HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

«Չեմ կարծում, որ հեղափոխությունը մտել է յուրաքանչյուրի տուն»

Հարցազրույց «Մենք» դաշինքից առաջադրված պատգամավորության թեկնածու, «Ազատ դեմոկրատներ» կուսակցության փոխնախագահ Անժելա Խաչատրյանի հետ

-Ձեր դաշինքի կարգախոսն է՝ «Հանուն փոփոխությունների, հանուն քաղաքացու, հանուն Հայաստանի»…

-Դրանք մեր ուղերձներն են, իսկ հիմնական կարգախոսը՝ «Առաջինը Հայաստանն է»:

-Լավ, ուղերձում ի՞նչ փոփոխությունների մասին է խոսքը, եթե մեր իրականության մեջ գլխավոր փոփոխությունը տեղի ունեցավ ապրիլ-մայիսին՝ իր բազմաթիվ հետևանքներով:

-Ապրիլ-մայիսին փոփոխություններ եղել են, բայց անգամ դրանց հիմքում կանգնած իշխանություններն են ասում, որ այդ փոփոխություններն իրենց վերջնական ավարտին չեն հասել: Մենք դեռևս միայն իշխանություն ենք փոխել: Իհարկե, դրական մի փոփոխություն ենք առաջացրել մեր քաղաքացու մոտ՝ դրականի սպասումի զգացողությունը: Կոռուպցիայի դեմ պայքարն է սկսվել՝ ավելի արմատական, ավելի կամային, բայց փոփոխություններ շատ ունենք անելու: Եվ բոլորս պետք է գործենք հանուն փոփոխությունների, որովհետև իշխանություններին մենակ չի կարելի թողնել այս կարևոր գործում: Արտահերթ խորհրդարանական ընտրություններն էլ այդ փոփոխություններից են, դրանից հետո Ազգային ժողովում շատ ու շատ օրենքներ ունենք փոխելու, որոնք փոփոխությունների շարունակությունը կլինեն:

Չեմ կարծում, որ հեղափոխությունը մտել է յուրաքանչյուրի տուն: Հայաստանի Հանրապետության հեռավոր մարզի քաղաքացին դեռևս չի զգում փոփոխություններն իր վրա, որովհետև իր սոցիալ-տնտեսական վիճակը միևնույնն է՝ չի փոխվել, բայց, այո, այդ դրականի սպասումը կա:

-«Մենք» դաշինքի ցուցակը գլխավորող Արամ Սարգսյանն ասել էր, թե դաշինքը համարում է, որ հեղափոխությունն իր նպատակին հասած կլինի, եթե փոփոխությունները կատարվեն թե՛ ներքին, թե՛ արտաքին քաղաքական դաշտում: Արդյոք սա ենթադրում է, որ գործող իշխանությունը չի հասել այդ նպատակին այս ընթացքում: Չմոռանանք, որ «Մենք» դաշինքի անդամ «Հանրապետություն» կուսակցությունը՝ հանձին Արտակ Զեյնալյանի, ևս կառավարության մաս է:

-Այո, «Հանրապետություն» կուսակցությունը ներկայացուցիչ ունի կառավարությունում՝ հանձին Արտակ Զեյնալյանի: Այո, նախորդ հարցում նշեցի, փոփոխությունները դեռևս չեն ավարտվել՝ թե՛ ներքին, թե՛ արտաքին խնդիրներ կան: Տեսեք, մենք խոսում ենք կոռուպցիայի մասին: Հայաստանի Հանրապետությունում վերջին 10 տարիներին կոռուպցիայի դեմ պայքարի տարբեր հանձնաժողովներ են ստեղծվում, ընդլայնվում, փակվում, բայց այդ ամեն ինչ իմիտացիա է եղել: Հիմա հստակ է, որ կառավարությունն ունի այդ հանձնառությունը քաղաքացիների առջև ու նաև այդ կամքն իրականացնելու:

Կոռուպցիայի դեմ պայքարը դեռևս 200 միլիոն դրամ բյուջե հետ բերելը չէ, դա համակարգային պետք է լինի: Երբ, այնուամենայնիվ, որոշ կոռուպցիոներներին թողնում ես որոշ օղակներում, արդեն խնդիր է առաջանում, որովհետև կոռուպցիայի դեմ պայքարը միայն հռչակելն ու որոշ մարդկանցից գումարները հետ բերելը չէ, այլ հստակ հարկային քաղաքականություն սահմանելը: Եթե նման քաղաքականություն չկա, մարդիկ զարտուղի ճանապարհներ են գտնում: Դրանով պայմանավորված՝ ասում ենք, որ այդ փոփոխությունները՝ թե՛ ներքին, թե՛ արտաքին, դեռ չեն եղել: Արտաքին փոփոխության մասին միշտ նշել ենք, որ ուզում ենք, որ Հայաստանը հավասարը հավասարին լինի բոլոր պետությունների հետ: Իրականում այսօր այդ խնդիրն ունենք, և ՀԱՊԿ-ում տեղի ունեցած իրադարձություններն էլ դրա օրինակն են: Մեր ինքնիշխանությունը մանավանդ արտաքին քաղաքականության մեջ միշտ պետք է գտնվի բարձր մակարդակի վրա:

Փոփոխությունները պետք է լինեն նաև մարդկանց գիտակցության մեջ: Ասացի, որ մարդիկ դրական սպասում ունեն, բայց այդ փոփոխությունները դեռևս չկան իրենց մոտ, այն գիտակցումը, որ շատ բաներ պետք է արվեն օրենքի սահմանում, ի վերջո, օրենքի գերակայություն պետք է լինի մեր երկրում, փոփոխություն պետք է լինի նաև արդարադատության, դատական համակարգում: Այսօր արտագաղթի խնդիր ունենք, որի պատճառը ոչ միայն սոցիալ-տնտեսական իրավիճակն է, այլև արդարադատության և իրացվածության խնդիրը, որովհետև շատ ու շատ քաղաքացիներ շատ լավ սոցիալական վիճակ ունեն Հայաստանում, բայց գնում են, որովհետև կրթության, արդարադատության հետ խնդիրներ ունեն:

-Ձեր նշած հարցերը գործող իշխանության օրակարգում էլ կան:

-Բնականաբար, այս 6 ամիսը կարճ է, որպեսզի ասենք չեն իրականացրել: Ընտրություններից հետո պետք է նայենք իրենց ռազմավարությունն ու քայլերը, որովհետև հնարավոր է հանձնառություն լինի, և ինչ-ինչ խնդիրների պատճառով դրանից հետ կանգնեն: Դրա համար միշտ ասում ենք, որ իշխանությունը պետք է լավ և գաղափարական ընդդիմություն ունենա, այլ ոչ թե հարմարվող կամ միայն անհիմն, ինքնապատակ քննադատող ընդդիմություն:

Մենք ոչ թե հարմարվող կամ ինքնանպատակ քննադատող ընդդիմություն ենք լինելու, այլ ընդդիմություն, որը միշտ ուշադիր հետևելու է, թե իշխանություններն ինչ հանձնառություն ունեն, որը կատարեցին կամ որից հետ քայլ արեցին: Ինչո՞ւ ենք ասում հանուն փոփոխությունների, որովհետև միևնույն ժամանակ նաև օգնելու ենք իշխանություններին, որպեսզի ապրիլ-մայիսին սկած փոփոխություններն անշրջելի դառնան:

-Դա ենթադրո՞ւմ է, որ հնարավոր է կոալիցիա կամ համագործակցություն լինի գործող իշխանության հետ, եթե լինեք խորհրդարանում:

-Դեռ վաղ է խոսելը կոալիցիայի կամ համագործակցության մասին: Դրա մասին կխոսենք այն ժամանակ, երբ կլինենք Ազգային ժողովում, կհասկանանք քաղաքական իրավիճակը և ըստ այդմ՝ որոշում կկայացնենք: Ասել ենք, որ լինելու ենք իշխանությունների գաղափարական ընդդիմություն, լոկ ընդդիմություն չենք լինելու, որ իշխանություններին խանգարելու է, այլ օգնելու ենք իշխանությանը: Ընդդիմությունը, որ մտածում է իր երկրի, քաղաքացու բարօրության մասին, հենց նրա համար է, որ օգնի իշխանությանը:

-Բայց հետաքրքիր իրավիճակ է, չէ՞, այսօր գրեթե բոլոր ուժերը պայքարում են ընդդիմության տեղի համար:

-Դա նորմալ է ներկայիս իրավիճակի համար, որովհետև նախկինում, երբ բոլորը գիտեին, թե ինչպիսին է իշխանությունը, որ վստահություն չուներ քաղաքացիների կողմից, բոլոր ուժերը միշտ պայքարել են իշխանափոխության համար: Մեր ընտրությունների նպատակը միշտ դա է եղել:

Եթե ռեալպոլիտիկի դաշտում ես, նորմալ գնահատում ես, ապա հստակ է, որ այս իշխանությունները վստահություն ունեն ՀՀ քաղաքացիների կողմից: Եվ այս իշխանությունները դեռևս մանդատ ունեն, որ տվել են քաղաքացիները: Ինչո՞ւ են ասում՝ թողեք աշխատեն, այսինքն՝ քաղաքացին սպասում է իշխանությունների աշխատանքին: Քաղաքական ուժերը, որոնք փոփոխությունների կողմնակից են, այո, թողնելու են աշխատեն, բայց նաև ցույց են տալու այն սխալները, որոնք արվելու են այդ աշխատանքի ընթացքում: Հասկանալի է, թե ինչու են բոլորը պայքարում ընդդիմության տեղի համար: Եվ փառք Աստծո, մեր Սահմանադրությունն էլ ունի կետ (կարող ենք ասել 2015-ի Սահմանադրության դրական կետերից մեկն է), որ Ազգային ժողովի 33 տոկոսը պարտադիր պետք է տրվի ընդդիմությանը: Հուսով եմ, որ խորհրդարանական երկրում կունենանք բազմակարծություն, մտքերի և գաղափարների բախում, որովհետև դա է կարևոր խորհրդարանական երկրի համար:

Հիմա մենք պայքարում ենք, այո, ընդդիմության տեղի համար: Խոսեցի կոռուպցիայի իմիտացիայի մասին: Այդ նույն իմիտացիան եղել է քաղաքական դաշտում: Հիմա էլ մարդիկ իներցիայով շարունակում են այդ իմիտացիան, ուժեր, որոնք կոալիցիաներում են եղել նախկին իշխանությունների հետ, փայաբաժին են կիսել իրար հետ, միշտ հարստահարել են ՀՀ քաղաքացուն, այսօր հայտարարում են, որ Աբովյան փողոցով քայլել են, այն դեպքում, երբ իշխանություններն արդեն հրաժարական էին տվել: Իսկ օրինակ «Ազատ դեմոկրատներ» կուսակցությունը խուսափել է բարձրագոչ հայտարարություններից, որովհետև ցուցամոլությունը, պոպուլիզմը մեր բնույթը չէ, մենք միշտ ավելի շատ խոսել ենք ծրագրերից և գաղափարներից: Երբ առաջին օրը փոփոխությունների քայլերթը եկավ Ֆրանսիայի հրապարակ, առաջին օրն ենք եղել այնտեղ: Մեր կուսակցության նախագահը հայտարարեց, որ մարդիկ, ովքեր ընդդիմություն են, պետք է լինեն այնտեղ: Մարդկանց հիշողությունը կարճ չէ, դրանում վստահ եմ:

-Նախորդ ընտրություններին՝ 2017-ին, «Ազատ դեմոկրատներ» կուսակցությունը 0,94 տոկոս քվե ստացավ: Դա՞ է պատճառը, որ այս անգամ դաշինքով եք մասնակցելու:

-Ոչ, պատճառը դա չէ: Սկսեմ վերջից՝ ինչո՞ւ դաշինքով, որովհետև իրականում Հայաստանի քաղաքացիների մոտ միավորումների գաղափարը միշտ ընկալելի է, մարդիկ ուզում են, որ այն ուժերը, որոնք նույն ծրագրերն ունեն, նույն գաղափարական հարթակում են գործում, միավորված լինեն: Մեր համակիրներից շատերն ասում էին՝ ինչու չեք միասին, որովհետև երբ քաղաքացին ընտրության է գնում, նույն գաղափարական ծրագրերով ուժերի դեպքում կանգնում է երկընտրանքի առաջ: Եվ դա է պատճառը, որ դաշինքով ենք հանդես գալիս. այդ միավորման պահանջը, ցանկությունը եղել է մարդկանց մոտ:

Ինչ վերաբերում է տոկոսներին, շատ է խոսվում դրանց մասին: Դրանք վավեր չեն ՀՀ քաղաքացու համար, որի ձայնի հաշվարկով են գրել այդ տոկոսները, և եթե վավեր լինեին, ապա այս ամենը չէր լինի, քաղաքացին չէր պահանջի, որպեսզի գործող Ազգային ժողովը ցրվի: Ակնհայտ է, որ այդ տոկոսները կեղծիքով են եղել, և որ այդ ընտրությունները ոչ թե ընտրություններ, այլ միջոցառումներ են եղել, ինչը հայտարարել ենք ընտրությունների հաջորդ օրը:

-Ինչո՞ւ քաղաքացին պետք է ընտրի «Մենք» դաշինքին:

-Քաղաքացին պետք է ընտրի «Մենք» դաշինքին, որովհետև դաշինքի մաս կազմող ուժերը միշտ ունեցել են իրենց սկզբունքները քաղաքական դաշտում, գործել են հանուն քաղաքացու, երբեք ի վնաս քաղաքացու որևէ քայլ չեն արել: Մենք միշտ եղել ենք ընդդիմադիր դաշտում: Մեր կուսակցությունում մարդիկ կան, ովքեր վերջերս Եվրոպական դատարանից փոխհատուցում ստացան 2008-ի դեպքերի հետ կապված: Այսինքն՝ մեր ուժի մեջ մարդիկ կան, ովքեր քաղբանտարկյալ են եղել, ովքեր միշտ պայքարել են քաղաքացու համար: Եվ հուսով ենք, որ մեր պայքարը փոփոխությունների համար արդեն իսկ իր հանգրվանին է հասել, և քաղաքացին արժանի գնահատական տալու է: Մենք ունենք իրական ծրագրեր, որտեղ որևէ պոպուլիստական հայտարարություն չկա:

-Մի ավանդական հարց. եթե չանցնեք խորհրդարան, ի՞նչ եք անելու:

-Նախ ուզում եմ բացառել այդ «եթե»-ն, մենք վստահ ենք, որ լինելու ենք խորհրդարանում, բայց, այնուամենայնիվ, եթե անդրադառնանք այդ «եթե»-ին, որևէ բան չի փոխվելու: Քաղաքական ուժն ընտրությունից ընտրություն չէ, որ պետք է մնա քաղաքական դաշտում: Քաղաքական ուժը, որը չի ստեղծվել ընտրություններին մասնակցելու համար, չի ստեղծվել ինչ-որ մեկի կողմից ընտրություններին ձայներ փախցնելու համար, այլ ունի հստակ ծրագրեր, միշտ պետք է լինի քաղաքական դաշտում: Միայն խորհրդարանը չէ, որ քաղաքականություն իրացնելու վայր է: Քաղաքական ուժն ստեղծված է, որ քաղաքացիների քաղաքական հետաքրքրությունները, գաղափարները ներկայացնի, և եթե այդ քաղաքական ուժի մեջ մարդիկ կան, որոնց համար այդ ուժն իրենց կյանքն ու գործունեությունն է, ապա այդ քաղաքական ուժը խորհրդարանից դուրս է լինելու:

-Կոնկրետ Դուք ինչո՞վ եք զբաղվելու:

-Կոնկրետ ես քաղաքականությամբ եմ զբաղվում, այս պահին աշխատում եմ մասնավոր ընկերությունում, որովհետև քաղաքականությունը պետք է զուգորդվի այլ աշխատանքի հետ, բայց իմ հիմնական գործունեությունը քաղաքական դաշտում լինելն ու քաղաքականությամբ զբաղվելն է, և դա է պատճառը, որ հիմա երկրորդ մասնագիտություն եմ ստանում քաղաքագիտություն ուղղությամբ:

Լուսանկարները՝ Սարո Բաղդասարյանի