Վարչապետի թեկնածու Նիկոլ Փաշինյանն ԱԺ ամբիոնից արձագանքեց «Ծառուկյան» խմբակցության պատգամավոր Գևորգ Պետրոսյանի ելույթին, որը վերաբերում էր Երևանում նոյեմբերին սպասվող ԼԳԲՏ համայնքի հավաքին:

«Հանձնարարել եմ ճշտել, թե  ինչ միջոցառում է սպասվում: Ուզում եմ ասել, որ ինձ համար ընտանիքը և ընտանիքի հայկական մոդելը բարձագույն արժեք է, բայց ուզում եմ մի դեպք պատմել: Երբ Փարիզում էի, սուրճ էի պատվիրել, մի երիտասարդ բերեց ու ասեց՝ բարև ձեզ, պարոն վարչապետ, ասեցի հա՞յ ես, բա հեղափոխություն է եղել, ներգաղթ, չե՞ս ուզում հետ գալ, ասեց՝ հազիվ եմ փախել էնտեղից: Մարզկենտրոններից մեկից էր, ասեց էստեղ ապրում եմ ընկերոջս հետ, որը նորից մեր քաղաքից է: Մենք ընդունո՞ւմ ենք, որ աշխարհի ցանկացած երկրում կան մարդիկ, որոնք ունեն ոչ ավանդական սեռական կողմնորոշում, եթե ընդունում ենք, որ կան,  ի՞նչ ենք անում իրենց հետ: Սովետական միության մեջ պարզ էր ինչ էին անում՝ քրեական օրենսգիրք կար, համապատասխան հոդված կար, որով բանտ էին  նստեցնում, դրանից առաջ կախաղան էին հանում, մենք ի՞նչ ենք անելու»,- հարցրեց Փաշինյանը՝ դիմելով խորհրդարանին:

Վարչապետի պաշտոնակատարի խոսքով՝ կառավարության շահերից չի բխում այս թեմային անդրադառնալը, քանի որ մի մասն ասելու է, որ կառավարությունը պաշտպանում է նման կողմնորոշում ունեցող անձանց, մեկ այլ խումբ այդ անձանց իրավունքների պաշտպանման մասին է խոսելու, երրորդը՝ ավանդական ընտանիքի և այդպես շարունակ:

«Եկեք հասկանանք այդ մարդկանց գոյությունն ընդունում ենք, թե ոչ, թե բոլորին հավաքում, դուրս ենք հանում երկրից, թե ընդունում ենք այդ համայնքին ու ասում քարոզչություն մի արեք: Ես մտածում եմ՝ մեր կառավարությունը էս հարցից ինչ-որ ձևով կխուսափի, բայց մեկ է՝ լինելու է կառավարություն, որ առերեսվելու է այդ որոշման հետ: Նորից եմ ասում՝ ինձ համար հայկական ավանդական ընտանիքից ավելի բարձր արժեք չկա ինձ, բայց իրականում ամեն ինչ այդքան պարզ ու հեշտ չէ,  իրար հետ պետք է որոշում կայացնենք՝ օրենսդրական մակարդակով ենք փոփոխություն անում, թե յոլա ենք գնալու էսպես»,- ասաց Փաշինյանը: