Երևան քաղաքի ընդհանուր իրավասության դատարանում, նախագահությամբ դատավոր Տաթևիկ Գրիգորյանի, այսօր մեկնարկեց HSBC բանկի Կոմիտասի մասնաճյուղի վրա հարձակման գործով դատական նիստը:

Հիշեցնենք, որ մայիսի 3-ին՝ ժամը 14:10-ի սահմաններում, ավազակային հարձակման հետևանքով սպանվել էր բանկի անվտանգության աշխատակից, «Արմոբիլ» ՓԲԸ-ի պահնորդ Խաչատուր Գալստյանը, տարածքում ծառայություն իրականացնող ՊՊԾ ոստիկան Արա Շախբուլյանը, իսկ անվտանգության մեկ այլ աշխատակից՝ Արամ Մկրտչյանը, հրազենային վիրավորում էր ստացել: Գործով մեղադրվում է ոստիկանության գնդապետ Դանիել Դանիելյանը:

Երբ մինչ նիստի սկսվելը գնդապետ Դանիելյանը բերվեց դահլիճ, սպանվածների հարազատները նրա հասցեին վիրավորական արտահայտություններ հնչեցրին:

«Արա, դու հլը սա՞ղ ես»,- ասաց ներկաներից մեկն, իսկ մյուսը հայհոյեց նրան: Իրավիճակը չթեժացնելու համար ուղեկցող գումարտակի ոստիկաններն ամբաստանյալին դուրս տարան դահլիճից՝ մինչև նիստի մեկնարկը:

Նիստի մեկնարկին նախագահող դատավորը ճշտեց Դանիելյանի ինքնությունը հաստատող տվյալները: Վերջինս ամուսնացած է, երեք չափահաս երեխա ունի, բարձրագույն կրթություն: Դատարանին հայտնեց, որ ֆիզիկապես առողջ է, սակայն վերջերս վիրահատություն է տարել:

Դատավորի հարցին, թե որ հասեցում է հաշվառված, Դանիելյանն ասաց, թե չի հիշում: Նրա պատասխանից տպավորություն ստեղծվեց, որ հաշվառման հասցեն հայտնել չի ցանկանում: Ճշտող հարցին, թե ինչո՞վ է պայմանավորված չհիշելը, ամբաստանյալը պատասխանեց, որ նարկոզ է տարել, գտնվում է հետվիրահատական շրջանում, որոշ տվյալներ չի հիշում:

Նշենք, որ Դանիելյանը աչքի վիրահատության է ենթարկվել: Վերջինիս վնասազերծելիս քաղաքացիները նրա աչքը վնասել էին:

Ամբողջ դատական նիստի ընթացքում Դանիելյանը ձեռքերով փակում էր դեմքը, դատավորի հարցերին պատասխանում ցածրաձայն: Ապա խնդրեց իրեն թույլատրել խոսել, և դատավոր Տաթևիկ Գրիգորյանն ի պատասխան նշեց, որ նրան խոսելու հնարավորություն կտրվի:

Սակայն այսօր Դանիելյանը խոսելու հնարավորություն չունեցավ: Պատճառն այն է, որ հրաժարվեց իր երկու պաշտպաններից ու խնդրեց իրեն հանրային պաշտպան տրամադրել. նման պայմաններում նիստն այլևս շարունակվել չէր կարող:

Նշենք, որ ըստ մեղադրանքի, Դանիել Դանիելյանը, զբաղեցնելով ոստիկանության «Ճանապարհային ոստիկանություն» ծառայության տեսանկարահանման միջոցով հայտնաբերված խախտումների արձանագրման կենտրոնի պետի պաշտոնը, ունենալով ոստիկանության գնդապետի կոչում, հանդիսանալով պետական ծառայություն և մշտապես իշխանության ներկայացուցչի գործառույթներ իրականացնող պաշտոնատար անձ, մտադրվել է ավազակային հարձակմամբ՝ կյանքի և առողջության համար վտանգավոր բռնություն գործադրելով «Էյչ-Էս-Բի-Սի բանկ Հայաստան» ՓԲ ընկերության «Կոմիտաս» մասնաճյուղից հափշտակել առանձնապես խոշոր չափերով՝ 242 355 000 դրամին համարժեք 500 000 ԱՄՆ դոլար գումար:

Իր հանցավոր մտադրությունն իրագործելու նպատակով, ըստ մեղադրանքի, Դանիել Դանիելյանը պլանավորել է հանցագործության կատարումը, որից հետո 2018 թվականի մայիսի 03-ին՝ ժամը 14:18-ի սահմաններում, դիմակավորված, զինված գործարանային արտադրության 12 տրամաչափի կոտորակային փամփուշտներով լիցքավորված և իրեն պատկանող իտալական գործարանային արտադրության «FABARM» տեսակի «6030726» և «3034235» գործարանային համարներով 12 տրամաչափի ողորկափող մեկփողանի կարաբինով, իր կողմից ապօրինի կերպով ձեռք բերված, ինքնաշեն եղանակով գործարանային պայմաններում «Ջ-1» տեսակի ձեռքի նռնակների նմանողությամբ պատրաստված, «Ֆ-1» և «ՌԳԴ-5» տեսակի ձեռքի նռնակների պայթեցնելու համար նախատեսված, ռազմամթերք հանդիսացող «УЗРГМ-2» տեսակի գործարանային արտադրության պայթուցիչով համալրված էլիպսաձև նռնակով, քաղաքացիական շեղբավոր սառը զենք հանդիսացող գործարանային արտադրության ընդհանուր նշանակության որսորդական դանակով, ապօրինի մուտք է գործել մասնաճյուղ, որտեղ կարաբինից մեկ անգամ կրակոց արձակելով օդում՝ առաստաղին, հաճախորդներից պահանջել է պառկել հատակին, իսկ աշխատակիցներից պահանջել է իրեն հանձնել առանձնապես խոշոր չափերով՝ 242 355 000 դրամին համարժեք 500 000 ԱՄՆ դոլար գումար:

Այդ ընթացքում հանդիպելով մասնաճյուղում պահնորդական ծառայություն իրականացնող, «Արմոբիլ» ՓԲ ընկերության պահնորդ Խաչատուր Գալստյանի դիմադրությանը, իր հանցավոր մտադրության իրագործման համար առաջացած խոչընդոտը վերացնելու, դիմադրությունը հաղթահարելով հանցանքի կատարումը հեշտացնելու նպատակով, շահադիտական դրդումներով և ավազակությամբ զուգորդված, իր մոտ գտնվող կարաբինից մեկ անգամ կրակել է իր ծառայողական գործունեությունն իրականացնող Խաչատուր Գալստյանի կենսական կարևոր օրգանների շրջանին՝ կրծքավանդակի ձախ կեսի առաջային հատվածին և դիտավորությամբ ապօրինաբար կյանքից զրկել նրան:

Շարունակելով իր հանցավոր մտադրության իրագործումը՝ Դանիել Դանիելյանը մասնաճյուղում գտնվող մյուս պահնորդ Արամ Մկրտչյանից պահանջել է իրեն հանձնել մասնաճյուղում եղած գումարները: Արամ Մկրտչյանը զենքի սպառնալիքի ներքո Դանիել Դանիելյանին ուղեկցել է մասնաճյուղի դրամարկղային բաժին, որտեղ Արամ Մկրտչյանից կրկին պահանջել է իրեն հանձնել գումարները, սակայն, մետաղյա պահարանի գաղտնաբառը չստանալով, նույն շարժառիթներով կյանքից ապօրինաբար զրկելու դիտավորությամբ իր մոտ եղած կարաբինից փորձել է կրակել Արամ Մկրտչյանի կենսական կարևոր օրգանների շրջանի՝ որովայնի ուղղությամբ: Վերջինիս ակտիվ դիմադրության՝ կրակելու պահին զենքի փողը դեպի ներքև հրելու արդյունքում կրակոցը կատարվել է հատակին, կարաբինը նույնպես ընկել է հատակին, որից անմիջապես հետո, Դանիել Դանիելյանը, գործելով նույն դիտավորությամբ, իր մոտ եղած դանակով հարվածներ է հասցրել Արամ Մկրտչյանի կենսական կարևոր օրգանների՝ սրտի ու գլխի շրջաններին և նրան պատճառել մարմնական վնասվածքներ՝ ձախ այտային և կրծքավանդակի ձախ կեսի չթափանցող ծակած-կտրած վերքերի ձևով, որոնք Արամ Մկրտչյանի առողջությանը պատճառել են միջին ծանրության վնաս: Դանիել Դանիելյանին չի հաջողվել հանցագործությունը՝ Արամ Մկրտչյանի սպանությունն ավարտին հասցնել, միայն այն բանի շնորհիվ, որ վերջինիս հաջողվել է թաքնվել հարևանությամբ գտնվող պատի հետևում, բացի այդ, այդ պահին դրամարկղային բաժին եկած մասնաճյուղի գործառությունների համակարգող Արմեն Խաչատրյանը շեղել է նրա ուշադրությունը՝ հայտնելով, որ պատրաստ է տալ պահանջված գումարները:

Դանիել Դանիելյանը կյանքի համար վտանգավոր բռնության սպառնալիքով՝ զենքով և նռնակով սպառնալով, պահանջել է իրեն տրամադրել 500 000 ԱՄՆ դոլար գումար: Արմեն Խաչատրյանն իրեն հատկացված մետաղյա պահարանից դուրս է բերել և Դանիել Դանիելյանի պահանջով ողջ գումարը՝ առանձնապես խոշոր չափերով 79 200 000 դրամը, 53 318 100 դրամին համարժեք 110 000 ԱՄՆ դոլարը, 23 066 637 դրամ 3 լումային համարժեք 39 690 եվրոն, 1 853 136 դրամին համարժեք 242 240 ռուբլին, 5 224 952 դրամին համարժեք 7925 անգլիական ֆունտ ստեռլինգը, 1 126 400 դրամին համարժեք 2980 կանադական դոլարը, 73066 դրամին համարժեք 200 ավստրալիական դոլարը և 92379 դրամին համարժեք 700 ՄԱԷ դիրհամը և դրանք նախ լցրել է Դանիել Դանիելյանի կողմից տրամադրված ուսապարակի, ապա պոլիէթիլենային տոպրակի մեջ:

Դանիել Դանիելյանը, վերցնելով գումարով լցված պոլիէթիլենային տոպրակը, դուրս է եկել մասնաճյուղից և դիմել փախուստի՝ Գյուլբենկյան փողոցով գնացել է Արամ Խաչատրյան փողոցի ուղղությամբ: