Այսօր լրագրողների հետ հանդիպման ժամանակ ՀՀԿ խմբակցության ղեկավար Գալուստ Սահակյանը հայտարարեց, որ այժմ կուսակցությունները փնտրտուքի մեջ են, փորձում են մշակել իրենց ռազմավարությունը և ավելի ներակայանալի դառնալ ժողովրդին: Մշակվում է նախընտրական ծրագիրը, ռազմավարությունը, որը կներկայացվի իր ժամանակին:

Ըստ բանախոսի՝ այս ընթացքը գոհացուցիչ է, «քաղաքական ինտրիգներ» չեն սպասվում. դրանք կլինեն նախընտրական քարոզչությունից հետո:

Համամասնական ցուցակի որևէ քննարկում ՀՀԿ-ում, Գ. Սահակյանի խոսքով, չի եղել: Հավանական թեկնածուների մասին շրջանառվող լուրերը նա ընդամենը կանախատեսումներ է համարում: Այն հարցին, թե արդյոք ինքը կցանականար Արտաշես Գեղամյանին տեսնել այդ  ցուցակում, Գ. Սահակյանը նշեց, որ խուսափում է պատասխանից:

Իսկ արդյոք Սերժ Սարգսյանը կգլխավորի ՀՀԿ ցուցակը, Գ, Սահակյանի խոսքով՝ նման  քննարկում նույնպես դեռ չի եղել, բայց դա «դասական ձև է», որ ցուցակը գլխավորի կուսակցության նախագահը:

Գ. Սահակյանը համոզված է, որ ՀՀԿ-ն յուրաքանչյուր տարածքի համար ունի լուրջ թեկնածուներ: ԱԺ-ում կընդգրկվեն նրանք, ովքեր զբաղվում են քաղաքականությամբ, «ահել ու ջահելի խնդիր չկա», ովքեր ակտիվ են, առաջնային են համարում պատգամավորական գործունեությունը՝ անկախ այն հանգամանքից գործարար են, թե՝ ոչ:

ՀՀԿ խմբակցության ղեկավարը նշեց, որ այսօր բոլոր հիմքերը կան, որ ՀՀԿ-ն պահպանի իր դիրքերը քաղաքական դաշտում և որոշակի առավելությունների հասնի, ինչպես նաև լինի առաջինը խորհրդարանական ընտրությունների արդյունքում:

Նա նաև նշեց, որ ընդդիմությունը ԱԺ-ում որոշակի հաջողության հասել է:

«Քաղաքական դաշտում դերակատարման առումով և ընդդիմությունը, և իշխանական կուսակցությունները հավասար արժեքավորում ունեն»,- հավելեց նա:

Այն հարցին, թե արդյոք Տիգրան Սարգսյանը կարող է լինել ԱԺ նախագահ, Գ. Սահակյանը պատասխանեց, որ դա կախված է ընտրությունների արդյունքից, քաղաքական իրավիճակից և կանխավ ոչինչ հնարավոր չէ ասել:

«Էսօր վարչապետների շատ թեկնածուներ ունենք, նախարարների շատ թեկնածուներ ունենք, դա բնական է»,- հավելեց նա: