Գերմանական «Շպիգել» հանդեսի եւ «MDR» հեռուստաընկերության համատեղ հետաքննությունից հետո, որում խոսվում էր Գերմանիայում «հայկական մաֆիայի» գոյության եւ տեղի իրավապահների գործողությունների մասին, նախատեսվում էր, որ այսօր «MDR»-ը նաեւ 30-րոպեանոց ֆիլմ է ցուցադրելու նույն թեմայով: Սակայն հեռուստաընկերությունը որոշել է ֆիլմը եթեր չտալ:

Հիշեցնենք, որ լրագրողները, մեջբերելով իրավապահների ներքին գրագրությունը եւ գաղտնի փաստաթղթերը,  նշել էին, որ Գերմանիայում ոչ միայն հայկական մաֆիոզ խմբավորումներ են գործում, այլեւ որ 2015-ից այդ երկրում ՀՀ արտակարգ եւ լիազոր դեսպան Աշոտ Սմբատյանը 2000-ականներին կասկածվել է մի շարք հանցագործությունների մեջ, որոնց վերաբերյալ, սակայն, ոստիկանները հիմնավոր ապացույցներ չեն կարողացել գտնել:

Հրապարակումից հետո «Հետքը» դիմել էր ՀՀ ԱԳՆ-ին, որի մամուլի խոսնակ Աննա Նաղդալյանն արձագանքել էր. «ԱԳՆ-ն կապի մեջ է գերմանական պատկան մարմինների հետ՝ մամուլում հայտնված պնդումների արժանահավատությունը ճշտելու համար: Հաշվի առնելով հարցի նրբությունը եւ հավանական ազդեցությունը մեր դիվանագիտական ներկայացուցչության բնականոն աշխատանքի վրա՝ ներկայումս նպատակահարմար չենք գտնում լրացուցիչ մեկնաբանություն տալ: Հավելյալ տեղեկություն կհայտնենք ըստ արդյունքների»:  

Չէր ուշացել նաեւ դեսպան Սմբատյանի արձագանքը: Նա փաստաբանական գրասենյակի միջոցով դիմել էր Բեռլինի դատարան, որն էլ երկու լրատվամիջոցներին արգելել է դիվանագետի մասին որեւէ բառացի կամ իմաստային պնդում անել եւ տարածել: Դատարանի որոշումը խախտելու դեպքում կնշանակվի մինչեւ 250.000 եվրո տուգանք կամ մինչեւ 6 ամսվա կալանք:

Ինչպես տեղեկանում ենք այսօր «MDR»-ի տարածած հաղորդագրությունից, վերջինիս իրավաբան Դիրկ Կրեմսերը (Dirk Kremser) հայտնել է, որ նախատեսված ֆիլմը դատարանի արգելքի պատճառով չի հեռարձակվելու: Ըստ հեռուստաընկերության՝ քանի որ Ա. Սմբատյանի իրավաբանների խնդրանքով դատարանը գործը քննել է արագացված՝ առանց բանավոր ընթացակարգի, լրատվամիջոցը հնարավորություն չի ունեցել ներկայացնել իր դիրքորոշումը, սակայն պատրաստվում է բողոքարկել որոշումը:  

Լուսանկարում՝ Աշոտ Սմբատյանը