Աբովյանի N2 հատուկ արհեստագործական պետական ուսումնարանը լուծարվեց։ Նման որոշում կայացրեց կառավարությունն իր այսօրվա նիստին՝ կրթության և գիտության նախարար Արայիկ Հարությունյանի առաջարկով։

«Աբովյան» քրեակատարողական հիմնարկում 1997 թվականից գործում է Աբովյանի N2 հատուկ արհեստագործական պետական ուսումնարանը, որն իրականացնում էր անչափահաս դատապարտյալների մասնագիտական ուսուցում:

Ուսումնարանում իրականացված ուսումնասիրությունից պարզվել է, որ դատապարտյալների մի մասը ստացել էր մեկից ավելի անվճար մասնագիտական կրթություն, ինչպես նաև նախարարության համար խիստ կասկածելի է թվացել կրթության որակը՝ հաշվի առնելով դասավանդող համապատասխան մասնագետների քանակը և նյութատեխնիկական բազայի ոչ բավարար լինելը:

Արդարադատության նախարարության հետ քննարկումների արդյունքում, հաշվի առնելով քրեակատարողական հիմնարկների առանձնահատկությունները և գնահատելով դատապարտյալների կրթական կարիքները՝ նախարարությունը նպատակահարմար է գտել քրեակատարողական հիմնարկներում կրթական ծրագրեր իրականացնելու նախապատվություն տալ «Իրավական կրթության և վերականգնողական ծրագրերի իրականացման կենտրոն» ՊՈԱԿ-ին։

Ինչպես հայտնում են ԿԳՆ-ից, անվճար ուսուցմամբ տեղերի համար հատկացվող ֆինանսական միջոցներով հետագայում հնարավոր է դատապարտյալների և կալանավորների համար կազմակերպել կարճաժամկետ ուսուցման ծրագրեր, որը թույլ կտա նրանց  կարճ ժամանակահատվածում ձեռք բերել համապատասխան գիտելիքներ և ծրագրերից կարող են օգտվել ավելի շատ դատապարտյալներ։