Կառավարությունը մերժեց Արմեն Աշոտյանի՝ վարչապետի ուղղաթիռի և ինքնաթիռի ծախսերի հրապարակայնացման նախագիծը
Կառավարության նիստում քննարկվեց «Պաշտոնատար անձանց գործունեության ապահովման, սպասարկման և սոցիալական երաշխիքների մասին» օրենքի նախագծում փոփոխություններ կատարելու ՀՀԿ խմբակցության պատգամավոր Արմեն Աշոտյանի առաջարկությունը։ Պատգամավորն առաջարկում է վարչապետին սպասարկելու նպատակով հատուկ սարքավորված ինքնաթիռից ու ուղղաթիռից պաշտոնատար անձանց օգտվելու կարգը վերապահելու լիազորությունը տրամադրել կառավարությանը: Տեղեկացնենք, որ գործող իրավակարգավորման համաձայն՝ այդ լիազորությունը վերապահված է վարչապետին։
Նախագիծը զեկուցեց արդարադատության նախարարի պաշտոնակատար Արտակ Զեյնալյանը, ում խոսքով՝ առաջարկվում է նաև նախատեսել վերոնշյալ սպասարկումից այլ բարձրաստիճան պաշտոնատար անձանց օգտվելու նպատակի, օգտագործող անձանց ցանկի ու պետական բյուջեից հատկացված գումարի չափի մասին վարչապետի պաշտոնական ինտերնետային կայքում հրապարակել որոշակի տեղեկություններ:
«Մենք առաջարկում ենք պատասխանել նպատակահարմար չէ, քանի որ գտնում ենք, որ վարչապետին վերապահված ուղղաթիռի ու ինքնաթիռի սպասրկման կարգը ճիշտ կլինի, որ հաստատի հենց ինքը՝ վարչապետը»,- ասաց Արտակ Զեյնալյանը՝ առաջարկելով բացասական եզրակացություն տալ նախագծին։
Առաջին փոխվարչապետի պաշտոնակատար Արարատ Միրզոյանն էլ արձագանքելով իր զարմանքն արտահայտեց պատգամավորի առաջարկության կապակցությամբ:
«Շատ հարգարժան պարոն Աշոտյանը բազմաթիվ տարիներ ուներ այս շտկումն ու թափանցիկության աստիճանը ապահովելու համար, բայց ոնց որ թե բաց է թողել այդ հնարավորությունը, ինչի համար ափսոսում եմ, հատկապես պարոն Աշոտյանի դեպքում, ով բազմիցս աչքի է ընկել ազգային անվտանգության, պետական անվտանգության մասին հոգածությամբ լեցուն զանազան ելույթներով»,-ասաց Արարատ Միրզոյանը։
Մեկնաբանել