դարձել թրաֆիկինգի զոհ, իսկ զոհերն էլ արդեն վստահում են մեզ»,-բացատրեց այդ ծրագրի ղեկավար Վիկտորիա Ավակովան:

ԱՄՔՈՐ-ն աշխատում է մի քանի ուղղություններով' իրազեկության բարձրացում, զոհերին աջակցություն եւ դասընթացներ սոցիալական աշխատողների, զբաղվածության գործակալությունների եւ պոլիկլինիկաների աշխատակիցների համար: 2004թ. հուլիսից գործում է զոհերի աջակցության թեժ հեռախոսագիծ: Մինչեւ հիմա ընդունած 1000-ից ավելի հեռախոսազանգերի 16 տոկոսը եղել են հենց թրաֆիկինգի կամ դրան առնչվող դեպքեր: Զոհերին աջակցում են խորհրդատվությամբ եւ կացարանով:

«Այս ընթացքում աշխատել ենք 14 հոգու հետ: Անկախ նրանից' զոհը կմնա՞ մեր կացարանում, թե՞ ոչ, մեր մասնագետները ցուցաբերում են իրավաբանական, հոգեբանական եւ բժշկական աջակցություն: Այս ամենից հետո մենք չենք հրաժարվում զոհից: Համագործակցում ենք զբաղվածության կենտրոնների հետ, եթե հարմար աշխատատեղ է լինում, մենք համապատասխան դասընթացի ենք ուղարկում զոհին' աշխատանքի տեղավորելու հույսով»,-ասում է Վ. Ավակովան:

Իրազեկության բարձրացման համար ծրագրի շրջանակներում հայտարարություններ են եղել թերթերում եւ հոլովակներ են հեռարձակվել հեռուստատեսությամբ ու ռադիոյով, կազմակերպվել են նաեւ սեմինարներ ՀԿ-ների եւ մարզպետարանների աշխատակիցների համար:

Մարզերում աշխատում է նաեւ ՄՄԿ-ն' թրաֆիկինգի խնդրին ծանոթացնելով Համազգային թատրոնում բեմադրած «Այրվող մոմեր» ներկայացմամբ: Այն մի կնոջ պատմություն է, որը դարձել է թրաֆիկինգի զոհ: «Ներկայացումը ցույց ենք տալիս մարզերում: Արդեն 5 քաղաքներում' Գյումրիում, Չարենցավանում, Վանաձորում, Եղեգնաձորում եւ Գորիսում ցուցադրվել է: Ներկայացումից հետո քննարկում ենք թեման տեղական կազմակերպությունների հետ, ինֆորմացիա ենք նրանց տրամադրում, որպեսզի իրենք էլ տեղում աշխատեն: Երբեմն տեղական հեռուստաընկերությունները հաղորդումներ են պատրաստում այս թեմայի շուրջ: Տրամադրում ենք նաեւ ներկայացման տեսագրությունը, որպեսզի հետո էլ այն եթեր տրվի»,-ասում է ծրագրերի խորհրդատու Լուսինե Մելքոնյանը:

շարունակություն

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter